La Bìblia la ciama Gesù de “el Fiol de Dio” tante volte. (Gioani 1:49) La spression “Fiol de Dio” la ne fà capir che Geovà l’è el Creador, la Fonte de tuta la vita, e questo el ne fà capir che el ga creà anca Gesù. (Salmo 36:9; Apocalisse 4:11) La Bìblia no la dise che Dio el ga bio fioi dela medèsima maniera che i òmini li ga.

 La Bìblia la dise anca che i àngeli i ze “fioi del vero Dio”. (Giò 1:6) E la Bìblia la dise che el primo omo, Adon, l’era “fiol de Dio”. (Luca 3:38) Ma la Bìblia la dise che Gesù l’è el fiol pi importante de Dio parché l’è stà el primo creà e el ùnico che Dio pròpio el ga creà.

•  Gesù l’è vivesto ntel cielo vanti de nasser ntela Tera?

•  Cossa che Gesù el fea ntel cielo prima de vegner do ntela Tera?

 Si. Gesù l’era una creatura spiritual ntel cielo vanti de nasser come omo ntela Tera. Gesù el ga dito: “Mi son vegnesto do del cielo.” — Gioani 6:38; 8:23.

 Dio el ga creà Gesù vanti de tute le altre robe. Varda cossa che la Bìblia la dise sora Gesù:

•   “Lu l’è . . . el primogénito de tuta la creassion.” — Colossensi 1:15.

•   Lu l’è “el scomìnsio dela creassion de Dio.” — Apocalisse 3:14.

 Gesù el ga realisà la professia che la parlea che “lu l’è dei tempi antighi, de tanto tempo indrio.” — Michea 5:2; Mateo 2:4-6.

 Lu el gavea un posto importante ntel cielo. Nte una orassion, Gesù el ga parlà del posto che el gavea vanti ntel cielo: “Pare, glorificame . . . cola glòria che mi gavea vanti del mondo esister.” — Gioani 17:5.

 Lu el ga giutà el so Pare a crear tuto quel che ghen’è. Gesù el ga laorà insieme de Dio come un “laorador speriente.” (Proverbi 8:30) Sora Gesù, la Bìblia la dise: “Par meso de lu tute le altre robe nei cieli e nela tera le ze state creade.” — Colossensi 1:16.

 Dio el ga doperà Gesù par crear tuto quel che ghen’è. Questo el vol dir tute le creature spirituai e anca el Universo. (Apocalisse 5:11) Par far un esémpio, podemo dir che Dio e Gesù i ga laorà insieme come i fà un architeto e un costrutor. El architeto el parecia el progeto e el costrutor lo fà su.

 Lu el ga servio come la Parola. Quando se parla dela vita de Gesù vanti de vegner ntela Tera, la Bìblia lo ciama de “la Parola.” (Gioani 1:1) Questo el vol dir che Dio lo doperea par portar informassion e istrussion a altre creature spirituai.

 Par che Gesù l’è stà anca doperà come messagero de Dio par i òmini. Quando Geovà el parlea con Adon e Eva ntel giardin del Eden, pol esser che el doperea Gesù come la Parola. (Génesi 2:16, 17) E par che sìpia Gesù el àngelo che el ga guidà i israeliti quando i ga traversà el deserto e che fusse anca la so voce che i israeliti i gavea de obedir. — Ésodo 23:20-23. a