Cossa che la Bìblia la dise sora le pandemie?

SONAR

La risposta dela Bìblia

La Bìblia la dise che nei ùltimi giorni ghen saria brute malatie che le ndaria spaliarse par tuti i posti, come le pandemie. (Luca 21:11) Queste malatie no le ze un castigo de Dio. In verità, Dio el finirà fora con tute le malatie e pandemie par meso del so Regno.

Sarà che la Bìblia la parla sora le pandemie?

Nela Bìblia no catemo el nome de malatie che ghen saria come el COVID-19, la AIDS, o la gripe spagnola. Ma la parla sora “brute malatie” e “praghe che copa.” (Luca 21:11; Apocalisse 6:8) La Bìblia la dise che queste brute robe le ndaria suceder “nei ùltimi giorni”, o nel “fin del sistema de cose”. — 2 Timòteo 3:1; Mateo 24:3.

Sarà che le malatie le ze un castigo de Dio?

La Bìblia la parla che in qualche situassion Dio el ga doperà una malatia par castigar una persona. Par esémpio, el ga fato qualche persona gaver lepra. (Nùmeri 12:1-16; 2 Rè 5:20-27; 2 Cróniche 26:16-21) Ma l’è stà sol questa persona che ga ciapà questa malatia. In verità, queste malatie le ze state un castigo de Dio sol par queste persone che le gavea fato qualcossa de sbalià.

Sarà che le pandemie de ancoi le ze un castigo de Dio?

Nò. Tante persone le dise che Dio el dopera malatie e pandemie par castigar le persone. Ma no l’è quel che la Bìblia la insegna.

Par esémpio, tante persone fedele a Dio, sia de ancoi o del passà, le ga sofrio par via dele malatie. Una de queste persone l’è stà Timòteo, che el gavea un problema de salute. (1 Timòteo 5:23) Ma la Bìblia no la dise che l’era un castigo de Dio. Ancoi anca tanti servi fedeli de Dio i se contamina e i resta maladi. Ma tante volte questo sucede parché la persona la ze nel posto sbalià, nela ora sbaliada. — Eclesiasti 9:11.

Anca, la Bìblia la insegna che no l’è rivà la ora de Dio castigar le persone rugne. In verità, adesso semo drio viver nel “giorno de salvassion” o sia, ancoi Dio l’è drio dar la oportunità par le persone cognosserlo e gaver la salvassion. (2 Corinti 6:2) Questa oportunità la vien par meso dela predicassion dele “bone notìssie del Regno” che le ze predicade in tuto el mondo. — Mateo 24:14.

Sarà che le pandemie le ndarà finirse?

Si. La Bìblia la parla che nel futuro no ghen sarà pi malatie. Suito, el Regno de Dio ndarà risolver tuti i problemi de salute. (Isaia 33:24; 35:5, 6) Dio el ndarà finir col sofrimento, el dolor e la morte. (Apocalisse 21:4) Anca el ndarà ressussitar le persone che le ze morte par viver qua nela Tera con salute perfeta. — Salmo 37:29; Ati 24:15.

Testi dela Bìblia che i parla dele malatie

Mateo 4:23: “[Gesù] l’è ndato par tuta la Galilea par insegnarghe ale persone nele so sinagoghe, par predicar le bone notìssie del Regno e par guarir tuti i tipi de malatie e tuti i tipi de magagne.”

Cossa questo testo el vol dir: I miràcoli de Gesù i ze stati un pìcolo esémpio de quel che suito el Regno de Dio el farà par tute le persone.

Luca 21:11: “Ghen sarà . . . brute malatie.”

Cossa questo testo el vol dir: Pandemie e malatie le fà parte de quel che ndaria suceder nei ùltimi giorni.

Apocalisse 6:8: “E go visto un caval sensa color; e el so cavaliero l’era ciamà de Morte. E el Sepolcro el ndea de drio ben darente. E i ga ricevesto autorità sora la quarta parte dela tera, par copar . . . cole praghe.”

Cossa questo testo el vol dir: La professia dei quatro cavalieri del Apocalisse la mostra che ghen saria pandemie nei nostri giorni.