Ndi Vhafhio Vhane Vha Ya Ṱaḓulu?
Bivhili i a fhindula
Mudzimu u nanga tshivhalo tshiṱuku tsha Vhakriste vha fhulufhedzeaho vhane vha ḓo vuselwa u tshila ṱaḓulu. (1 Petro 1:3, 4) Uri vha kone u wana enea malamba, vha tea u bvela phanḓa vha tshi thetshelesa Mudzimu na u dzula vhe na lutendo lwo khwaṱhaho.—Vhaefesa 5:5; Vhafilipi 3:12-14.
Vhane vha ya ṱaḓulu vha ḓo vha vha tshi khou ita mini henengei?
Vha ḓo shuma na Yesu sa mahosi na vhotshifhe lwa miṅwaha ya 1 000. (Nzumbululo 5:9, 10; 20:6) Vha ḓo vhumba “ḽiṱaḓulu ḽiswa” kana Muvhuso wa ṱaḓulu une wa ḓo vhusa “ḽifhasi ḽiswa” kana vhathu vha re ḽifhasini. Vha ḓo vhusa ḽifhasi vhe ṱaḓulu nahone vha ḓo thusa vhathu uri vha tshile nga nḓila ye Mudzimu a vha tshi ṱoḓa ngayo u bva mathomoni.—Yesaya 65:17; 2 Petro 3:13.
Ndi vhangana vhane vha ḓo vuselwa ṱaḓulu?
Bivhili i amba uri vhathu vha 144 000 vha ḓo vuselwa u tshila ṱaḓulu. (Nzumbululo 7:4) Kha bono ḽo ṅwaliwaho kha Nzumbululo 14:1-3, muapostola Yohane o vhona “Ngwana yo ima Thavhani ya Tsioni, i na vha 144 000.” Kha ḽeneḽi bono, “Ngwana” i imela Yesu o vuswaho. (Yohane 1:29; 1 Petro 1:19) ‘Thavha ya Tsioni’ i imela mushumo wa ndeme wa Yesu na wa vha 144 000 vhane vha ḓo vhusa nae ṱaḓulu.—Phisalema 2:6; Vhahevheru 12:22.
“Vho vhidzwaho, vho nangwaho” uri vha vhuse na Kristo Muvhusoni wa Mudzimu vha vhidzwa “sambi ḽiṱuku.” (Nzumbululo 17:14; Luka 12:32) Zwenezwi zwi sumbedza uri ndi tshigwada tshiṱuku musi vha tshi vhambedzwa na nngu dzoṱhe dza Yesu.—Yohane 10:16.
Mavhonele o khakheaho nga ha vhane vha ya ṱaḓulu
Mavhonele o khakheaho: Vhathu vhoṱhe vho lugaho vha ya ṱaḓulu.
Ngoho: Mudzimu u fhulufhedzisa uri vhunzhi ha vhathu vho lugaho vha ḓo tshila tshoṱhe kha ḽifhasi.—Phisalema 37:11, 29, 34.
Yesu o ri: “A hu na muthu we a gonya ṱaḓulu.” (Yohane 3:13) O vha a tshi khou sumbedza uri vhathu vho lugaho vho faho Yesu a sa athu fa, vha ngaho Abrahamu, Mushe, Yobo na Davida, a vho ngo ya ṱaḓulu. (Mishumo 2:29, 34) Nṱhani hazwo, vho vha vhe na fhulufhelo ḽa u vuselwa u tshila kha ḽifhasi.—Yobo 14:13-15.
U vuselwa u tshila ṱaḓulu zwi vhidzwa “u vuswa ha vhafu ha u thoma.” (Nzumbululo 20:6) Zwenezwi zwi sumbedza uri hu ḓo vha na huṅwe u vuswa ha vhafu. Vha ḓo vha vha tshi khou vuselwa u tshila kha ḽifhasi.
Bivhili i funza uri “lufu a lu tsha ḓo vha hone” musi Muvhuso wa Mudzimu u tshi vhusa. (Nzumbululo 21:3, 4) Zwi tou pfala uri zwine Mudzimu a khou fhulufhedzisa zwi ambela kha ḽifhasi, ngauri a hu na lufu ṱaḓulu.
Mavhonele o khakheaho: Muṅwe na muṅwe u tou ḓinangela uri u khou ṱoḓa u tshila ṱaḓulu kana kha ḽifhasi.
Ngoho: Mudzimu u tou nanga uri u khou ṋea nnyi “malamba ngei ṱaḓulu” kana fhulufhelo ḽa u tshila ṱaḓulu. (Vhafilipi 3:14) A ri ḓinangeli uri ri ḓo shumela Mudzimu ṱaḓulu kana kha ḽifhasi.—Mateo 20:20-23.
Mavhonele o khakheaho: U tshila ṱaḓulu zwi khwine u fhira u tshila kha ḽifhasi. Vhane vha ḓo tshila kha ḽifhasi a vho ngo tewa nga u ya ṱaḓulu.
Ngoho: Mudzimu u amba uri vhane vha ḓo tshila tshoṱhe kha ḽifhasi ndi ‘vhathu vhawe,’ ‘vhanangiwa vhawe’ na “vho fhaṱutshedzwaho nga Yehova.” (Yesaya 65:21-23) Vha ḓo tshila tshoṱhe na u ḓiphiṋa nga u ita uri ḽifhasi ḽi vhe pharadiso. Zwenezwi zwo vha zwi tshipikwa tsha Mudzimu.—Genesi 1:28; Phisalema 115:16; Yesaya 45:18.
Mavhonele o khakheaho: Tshivhalo tsho ambiwaho tsha 144 000 ndi tsha pfanyisedzo, a si tsha vhukuma.
Ngoho: Naho bugu ya Nzumbululo i na nomboro dzine dza vha dza pfanyisedzo, dziṅwe dzadzo ndi dza vhukuma. Sa tsumbo, i amba nga ha “madzina a vhaapostola vha Ngwana vha 12.” (Nzumbululo 21:14) Vhonani vhuṱanzi vhune ha ita uri ri phethe nga ḽa uri tshivhalo tsha 144 000 ndi tsha vhukuma.
Nzumbululo 7:4 i amba uri “tshivhalo tsha vho swaiwaho [kana vho nangiwaho uri vha ḓo tshila ṱaḓulu] ndi 144 000.” Bivhili ya kona u amba nga ha “gogo ḽihulu, ḽi sa vhalei.” Na vhenevha vha “gogo ḽihulu” vha ḓo tshidzwa nga Mudzimu. (Nzumbululo 7:9, 10) Arali tshivhalo tsha 144 000 tshi si tsha vhukuma, tshi tshi fanyisela vhoṱhe vhane vha ḓo tshidzwa, a zwi pfali uri ha ambiwe nga ha tshiṅwe tshigwada tsha vhathu tshi “sa vhalei.” a
Zwiṅwe hafhu, Bivhili i amba uri vha 144 000 vho “rengwa kha vhathu uri vha vhe vha u thoma u ṋekedzwa.” (Nzumbululo 14:4) Maipfi ane a ri “vha u thoma u ṋekedzwa” a ambela kha vhathu vha si gathi vha re tshipiḓa tsha tshigwada tshihulu. A ambela kha vhane vha ḓo vhusa vha re kha ḽifhasi vhe ngei ṱaḓulu.—Nzumbululo 5:10.
a Na Muphurofesa Robert L. Thomas o ṅwala zwi tevhelaho nga ha tshivhalo tsha 144 000 tsho ambiwaho kha Nzumbululo 7:4: “Ndi tshivhalo tsha vhukuma, tshi tshi vhambedzwa na tshivhalo tshi sa vhalei tsho ambiwaho kha 7:9. Arali tsha dzhiiwa tshi tsha pfanyisedzo, zwi amba uri nomboro dzoṱhe dzo ambiwaho Bivhilini ndi dza pfanyisedzo.”—Revelation 1-7: An Exegetical Commentary, siaṱari 474.
You May Also Like
MBUDZISO DZA BIVHILI DZO FHINDULWA
Ḽiṱaḓulu Ndi Mini?
Bivhilini, ḽeneḽi ipfi ḽo shumiselwa u ṱalula zwithu zwiraru.
ESSENTIAL BIBLE TEACHINGS
Muvhuso Wa Mudzimu Ndi Mini?
Tshifhingani tsha vhuḓinḓa hawe kha ḽifhasi, Yesu o funza nga ha Muvhuso wa Mudzimu u fhira dziṅwe thero dzoṱhe. Vhathu vho fhedza maḓana a miṅwaha vha tshi khou rabelela uri wonoyo Muvhuso u ḓe.
PFUNZO DZA BIVHILI
Lingedzani Heyi Ngudo Ya Bivhili
Gudani Bivhili nga mahala ni tshi khou thuswa nga muṅwe wa Ṱhanzi dza Yehova.