Maria Magdalena o vha e mutevheli a fhulufhedzeaho wa Yesu Kristo. Khamusi o irwa dzina ḽa Magdalena ḽi tshi bva kha ḓorobo ya Magadala (khamusi Magadani) i re tsini na Lwanzhe lwa Galilea. Maria a nga vha o vhuya a dzula hone.

 Maria Magdalena o vha e muṅwe wa vhafumakadzi vhe vha tshimbila na Yesu na vhafunziwa vhawe na u vha ṱhogomela. (Luka 8:1-3) O vhona Yesu a tshi vhulawa nahone o vha muṅwe wa vhe vha thoma u vhona Yesu a tshi vuswa.—Marko 15:40; Yohane 20:11-18.

•  Naa Maria Magdalena o vha a tshi rengisa muvhili?

•  Naa Maria Magdalena o vha e “muapostola wa vhaapostola”?

•  Naa Maria Magdalena o vha e mufumakadzi wa Yesu Kristo?

•  Hu na vho Maria vhangana Bivhilini?

 Bivhili a i ambi uri Maria Magdalena o vha a tshi rengisa muvhili. Zwine ya zwi amba nga hae ndi uri Yesu o pandela madimoni a sumbe khae.—Luka 8:2.

 Ndi ngani vhathu vhanzhi vha tshi tenda uri o vha a tshi rengisa muvhili? Nga murahu ha miṅwaha ya maḓana, vhaṅwe vho amba uri Maria o vha e mufumakadzi (khamusi a tshi rengisa muvhili) we ha si ambiwe dzina ḽawe we a ṱanzwa milenzhe ya Yesu nga miṱodzi yawe na u i phumula nga mavhudzi awe. (Luka 7:36-38) Fhedzi Bivhili a i ri ṋei zwiitisi zwa u tenda zwenezwo.

 Hai. Kereke ya Katolika i vhidza Maria “Mukhethwa Maria Magdalena” na “muapostola wa vhaapostola” ngauri ndi ene wa u thoma u vhudza vhaapostola uri Yesu o vuswa. (Yohane 20:18) Fhedzi a zwi iti uri a vhe muapostola nahone a huna hune Bivhili ya amba uri o vha e muapostola.—Luka 6:12-16.

 Bivhili yo fhedza u ṅwaliwa hu ṱoḓaho u vha mafheleloni a ḓana ḽa u thoma ḽa miṅwaha. Nga murahu ha miṅwaha ya maḓana, vharangaphanḓa vha kereke vho ita phetho ya uri Maria Magdalena u ḓo vhidzwa “mukhethwa.” Kha maṅwalwa a ḓanani ḽa vhuvhili na ḽa vhuraru, ho ṅwaliwa uri vhaṅwe vhaapostola vho itela Maria Magdalena vivho. Fhedzi eneo maṅwalwa ha tshipiḓa tsha Bivhili nahone ha tikedzwi nga Bivhili

 Hai. Zwavhuḓi-vhuḓi Bivhili i zwi bvisela khagala uri Yesu ho ngo vhinga. a