Silempwale ni Luka 1:1-80
-
Masu oopatxera aalepelinwaawe Teofilo (1-4)
-
Oyariwa wa Yohani Mpatisa onnahimmwa ni Gabriyeli (5-25)
-
Oyariwa wa Yesu onnahimmwa ni Gabriyeli (26-38)
-
Maria onnamuxekura Elizabeti (39-45)
-
Maria onnanvuwiha Yehova (46-56)
-
Yohani onnayariwa ni onnavahiwa nsina nawe (57-66)
-
Eprofesiya ya Zakariya (67-80)
1 Atthu antxipale ahiilipihera othola-thola ni olepa sooweereya soororomeleya seiyo hiyo-tho ninroromelaahu,
2 moovarihana ni ele nleelinwaahu ni atthu ale ovinyera woopatxerani yonne* itthu iyo seereyaka ni anamalaleera amitthenka.
3 Hiiho, miyo-tho, kitholatholakaru itthu sootheene nnene sene ovinyera woopatxerani, koolakela woolepelani nyuwo Teofilo Oottittimiheya, moovarihana ni moota seereñyaaya,
4 weera muroromele ni murima anyu wootheene itthu sootheene muxuttihinwaanyu.
5 Mahiku a mwene Herodi* mwene a oYudeya, aakhala namakeya mmoha iitthaniwa Zakariya a ekhurupu ya Abiya. Amwaariye yiitthaniwa Elizabeti, yaawo yaari a nloko na Aharoni.
6 Ooweelisa, yaari a exariya vamaithoni va Muluku ni yanneetta moovarihana ni sooruma ni malamulo ootheene a Yehova.
7 Mene awosa khayaarino anamwane, mwaha wooweera Elizabeti khaayara, ni ooweelisa yaahuuluvala.
8 Zakariya eera avaraka muteko awe wa onamakeya ohoolo wa Muluku, woona weera yaari ekhurupu awe yaarowa ovara muteko.
9 Moovarihana ni yookhovelela yaanamakeya, yaaphiya ekwaha ya Zakariya yoovolowa mutemplu mwa Yehova weera ahise erupani.
10 Ewoora owo aahisaawe erupani, muloko wootheene waatthu weera oreene vaate ovekelaka.
11 Nto, naamukhumelela nlaika na Yehova, neemela moono woolopwana waaltaari aahisiwaiyevo rupani.
12 Nto Zakariya oonakaru nlaika nne, aavalavela ni annoova vantxipale.
13 Nto nlaika naamweerela: “Muhoove Zakariya, mwaha wooweera mavekelo anyu ahiiwiwa, ni amwaarinyu Elizabeti, enimooyarelani mwaana, ni mwaana owo munvahe nsina na Yohani.
14 Nyuwo munoohakalala ni otteeliwa murima vantxipale, ni atthu antxipale enoohakalala mwaha wa oyariwa wa mwaana owo,
15 woona weera owo onrowa okhala mutokweene vamaithoni va Yehova. Owo khawuraka eviinyu naari etthu yoohapala eri poothe, owo onoosareya munepa wootteela wa Muluku, naari ahinaaye oyariwa,*
16 ni onimwaakhavihera ana a Israeli antxipale otthikela wa Yehova Muluku aya.
17 Nave-tho owo, onoorummwa ohoolo wa Muluku areene ni ikuru ntoko sa Eliya, weera eerihe mirima sa asitiithi otthikela wa anamwane aya, weera aweerihe atthu oohiiwelela otthikela miruku soovareleya muteko sa anaxariya, nave-tho onimwaakhavihera atthu ovarela muteko miruku sa Yehova.”
18 Zakariya aaheerela ha nlaika nne: “Kinaaroromele moota heeni eyo munkileelaanyu? Koonaka weera miyo kohuuluvala ni amwaaraka aatepa wuuluvala.”
19 Nlaika nne waakhula nenre: “Miyo Gabriyeli, ni kinkhala ohoolo wa Muluku; kirummwale weera kuulume ni nyuwo ni wooleelani mitthenka iya sooreera.
20 Okhala weera khamuroromenle masu aka, yaawo enaakwaniheriwe etempu ethanlelinwaaya, nyuwo khamunkela oweraka wuuluma mpaka nihiku nenno sinrowaaya weereya itthu iya.”
21 Yaamweereyaru eyo, muloko waatthu weera onwehereraka Zakariya, ni waatikhiniheya mwaha wa heeni owo aapisaawe mutemplu,* nipuro nootteela.
22 Akhumakaru, owo khaawera wuuluma naawo, ni awo yaahoonelela weera aahoona etthu ya miiriira Mpaani mwa Muluku. Owo aavirelela ohuuluma mene uuluma ni matata.
23 Emalakaru mahiku a muteko awe, aatthikela owaani.
24 Evirakaru mahiku vakhaaniini, Elizabeti mwaariye Zakariya aarupala ni aahiisiipithiha mpuwa mwa minyeeri sinku, ni owo anneera:
25 “Ti hiiha Yehova okeerenlaawe mahiku ala. Ookuupuwelela miyo, avinxaka wuuliwa waka muru vamaithoni va atthu.”
26 Mweeri wa na 6 Elizabeti arupanleene, Muluku aarumiha nlaika Gabriyeli esidade emoha ya oGalileya, yiitthaniwa oNazareti,
27 wa mwali mmoha oohipatxeriwa* aattomerinwe ni mulopwana mmoha iitthaniwa Yosefe, yoowo aari a nloko na Davidi, nsina na mwali owo, neeriwa Maria.
28 Avolowakaru mpaani aaraawemo Maria, nlaika nne naamweerela ha: “Ooreelihiwa ti nyuwo, Yehova ori ni nyuwo!”
29 Mene owo aatikhiniheya vantxipale atthunaka osuwela etthu yaataphulelaaya masu ale.
30 Nto nlaika naamweerela: “Muhoove Maria, woona weera Muluku ohooreelihani.
31 Vano, nyuwo munoorupala ni munoomuyara mwaana mwaamulopwana ni munvahe nsina na Yesu Mwaana owo.
32 Owo onrowa okhala mutokweene, ni aniitthaniwe Mwaana a Muluku Mutokweene, ni Yehova Muluku ononvaha ehitxe ya Davidi, atiithi awe,
33 owo anaalamulele ntoko Mwene a empa ya Yakobe wa mahiku ootheene, ni Omwene awe khonkela omala.”
34 Maria aakoha nlaika: “Enkela weereya moota heeni eyo, kihitonko okona ni mulopwana?”
35 Nlaika naamwaakhula neeraka: “Munepa wootteela onookhala ni nyuwo, ni owera wa Muluku Mutokweene onimookosoopani. Tivanto, mwaana munkelaanyu omuyara anaakhale oowera ni onrowa wiitthaniwa Mwaana a Muluku.
36 Ni musuwele weera mmusi anyu Elizabeti, yoowo oneeriwa khañyara onoomuyara mwaana, nnaamweera uuluvanleene, ni ola mweeri awe wa na 6 arupanleene;
37 woona weera khayaavo masu a Muluku, enootxeela okwanela.”
38 Maria aamwaakhula: “Miyo kaporo a Yehova! Yeereye ni miyo moovarihana ni masu anyu.” Moowi hiiho, nlaika naakhuma ohoolo wawe.
39 Mahiku ene yaale, Maria aakhuma moowaakuveya akelaka mittetthe saari minyaako esidade ya oYuda,
40 ni aaphiya owannyawe Zakariya, anamuulumiha Elizabeti.
41 Elizabeti iiwakaru esalaama ya Maria, mwaana aattikinyeya mmirimani mwawe ni Elizabeti aasareya munepa wootteela
42 ni aahuuluma ni masu ookhuwela eeraka: “Ooreelihiwa ti nyuwo variyari va asithiyana ni ooreelihiwa mwaana ori mmirimani mwanyu!
43 Ni ela eparakha etokweene miyo oxekuriwa ni ameyaya Apwiya aka.
44 Vano, kimwiiwakaru salaama anyu, mwaana ori mmirimani mwaka ohiittikinya mwaha woohakalala.
45 Oohakalala ti nyuwo muroromenle, mwaha wooweera itthu muleelinwaanyu ni Yehova sinokwanela moohihovela.”
46 Vano Maria aaheera: “Miyo* kinnanvuwiha Yehova,
47 ni miyo kinnatteeliwa murima vantxipale ni Muluku Nvuluxaaka,
48 mwaha wooweera owo ohoona ohaawa wa kaporo awe. Okhuma viinaano, maloko ootheene enkela okihimaka okhala oohakalala,
49 mwaha wooweera Muluku a Ikuru ookipakela miyo itthu itokotoko ni nsina nawe ti nootteela,
50 ni etempu yootheene, owo onnaamorela ikharari ale emmoova.
51 Owo oovarela muteko ikuru sawe weera apake itthu itokotoko, ni ohaamwara ale eri ni murima woowiisoona.
52 Ohaakuruxa atthu oowera veehitxeni, anaaweliha atthu oowiiyeviha;
53 ohaavoniha ni itthu sooreera atthu oovoliwa etala, ni oowoomola matataru atthu yaarino muhakhu.
54 Uupuwelelaka omoriwa wawe ikharari, owo owiiye omukhavihera Israeli kaporo awe
55 mwaha wa Abrahamu ni osuulu awe,* ntoko aalaihenraawe makholo ahu.”
56 Maria aakhala ni Elizabeti minyeeri 3, avinyaka aatthikela owannyawe.
57 Vano, ephiyakaru etempu ya Elizabeti oyara, owo aamuyara mwaana mwaamulopwana.
58 Mavisiinyu vamoha ni amusi awe ootheene yiiwakaru weera Yehova ammorela ikharari, awosa yaahakalala vamoha ni Elizabeti.
59 Nihiku na na 8 yaarowa omwiinela mwaana ni yaatthuna onvaha nsina nooweera Zakariya, nsina na apapawe.
60 Mene ameyawe yaaheera: “Hooye, owo iitthaniweke Yohani.”
61 Mwaha wa yeeyo, atthu yaaheera: “Khaavo mmusi anyu okhanleno nsina nno.”
62 Vano atthu ale evarelaka muteko matata, yaahaakoha apapawe woohima sa nsina heeni awo yaatthunaaya weera iitthaneliweke mwanaya.
63 Zakariya aavekela etthaapwa ekhaanini analepa: “Nsina nawe Yohani.” Mwaha wa yeeyo, atthu ootheene yaatikhiniheya.
64 Etempu ene yeele, eyano awe yaahuleya ni nlumi nawe naataphuwa anapatxera wuuluma anvuwihaka Muluku.
65 Mavisiinyu ootheene yaakhala muttetthe ole yaahoova, ni atthu yaapatxera wuuluma woohima sa itthu iye sereñye, muttetthe wootheene wa oYudeya.*
66 Atthu ootheene yiiwale ele, yannuupuwelela yiikohaka ha: “Mwaana ene yoola onrowa okhala taani?” Mweekhaikhai, wannooneya weera owera wa Yehova waari ni mwaana owo.
67 Mene Zakariya apapawe mwaana ole, yaasareya munepa wootteela enaprofetisari yeeraka:
68 “Avuwihiwe Yehova Muluku ana a Israeli, woona weera ohaamorela ikharari ni ohaavuluxa atthu awe,
69 ni owo oonikumihera nvuluxa oowera,* a nloko na Davidi kaporo awe.
70 Hiiho ntoko uulummaawe moorweela mwa maprofeta awe akhalayi,
71 weera anivuluxe mmatatani mwa amwiittani ahu ni ale anniitta,
72 weera anoonihere omoriwa ikharari aalaihenraawe makholo ahu akhalayi ni weera uupuwelele nivarihano nawe nootteela,
73 aani, nivarihano nenno amulipelenlaawe Abrahamu, nikholo nahu nakhalayi,
74 weera anaakhulele onvarela muteko nihoovaka etthu, nivuluxiwakaru mmatatani mwa amwiittani ahu.
75 Moororomeleya ni exariya vamaithoni vawe mahiku ahu ootheene.
76 Mene woohima sa nyuwo mwanaka, munrowa wiitthaniwa profeta a Muluku Mutokweene, woona weera munrowa orumihiwa ohoolo wa Yehova weera mureherere iphiro sawe,
77 weera aasuwelihe atthu awe ovuluxa moorweela mwa oleveleliwa soottheka saya,
78 mwaha wa omoriwa ikharari wa Muluku ahu, ni mwaha wa omoriwa ikharari iwo, Muluku onoonimwaleela ntoko nsuwa ninkhuma oxeexelo,
79 weera aavahe waara atthu ekilanthi vapiphini ni vamuuttusini va okhwa, ni weera aneettihe mphironi mwa murettele.
80 Menento mwaana ole, aahunnuwa ni aasareya munepa wootteela. Ni aavirelela okhala onikareni* mpaka nihiku nenno iisooneihalaawe wa a Israeli.
Footnotes
^ Naari: “ehelenle onamoona.”
^ Naari: “areene mmirimani.”
^ Naari: “Mpaani mwa Muluku.”
^ Naari: “ohitonko okona ni mulopwana.”
^ Naari: “ekumi aka.” Nwehe masu oowiiwanyeihiwa.
^ Ni eKereku: “eso.”
^ Naari: “mittetthe sootheene sa minyaako sa oYudeya.”
^ Ni eKereku: “nnyaka noovuluxa.” Nwehe masu oowiiwanyeihiwa.
