YOMARA e i so fradei, che i ga nome Marcelo e Hiver, i ze de star nte una pìcola cità nela Guatemala. Ela la ga scominsià a studiar la Bìblia cole Testimònie de Geovà, e un tempo dopo, so due fradei i ga tacà a studiar anca lori. Ma no saria mia fàcile far quel laoro lì. Parché? Parché tuti tre i ze orbi e no i savea mia leder braile. Par quela, el fradel che i ghe insegnea la Bìblia ghe tochea leder el libro e anca i versìcoli dela Bìblia.

Ndar ale riunion saria nantro problema. Lori no i era mia boni de ndar fin el salon parché ghe volea far un viaio de 40 minuti. Ma i fradei li menea a tute le riunion. E quando lori i gavea de far una parte, i fradei li giutea a saver cossa parlar.

Nel mese de maio de 2019, i ga scominsià a far le riunion nela so cità. In quela època, un casal de pionieri l’è ndà de star lì. Lori i ga proà giutar Yomara, Marcelo e Hiver a leder e scriver in braile. Ma come quel casal no savea braile, i ze ndati ala biblioteca par impararlo e anca saver come i poderia insegnar a quei fradei.

In pochi mesi, Yomara, Marcelo e Hiver i era belche drio leder ben in braile. Cossita, i ze stati boni de far pi forte la so amicìssia con Geovà. a Adesso, lori tre i ze pionieri regolari e Marcelo l’è servo ministerial. Tute le stimane, questi tre fradei i laora tanto par Geovà, e tuti nela congregassion i resta contenti de veder la so alegria.

La congregassion la ga mostrà tanto amor a questi tre fradei e lori i ze pròpio contenti. Yomara la dise: “Le Testimònie de Geovà le ne ga mostrà cossa l’è el vero amor ancora dela prima volta che le ghemo cognosseste.” Marcelo el ga dito: “Nela nostra congregassion ghemo bravi amighi. Ma ghemo fradei in tuto el mondo che i ze una fameia unida par causa del amor.” Yomara e i so fradei i speta premosi el giorno che i ndarà veder la Tera deventar un paradiso. — Sal. 37:10, 11; Isa. 35:5.