Mi son nassesta in Londres, Inglaterra, nte un un bairo ciamà Paddington, ndove che ghen’era de star tante persone. Mi ero de star con me mare e con tre sorele pi vècie. Me pare l’è ndà via de casa diverse volte parché l’era un ciucheton.

Quando mi era una toseta, me mare la me disea che mi gavea de pregar tute le note. Mi gavea una pìcola Bìblia sol coi Salmi, e mi inventea una cansion par poder cantarli. Una volta, go ledesto una frase che no la ze pi ndata fora dela me testa: “Un di, el doman no’l rivarà.” Son stata desmissiada tuta la note pensando nel me futuro. Mi pensea: ‘Qual che l’è el ogetivo dela vita? No pol esser sol questo.’ Mi no volea mia morir!

Go scominsià a gaver interesse par el ocultismo. Mi proea parlar coi morti, visitea semiteri coi me amighi e vedea filmi de demoni. Par noantri questo l’era una roba bela, ma al stesso tempo ne dea tanta paura.

Quando gavea sol 10 ani go scominsià a far le robe sol dela me maniera. Go scominsià a fumar e no son pi stata bona de fermarme. E, par restar ancora pedo, go scominsià a doperar macogna. Con 11 ani go scominsià a bever. No me piasea tanto la bebida, ma me piasea restar ciuca. Anca me piasea tanto scoltar mùsica e balar, par quela sempre che mi podea ndea a feste e baile. Mi ndea via la sera e rivea casa poco vanti de sciarar el giorno. Mi fea tuto questo sensa che nissuni savesse. Come mi restea sempre straca, sempre perdea la scola. E, quando mi ndea scola, quasi sempre bevea nela ora dela marenda.

Nel me ùltimo ano de scola go bio sol note rugne. E me mare no la savea quasi mai dele robe brute che mi fea. Quando che la ga savesto dele me note, la ze restada tanto disgustada e inrabiada con mi. Noantre ghemo barufà e mi go scampà via de casa. Durante un tempo, go vivesto col me moroso, Tony, che l’era dela religion rastafàri. Tony el robea e anca el vendea droghe. Anca l’era cognossesto come una persona pròpio cativa. Poco tempo dopo son restada gràvida. Me fiol l’è nassesto quando gavea sol 16 ani.

La prima volta che go parlà cole Testimònie de Geovà le stà ntel posto che mi era de star, ndove i tendea de tose nò maridade che le gavea fioi. Go catà questo posto col aiuto del servìssio sossial. Due done che le era Testimònie de Geovà le ndea sempre visitar quelaltre mame. Un giorno anca mi go parlà cole Testimònie de Geovà. Mi volea provar che lore le era sbaliade. Ma lore, con tanta passiensa, le me ga rispondesto cola Bìblia a tute le domande che mi gavea. Lore le era gentile e gavea tanta bontà e questo me ga piasesto tanto. Alora go volesto studiar la Bìblia con lore.

Suito go imparà una roba nela Bìblia che la ga cambià tuta la me vita. De quando era picinina, mi gavea paura de morir. Ma go imparà nela Bìblia che un giorno ghen sarà una ressuression! (Gioani 5:28, 29) Anca go imparà che Dio el se importa con mi. (1 Piero 5:7) Un testo che me ga piasesto tanto l’è stà Geremia 29:11, che el dise: “‘Parché mi sò ben quel che penso par valtri,’ el dise Geovà, ‘vui che gavé pace, nò desgràssia, e vui darve un futuro e una speransa.’” Go scominsià a creder che un di posso viver nte un paradiso qua nela Tera. — Salmo 37:29.

Le Testimònie de Geovà le me ga mostrà che le me amea de verità. La prima volta che son data a una riunion, me ga piasesto tanto del posto e dele persone. I me ga ricevesto tanto ben! (Gioani 13:34, 35) L’è stà tanto diferente de come son stata tratada nte una ciesa che mi era ndata vanti. Le Testimònie de Geovà le me ga tratà tanto ben stesso cola me situassion. Lore le me giutea de tante maniere, le me dea amor, atension, ma anca le me giutea de maniere pràtiche. Me sentia che fea parte de una granda fameia.

Studiando la Bìblia go visto che gavea de far cambiamenti par contentar a Dio. Ma fermarme de fumar, par esémpio, l’è stà tanto difìcile. Anca go visto che arquante mùsiche che scoltea le me assea con de pi voia de fumar macogna. Alora, go dessidio cambiar el tipo de mùsica che scoltea. Mi volea anca fermarme de bever, alora no son pi ndata ale feste e baile, parché l’era una tentassion par mi. Anca go fato amicìssie con persone che le me ga motivà a seitar far cambiamenti nela me vita. — Proverbi 13:20.

In questo tempo, anca Tony l’era drio studiar la Bìblia cole Testimònie de Geovà. Quando Tony el ga visto le risposte dele so domande, l’era sicuro che el gavea catà la verità. El ga fato grandi cambiamenti nela so vita: el ga abandonà i so amighi violenti, el ga assà de esser un criminoso e el se ga fermà de fumar macogna. Noantri due ghemo visto che, par contentar a Geovà, gaveino de assar in drio la nostra vita imoral e slevar el nostro fiol come una vera fameia. Alora, noantri se ghemo maridadi nel ano 1982.

Me ricordo che go fato tante peschise nele reviste A Sentinela e Despertai! *. Mi ndea in serca de stòrie de persone che le ga fato cambiamenti come quei che mi volea far. I so esempi i me dea tanto ànimo! Le so stòrie le me ga dato forsa par seitar sforsarme. Anca go seità a pregar parché Geovà no’l me abandonesse. Cossita, nel lùlio de 1982 mi e Tony semo stati batesadi come Testimònie de Geovà.

Esser amiga de Geovà me ga salvà la vita. Mi e Tony sentimo el aiuto de Geovà quando passemo par problemi. E nele dificoltà noantri ghemo imparà a fidarse in Geovà. Go visto che lu el ga sempre giutà e tendesto dela nostra fameia. — Salmo 55:22.

Ghemo bio una granda alegria in giutar el nostro fiol e la nostra fiola a imparar sora Geovà. Anca, semo tanto felici de veder i nostri neti servindo a Geovà.

Adesso dormo tranquila e sensa preocupassion col futuro e cola morte. Anca, mi e Tony ghemo el privilègio de visitar tute le stimane una congregassion difarente dele Testimònie de Geovà par giutarle. E insieme giutemo le persone a capir che, se lore le dimostra fede in Gesù, anca lore le pol viver par sempre.