“Ndo vha ndo i lindela lwa miṅwaha ya 19!” Onoyo wahashu o vha o lindela mini? O vha o lindela Bivhili ya Ṱhalutshedzelo ya Shango Ḽiswa ya Maṅwalo a Tshikriste a Tshigerika nga luambo lwa Tshibengali. Vhathu vhanzhi vha amba zwi fanaho musi vha tshi wana Bivhili ya Ṱhalutshedzelo ya Shango Ḽiswa nga luambo lwavho. Fhedzi naa no no vhuya na ḓivhudzisa uri hu itea mini musi hu tshi bveledzwa dzenedzi Bivhili?

 Tsha u thoma, Komiti ya u Ṅwala ya Tshigwada tshi Langaho i khetha tshigwada tsha vhaṱalutshedzeli. Zwi dzhia tshifhinga tshingafhani u ṱalutshedzela Bivhili? Wahashu Vho-Nicholas Ahladis vhane vha shuma kha Muhasho wa u Ṱalutshedzela ngei Warwick kha ḽa New York, vho ri: “Hu na zwithu zwinzhi zwine ra zwi sedza. Ri sedza uri hu ṱoḓea vhaṱalutshedzeli vhangana na uri luambo lwa hone lwo serekana lungafhani. Ri dovha ra sedza arali vhavhali vha tshi pfesesa uri vhutshilo ho vha vho hani zwifhingani zwa Bivhili na uri lwonolwo luambo lu ambiwa hani fhethu ho fhambanaho. Kanzhi u ṱalutshedzela Maṅwalo a Tshikriste a Tshigerika (Thestamennde ntswa), zwi dzhia ṅwaha muthihi u ya kha miraru. U ṱalutshedzela Bivhili yoṱhe zwi dzhia miṅwaha miṋa kana u fhira. Fhedzi zwi dzhia tshifhinga tshilapfu nga maanḓa musi zwi tshi ḓa kha u ṱalutshedzela nga luambo lwa zwanḓa.”

 Nga nnḓa ha tshigwada tsha vhaṱalutshedzeli, hu ṱoḓea na vhaṅwe vhathu uri vha thuse musi hu tshi ṱalutshedzelwa Bivhili. Hu vha na tshigwada tsha vhathu vha vhubvo ho fhambanaho, nga zwiṅwe zwifhinga vha bvaho na kha maṅwe mashango. Vhenevho vhathu vha thusa nga u vhalulula zwo ṱalutshedzelwaho nahone vha shuma nga u ḓifunela vha sa badelwi. Mushumo une wa itwa nga vhenevha vhavhalululi u thusa vhaṱalutshedzeli uri vha ṱalutshedzele Bivhili nga nḓila yo teaho, ine ya pfala na ine ya pfesesea. Muṅwe wahashu wa Afurika Tshipembe ane a gudisa vhaṱalutshedzeli vha Bivhili, o ri: “Vhaṱalutshedzeli vha pfa vhe na vhuḓifhinduleli vhuhulwane kha Yehova na vhavhali vha Ipfi ḽawe.”

 Musi mushumo wa u ṱalutshedzela wo no fhela, Bivhili i a gandiswa. Hu ṱoḓea zwithu zwinzhi u itela u gandisa Bivhili. Sa tsumbo, hu ṱoḓea inki, bammbiri, gwati, glue na zwiṅwe-vho. Nga 2019, ho shumisa tshelede i fhiraho R 292 miḽioni u itela u renga zwenezwi zwithu zwine zwa shumiswa kha u gandisa Bivhili. Nga wonoyo ṅwaha, vhahashu vhane vha shuma u gandisa vho fhedza awara dzi fhiraho 300 000 vha tshi khou gandisa Bivhili na u dzi rumela hune dza tea u iswa hone.

 Ndi ngani ri tshi shumisa tshelede nnzhi na tshifhinga tshinzhi nga u rali kha yeneyi mishumo? Wahashu Vho-Joel Blue vhane vha shuma kha Muhasho wa u Gandisa wa Shango Ḽoṱhe, vho ri: “Bivhili ndi bugu ya ndeme ine ra i gandisa, ri ṱoḓa uri nḓila ine Bivhili ya vhonala ngayo i rendise Mudzimu ane ra mu gwadamela na mulaedza une ra u huwelela.”

 Nga nnḓa ha u gandisa Bivhili ya Ṱhalutshedzelo ya Shango Ḽiswa yo ḓoweleaho, ri dovha ra gandisa dziṅwe Bivhili u itela u thusa vhathu vha sa vhoni na vho valelwaho dzhele. Sa tsumbo, Bivhili ya Ṱhalutshedzelo ya Shango Ḽiswa ya braille i wanala nga nyambo dza fumi. Zwi nga dzhia awara dza malo u fhedza Bivhili nthihi ya braille nahone vhuhulwane hayo ndi mithara dza 2.3. Ri dovha ra gandisa Bivhili yo khetheaho i si na gwati, yo itelwaho vhathu vha re dzhele dzine ha tendelwa fhedzi bugu dzi si na gwati.

 Bivhili ya Ṱhalutshedzelo ya Shango Ḽiswa i kwama vhutshilo ha vhane vha i vhala. Ṱhogomelani tsumbo ya tshivhidzo tshi re ngei Tombe, kha ḽa Democratic Republic of Congo. Vhathu vha henefho vha amba Tshikiluba. Zwi dzhia khilomithara dzi fhiraho 1 700 u bva Tombe u ya ḓoroboni khulwane. Ṱhanzi dzi re henefho dzo vha dzi tshi shumisa Bivhili nthihi ya kale ya luambo lwa Tshikiluba. Vhahashu vho vha vha tshi hadzimana yeneyo Bivhili nthihi u itela u lugiselela miṱangano. Fhedzi u bva nga August 2018 ,vhahashu vhoṱhe vha re kha tshenetsho tshivhidzo vho wana Bivhili yo fhelelaho ya Ṱhalutshedzelo ya Shango Ḽiswa nga Tshikiluba.

 Wahashu ane a amba Tshidzheremane o amba zwi tevhelaho nga ha Bivhili ya Ṱhalutshedzelo ya Shango Ḽiswa yo vusuluswaho ya luambo lwawe, o ri: “A thi tsha amba uri ndi tea u vhala Bivhili. Fhedzi ndi ḓivhudzisa uri, ‘Ndi ḓo vhala lini zwo engedzeaho?’” Muṅwe o valelwaho dzhele o ṅwala uri: “Ndo fhiwa kopi ya Bivhili ya Ṱhalutshedzelo ya Shango Ḽiswa nahone i khou shandula vhutshilo hanga. U bva tshee nda thoma u shumisa heyi Bivhili, ndi vho pfesesa Bivhili khwine. Ndi ṱoḓa u ḓivha zwo engedzeaho nga ha Ṱhanzi dza Yehova nahone ndi ṱoḓa u vha muṅwe wavho.”

 Vhoṱhe vhane vha vhala Bivhili ya Ṱhalutshedzelo ya Shango Ḽiswa, vha livhuwa miṋeelo ine ya ita uri hu bveledzwe yeneyi Bivhili. Yeneyi miṋeelo ine ya tikedza mushumo wa shango loṱhe, i itwa hu tshi shumiswa donate.pr2711.com. Ri livhuwa u ṋeela ha vhoiwe zwi tshi bva mbiluni.