GESÙ el ga parlà tante volte sora la orassion. Nel so tempo, i lìderi religiosi i preghea in posti ndove ghen’era tante persone sol par farse veder. Lori i volea che i altri li vedesse come persone bone par causa dela maniera che i adorea a Dio. Lori i doperea tante parole, i ghe metea tanto tempo nele so orassion e i disea le medèsime parole drio man parché i pensea che i gavea de pregar cossita par esser scoltadi. (Mateo 6:​5-8) Ma, Gesù el ga dito che tuto quel che lori i fea l’era par gnente. Par quela, lu el ga insegnà le persone come che le gavea de pregar a Dio.

Gesù el ne ga insegnà che, quando preghemo, ghemo de domandar che el nome de Dio el sia santificà, che vegna el So Regno e che sia fata la So volontà. Lu anca el ga insegnà che, quando ghemo qualche dificoltà nela nostra vita, podemo domandar el aiuto de Dio. (Mateo 6:​9-​13; Luca 11:​2-4) Gesù el ga doperà ilustrassion par insegnar che, se volemo che Dio el scolte le nostre orassion, ghemo de seitar a domandar con fede e umiltà. (Luca 11:​5-​13; 18:​1-​14) Lu no’l ga insegnà sol par meso de quel che el parlea, ma anca par quel che el fea. — Mateo 14:23; Marco 1:​35.

Gesù el ga insegnà i so dissìpoli e cossita, i ze stati boni de far meio le so orassion a Dio. Ma l’è stà sol nela so ùltima note qua ntela Tera che Gesù el ga insegnà una roba ancora pi importante sora la orassion.

Nela ùltima note insieme dei so apòstoli, Gesù li ga incoraiadi tanto. Ma lu anca el ga parlà de una roba che no i gavea mai sentio. Gesù el ga dito: “Mi son la strada, la verità e la vita. Nissun riva al Pare senò par meso de mi.” Lu el ghe ga prometesto: “Tuto quel che domandé nel me nome, mi lo farò, par glorificar el Pare par meso del Fiol.” E nel fin, lu el ga dito: “Fin adesso no gavé domandà gnente nel me nome. Domandé, alora ndaré ricever. Cossita saré contenti del tuto.” — Gioani 14:​6, 13, 14; 16:24.

Un libro el dise che, con queste parole maraveiose, Gesù el ga fato “un cambiamento tanto grando nela maniera de pregar”. Gesù no’l ga dito che lori i gavaria de scominsiar a pregar a lu invesse de pregar a Dio. Ma el ga insegnà una nova maniera de rivar darente de Geovà.

Semo sicuri che Geovà sempre el ga scoltà le orassion dei so servi fedeli. (1 Samuel 1:​9-​19; Salmo 65:2) Ma dopo che el pòpolo de Israel el ga fato un acordo con Geovà, quel che volesse rivarse darente de Dio el gavaria de acetar che i israeliti i era el pòpolo che Lu el gavea scoliesto. Dei giorni de Salomon avanti, lori i gavea de acetar el témpio come el posto scoliesto par far sacrifissi a Dio. (Deuteronómio 9:​29; 2 Cróniche 6:​32, 33) Ancora cossita, lori no i ndaria adorar a Dio de questa maniera par sempre. Paolo el ga spiegà che la Lege mosaica e i sacrifissi fati nel témpio i era sol “una ombria dele bone cose che le ga de vegner, ma nò la pròpia realità”. (Ebrei 10:​1, 2) Nel posto de questa ombria vegnaria la realità. (Colossensi 2:​17) Del ano 33 avanti, quei che i vol esser amighi de Dio no i ghe ocore pi obedir ala Lege mosaica. Invesse, i ga de obedir a quel che la Lege la parlea, o sia, Gesù Cristo. — Gioani 15:14-​16; Gàlati 3:​24, 25.

Gesù el ne ga insegnà una maniera ancora meio de rivarse darente de Geovà. Gesù el ga dito che lu l’è come un amigo poderoso parché, par meso de lu, Dio el scolta e risponde le nostre orassion. Ma, come che Gesù l’è stà bon de far tuto questo?

Tuti noantri semo nassesti pecadori, alora, mai podaremo far un sacrifìssio o qualcossa par finir col nostro pròpio pecato. Par quela, no meritemo mia esser amighi del nostro santo Dio, Geovà. (Romani 3:​20, 24; Ebrei 1:​3, 4) Ma Gesù el ga dato la so vita perfeta par pagar i pecati de tuta la umanità. (Romani 5:​12, 18, 19) Cossita, podemo gaver el perdon dei nostri pecati e sentirse lìberi par parlar con Dio. Par quela, ne ocore gaver fede nel sacrifìssio de Gesù e pregar nel so nome. — Efesi 3:​11, 12.

Gesù el laora par far la volontà de Dio. Quando preghemo nel so nome, semo drio mostrar la nostra fede in al manco tre de queste robe che lu el fà: (1) Lu l’è “el Piegoreto de Dio” e el so sacrifìssio pol farne esser perdonadi dei nostri pecati. (2) Geovà lo ga ressussità e, come “somo sasserdote”, el ne giuta par meso del risgate. (3) Gesù l’è “la strada” e l’è sol par meso de lu che podemo rivarse darente de Geovà. — Gioani 1:​29; 14:6; Ebrei 4:​14, 15.

Ghe demo onor a Gesù quando preghemo nel so nome. Lu el mèrita questo onor parché Geovà el vol che tuti “i se indenòcie davanti el nome de Gesù e che i parle a tuti che Gesù Cristo l’è Signor par la glòria de Dio, el Pare”. (Filipensi 2:​10, 11) Ancora pi importante, questo dà onor a Geovà, che el ne ga dato Gesù come sacrifìssio. — Gioani 3:​16.

La Bìblia la dopera diversi tìtoli e nomi che ne mostra chi l’è Gesù. Cossita, podemo anca capir i benefissi che ricevemo par causa de quel che Gesù el ga fato, l’è drio far e el farà. (Vedi el quadro “ El importante laoro che Gesù el fà”.) Gesù el ga ricevesto un “nome pi importante che qualche altro” *. Lu el ga ricevesto tuta la autorità nel cielo e nela Tera. — Filipensi 2:9; Mateo 28:18.

Se volemo che Dio el ne scolte, ghemo de pregar nel nome de Gesù. (Gioani 14:13, 14) Ma no ghemo de dir “nel nome de Gesù” sol parché semo costumadi a far questo. Parché?

Varda questa ilustrassion. Un paron de un scritòrio el fà una carta e fursi la finisse con “gràssie tanto”. Ma, càtito che questo l’è pròpio el so sentimento, o l’è sol la maniera che lu l’è costumà a finir le so carte? Doperar el nome de Gesù nte una orassion l’è ancora pi importante de quel che te scrivi quando te finissi una carta. No ghemo mia de far le nostre orassion sempre cole medèsime parole e sensa pensarghe sora quel che disemo. Invesse, ghemo de ‘pregar sempre’ e farlo de cuor. — 1 Tessalonissensi 5:​17; Salmo 119:145.

Ma come che te pol pregar nel nome de Gesù de tuto el cuor? Pénseghe sora le bele qualità che lu el ga, anca in quel che lu el ga fato e quel che lu ancora el ndarà far par ti nel futuro. Quando ti te preghi, ringràssia e loda a Geovà par la maniera che lu l’è drio doperar el so Fiol. Far questo te giuta a gaver ancora pi fede nela promessa de Gesù: “Se domandé al Pare qualcossa nel me nome, lu el ve darà.” — Gioani 16:23.