Come che la era la aparensa de Gesù?
La risposta dela Bìblia
No ghemo come saver come la era la aparensa de Gesù parché la Bìblia no la parla sora ela. Questo mostra che la so aparensa no la ze la roba pi importante. Ma la Bìblia la ne giuta a imaginar come Gesù l’era.
Caraterìstiche: Gesù l’era giudeo, e pol esser che lu el gavea le caraterìstiche del pòpolo dela so mare. (Ebrei 7:14) Podemo capir che Gesù no l’era tanto difarente dei altri. Una volta, sensa parlar ai altri, lu el ga viaià dela Galilea fin Gerusalen e nissuni lo ga ricognossesto. (Gioani 7:10, 11) La aparensa de Gesù no la ciamea la atension in meso ai so dissìpoli. Podemo dir questo parché ghe ga tocà a Giuda Iscarioti mostrar chi che l’era Gesù a quei che i volea menarlo in preson. — Mateo 26:47-49.
Cavei: La Bìblia la dise che “gaver cavei longhi cava via el onor del omo”. Par quela, saria fadiga dir che Gesù el gavea i cavei longhi. — 1 Corinti 11:14.
Barba: Gesù el gavea barba. Lu el obedia ala lege dei giudei, che la disea par no taiar le bande dela barba fin rovinarla. (Levìtico 19:27; Gàlati 4:4) Anca, la Bìblia la parla sora la barba de Gesù in una professia sora quel che lu el ndaria sofrir. — Isaia 50:6.
Corpo: Le informassion che ghemo le ne mostra che Gesù l’era un omo forte. Nela so predicassion, el ga viaià tanto a pié. (Mateo 9:35) In due volte, lu l’è ndà fin al témpio e el ga rabaltà le tole de quei che i fea comèrsio lì. Nantra volta, lu el ga parà via con una scùria de soghe le bèstie che i comersianti i vendea nel témpio. (Luca 19:45, 46; Gioani 2:14, 15) Una ensiclopèdia a la dise: “Tuta la stòria dei Vangeli la mostra che Gesù l’era forte e el gavea bona salute.” — Volume IV, pàgina 884.
Spression dela fàcia: Gesù l’era amoroso e el se importea cole persone. Sicuro che se vedea questo nela so fàcia. (Mateo 11:28, 29) Tuti i tipi de persone i ndea fin lu in serca de aiuto e consolo. (Luca 5:12, 13; 7:37, 38) Fin i tosatei i ghe piasea de esser insieme de Gesù. — Mateo 19:13-15; Marco 9:35-37.
Idee sbaliade sora la aparensa de Gesù
Idea sbaliada: Arquanti i crede che Gesù el gavea la aparensa del pòpolo dela Àfrica, parché el libro de Apocalisse el compara i so cavei ala lana e i so pié al bronze. — Apocalisse 1:14, 15, Bíblia na Linguagem de Hoje.
Verità: El libro de Apocalisse “el ga mostrà queste robe de maniera simbòlica”. (Apocalisse 1:1) Quando el libro el parla dei cavei e dei pié de Gesù, lu l’è drio parlar dele qualità che lu el gavaria dopo de esser ressussità e nò dela aparensa che lu el gavea intanto che l’era qua ntela tera. Apocalisse 1:14 dise che la “testa [de Gesù] e i so cavei i era bianchi come la lana bianca, come la neve”. Qua l’è drio doperar el color e nò el tipo de cavei par far una comparassion. Questo vol dir che Gesù el ga sabedoria come quela che la vien cola età. — Apocalisse 3:14.
I pié de Gesù i ze “come rame puro, che slusa rento el forno”. (Apocalisse 1:15) Anca, se parla sora la fàcia de Gesù “come el sol che slusa con tuta la so forsa”. (Apocalisse 1:16) In tuto el mondo no ghen’è gnanca un pòpolo con questa aparensa. Alora capimo che l’è sol una maniera simbòlica de parlar, e la vol dir che, dopo de esser ressussità, Gesù l’è ndà de star ‘in luce che no se pol mia rivar’, o sia, che nissun pol vederlo. — 1 Timòteo 6:16.
Idea sbaliada: Gesù l’era fiaco.
Verità: Lu no l’era mia fiaco, Gesù l’era forte e coraioso. Par esémpio, quando le persone con arme le ze ndate ciaparlo par meterlo in preson, lu el se ga identificà con coraio. (Gioani 18:4-8) Anca, Gesù el gavaria de esser forte, parché lu l‘era marangon, che laora tanto coi brassi. — Marco 6:3.
Ma alora, parché che Gesù el ga bio de esser giutà a portar el so pal de tortura? E parché che lu l’è morto vanti de quei altri che i era dela so banda? (Luca 23:26; Gioani 19:31-33) Poco vanti de esser copà, Gesù l’era fiaco e pien de magagne. Par via de tante preocupassion, lu l’è stà tuta la note sensa dormir. (Luca 22:42-44) In quela note, lu l’è stà maltratà par i giudei e, nela matina dopo, Gesù l’è stà torturà par i romani. (Mateo 26:67, 68; Gioani 19:1-3) Par quela che lu l’è morto pi svelto.
Idea sbaliada: Gesù l’era sempre triste e sèrio.
Verità: Gesù el ga mostrà de maniera perfeta le medèsime qualità del so Pare, Geovà, che la Bìblia la ciama de “el Dio felice”. (1 Timòteo 1:11; Gioani 14:9) Infati, Gesù el ga insegnà cossa che le persone le ga de far par esser felice. (Mateo 5:3-9; Luca 11:28) Questo el mostra che Gesù l’era una persona felice, e se podea veder questo nela so fàcia.
a Tìtolo dela ensiclopèdia: Cyclopedia of Biblical, Theological, and Ecclesiastical Literature, de McClintock e Strong.
Te piaserà de veder anca questo
LE VERITÀ IMPORTANTE DELA BÌBLIA
La Bìblia la è de orìgine divina?
Se Dio l’è el Autor dela Bìblia, ela la ga de esser un libro difarente de tuti i altri.
CHI SEMO
Domanda una vìsita
Cata la risposta dele to domande nela Bìblia e cognossi de pi sora le Testimònie de Geovà.