Gesù l’è morto parché le persone le gavesse la oportunità de esser perdonade dei so pecati e ricever la vita eterna. (Romani 6:23; Efesi 1:7) La morte de Gesù la ga provà che una persona la pol esser fedele a Dio anca se la infronta brute provassion. — Ebrei 4:15.

 Varda come la morte de un sol omo la ze stata bona de far tute queste robe.

1.   Gesù l’è morto par “el perdon dei nostri pecati”. — Colossensi 1:14.

    El primo omo Adon, l’è stà creà perfeto, no’l gavea pecati. Ma lu el ga scoliesto desobedir a Dio. La desobediensa o pecato de Adon, ga portà pregiudìssio ala vita dei so dissendenti. La Bìblia la parla che “par meso dela desobediensa de un sol omo tanti i ze deventadi pecadori”. — Romani 5:19.

    Gesù anca l’era perfeto, ma lu mai el ga pecà. Par quela, lu el podea esser “un sacrifìssio de riconsiliassion par i nostri pecati”. (1 Gioani 2:2; nota in portoghese) Cossita come la desobediensa de Adon la ga contaminà tute le persone col pecato, la morte de Gesù la ga tirà via la màcia del pecato de tuti quei che i ga fede in lu.

    Se pol dir che Adon el ga vendesto le persone al pecato. Gesù l’è morto de volentiera par tuti noantri e cossita el ga comprà in drio le persone par lu. Par quela, “se qualchedun el fà un pecato, noantri ghemo un che el ne giuta, che l’è insieme al Pare: Gesù Cristo, un giusto”. — 1 Gioani 2:1.

2.   Gesù l’è morto par che “tuti quei che i dimostra fede in lu no i sìpia destruti, ma i possa viver par sempre”. — Gioani 3:16.

    Adon l’è stà creà par viver par sempre, ma el pecato che el ga fato ga bio come risultado la morte. Par meso de Adon, “el pecato l’è vegnesto al mondo, e la morte par meso del pecato, cossita la morte la se ga spalià a tuti, parché tuti i gavea pecà.” — Romani 5:12.

    Par nantra banda, la morte de Gesù nò sol la ga tirà via la màcia del pecato, ma anca la ga cavà via la sentensa de morte par tuti quei che i ga fede in lu. Quel che la Bìblia la dise ne giuta a capir ben: “Parché come el pecato e la morte i ga governà, cossita anca la maraveiosa bontà la governe par meso dela giustìssia e la menesse le persone ala vita eterna par meso de Gesù Cristo, nostro Signor.” — Romani 5:21.

    L’è vera che ancoi le persone no le vive tanto tempo. Ma Dio el promete che el darà la vita eterna ale persone giuste e el ressussitarà i morti, cossita anca lori i sarà benefissiadi par la morte e el sacrifìssio de Gesù. — Salmo 37:29; 1 Corinti 15:22.

3.   Gesù “l’è restà obediente fin ala morte”, cossita el ga provà che una persona la pol esser fedele a Dio stesso che la ze drio passar par provassion o dificoltà. — Filipensi 2:8.

    Anca se el gavea la mente e el corpo perfeti, Adon l’è stà egoista e el ga desobedio a Dio parché el ga volesto gaver una roba che no’l gavea dirito. (Génesi 2:16, 17; 3:6) Pi tardi, Sàtana, che l’è el pi grando nemigo de Dio, el ga dito che gnanca una persona la ndaria obedir a Dio, sol se fusse par interesse o se la so vita la fusse in rìscio. (Giò 2:4) Ma Gesù, un omo perfeto, el ga obedio a Dio e el ga seità a esser leal, anca se l’era drio sofrir una bruta e vergognosa morte. (Ebrei 7:26) Questo ga risolvesto del tuto la question: Una persona la pol esser fedele a Dio no vol mia dir la provassion o dificoltà che la ze drio passar.

Domande sora la morte de Gesù

•   Parché Gesù el gavea de sofrir e morir par salvar le persone? Parché che Dio no’l ga mia anulà la sentensa de morte?

   La lege de Dio la dise che “el salàrio che el pecato el paga l’è la morte”. (Romani 6:23) Invesse de no parlar gnente de questa lege con Adon, Dio el ga dito a Adon che el castigo par el pecato saria la morte. (Génesi 3:3) Quando Adon el ga pecà, Dio el ga mantegnesto la so parola parché “lu no’l pol dir busie”. (Tito 1:2) Adon el ga passà par i so dissendenti el pecato e el risultà: la morte.

   Anca se le persone le mèrita morir par via del so pecato, Dio el ga mostrà a lore la so “maraveiosa bontà”. (Efesi 1:7) Lu el ga risgatà la umanità quando el ga mandà Gesù come sacrifìssio perfeto, cossita Dio el ga mostrà la so granda giustìssia e anca la so granda misericòrdia.

•   Quando Gesù l’è morto?

   Gesù l’è morto nela “nona ora” dopo che el sol l’è nassesto, o sia, ale “tre dopo mesdì” nel giorno dela Pàscoa dei giudei. (Marco 15:33-37, nota in portoghese) De acordo col calendàrio de ancoi questo giorno l’è vendre, 1 de april del ano 33.

•   Ndove che Gesù l’è morto?

   Gesù l’è morto nte un posto ciamà “Posto dela Cavera, che in ebraico l’è Gòlgota”. (Gioani 19:17, 18) Nel tempo de Gesù, questo posto l’era fora del porton dela cità de Gerusalen. (Ebrei 13:12) Questo posto l’era su nte un monte, parché la Bìblia la dise che arquanti i vardea de distante Gesù drio esser morto. (Marco 15:40) Ma no semo pròpio sicuri de ndove che l’è questo posto.

•   Come che Gesù l’è morto?

   Tanti i pensa che Gesù l’è stà morto nte una crose o l’è stà crossificà. Ma la Bìblia la dise che Gesù “lu pròpio el ga portà i nostri pecati nel so corpo, nel legno”. (1 Piero 2:24) Òmini che i ga scrito la Bìblia i ga doperà due parole greche par parlar de ndove che Gesù l’è stà metesto par morir: stauròs e xýlon. Tanti peschisadori i dise che queste parole le vol dir un pal o un palanco in pié, fato de un sol toco de legno.

•   Come ghemo de ricordar la morte de Gesù?

   Nela note quando Gesù el ga ricordà la Pàscoa dei giudei, che la era fata una volta al ano, lu el ga fato una selebrassion sémplisse e el ga dito ai so dissìpoli: “Seité a far questo in ricordo de mi.” (1 Corinti 11:24) Poche ore dopo, Gesù l’è morto.

   I òmini che i ga scrito la Bìblia i ga fato una comparassion intrà Gesù e el piegoreto che l’era sacrificà nela Pàscoa. (1 Corinti 5:7) Cossita come la Pàscoa la ricordea ai israeliti che i era stati libertadi de esser schiavi, la Selebrassion dela morte de Gesù la ricorda ai cristiani che lori i ze stati libertadi del pecato e dela morte. La Pàscoa che la era fata nel 14 de Nisan, de acordo col calendàrio dela luna, la ze una selebrassion che la ze fata una volta al ano; par quela i cristiani anca i fà questa Selebrassion una volta al ano.

   Tuti i ani, nel giorno 14 de Nisan de acordo col calendàrio de ancoi, milione de persone in tuto el mondo le selebra la morte de Gesù.