PAR I israeliti la mùsica la era tanto importante. Tanti libri dela Bìblia i parla de persone che le sonea istrumenti o le cantea. Arquanti libri dela Bìblia i ze càntichi. Par esémpio, el libro dei Salmi, el Càntico de Salomon e Lamentassion i ze stati fati par esser cantadi. Un libro che parla dela vita dele persone nel passà el mostra che i israeliti i doperea la mùsica in tante atività dela so vita.

La mùsica la fea parte dela vita dei israeliti. I israeliti i sonea mùsica par mostrar i so sentimenti. (Isa. 30:29) Par esémpio, le done le sonea tamborei, le cantea e le balea quando un el deventea rè, quando i soldadi i vinsea una guera o in altre selebrassion de adorassion. (Giui. 11:34; 1 Sam. 18:6, 7; 1 Rè 1:39, 40) Quando moria qualchedun, i israeliti i cantea par mostrar la so tristessa. (2 Cró. 35:25) Un libro el ga dito che ‘l’è sicuro che i israeliti ghe piasea pròpio tanto la mùsica’.

I rè de Israel ghe piasea la mùsica. El rè Saul el ga domandà a Davi che el vegnesse nel so palàssio par sonar mùsica par lu. (1 Sam. 16:18, 23) Dopo, quando Davi l’è deventà rè, lu el ga fato istrumenti musicai, el ga scrito bele mùsiche e el ga organisà persone par sonar nel témpio de Geovà. (2 Cró. 7:6; Amòs 6:5) El rè Salomon el gavea òmini e done che i cantea nel so palàssio. — Ecl. 2:8.

I israeliti i doperea la mùsica par adorar a Geovà. Se pol capir questo parché nel témpio de Gerusalen ghen’era 4 mila òmini che sonea istrumenti. (1 Cró. 23:5) Lori i sonea sìmbali, istrumenti de corda, arpe e trombete. (2 Cró. 5:12) Ma anca altri israeliti i adorea a Geovà cola mùsica. Par esémpio, tanti israeliti i cantea i Càntichi dele Subide intanto che i ndea nele festività in Gerusalen. (Sal. 120-134) E de acordo con i scriti dei giudei, i israeliti i cantea i Salmi de Halel, a o càntichi de lodi a Geovà, o intanto che i magnea la Pàscoa.

La mùsica la ze ancora tanto importante par i servi de Geovà. (Tia. 5:13) Noantri cantemo càntichi a Geovà par lodarlo. (Efe. 5:19) Quando cantemo par lu insieme ai fradei e ale sorele, se sentimo pi unidi. (Col. 3:16) E quando noantri cantemo, sonemo o scoltemo mùsica che parla sora Geovà, se sentimo incoraiadi e ancora pi boni de infrontar i nostri problemi. (Ati 16:25) La mùsica l’è una bela maniera de mostrar la nostra fede e el nostro amor par Geovà.