Silempwale ni Matheyo 15:1-39
15 Vano, afarisi akina ni alipa oolepa ekhumaka oYerusalemu, yaamwaattamela Yesu, enamukoha ha:
2 “Mwaha wa heeni atthareli anyu ehinttharaaya malamulo a makholo akhalayi? Mwa ntakihero, khennyawa matata yaarowaka otxa.”
3 Owaakhula enre ha: “Mwaha wa heeni nyuwo muntuphaanyu nlamulo na Muluku, mwaha wootthara sookhovelela sanyu?
4 Mwa ntakihero, Muluku enre: ‘Mwaattittimihe apapinyu ni ameyanyu’ ni ‘Ole onrowa waaveeha apapawe naari ameyawe, iiviwe.’
5 Mene nyuwo ohima muneera ha: ‘Ole onkela oweerela apapawe naari ameyawe: “Itthu sootheene kiraakano keeraaka koovaheeni, yoovaha kinkelaaka onvaha Muluku”,
6 mutthu owo khantthuneya waattittimiha apapawe.’ Mapakelo anyu itthu moota ola, onneeriha masu a Muluku ohikhala mwiitti mwaha wa sookhovelela sanyu.
7 Anamootha! Yesaya aaprofetisanri oohimakani nyeenyu enexa vaavo enraawe:
8 ‘Muloko ola onkittittimiha ni eyano paahi, mene mirima saya siri ottayi weene ni miyo.
9 Enkikokhorela vasiiyoni vene mwaha wooweera enxuttiha malamulo aatthu.’”
10 Eerakaru hiihaale, aahiitthana muloko waatthu weera omwaattamele ni aaweerela: “Mwiiwe ni mwiiwexexe etthu entaphulelaaya etthu ela:
11 Khaiyene etthu envolowa mmwaano emmunanariha mutthu, mene ele enkhuma mmwaano temmunanariha mutthu.”
12 Vano, atthareli awe yaahoowa enamweerela: “Moosuwela weera afarisi aakwattuleya* yiiwakaru ele muulummaanyu?”
13 Owo aawaakhula eeraka: “Mwiri wootheene Atiithi aka a wiirimu ehanlaaya onoopheliwa.
14 Muhaapwatthe awo. Awo enaahoolela alipa oohoona, awo tho ehoonaka. Wakhala weera mutthu oohoona onnamweettiha mutthu mukina oohoona, ooweeli aya enoomorela mulittini.”
15 Pedru aahaakhula eeraka: “Munleele etthu entaphulelaaya niphwanaphwaniho nna.”
16 Nto Yesu aaweerela: “Neereke nyuwo tho khamuniiwexexa nlelo?
17 Khamunsuwela weera itthu sootheene sinvolowa mmwaano sinkela mmirimani,* avinyaka sinariheliwa olatiriina?
18 Itthu sootheene sinkhuma mmwaano, sinkhuma vamurimani ni itthu sene tiseiya simmunanariha mutthu.
19 Mwa ntakihero, vamurimani sinnakhuma minyuupuwelo soonanara ntoko iya: wiiva, oraruwa, okonihana woohireerela,* wiiya, onamoona woowootha, onveeha Muluku.
20 Iya itthu simmunanariha mutthu, ohikhanle otxa ohinyaanwe matata, khommunanariha mutthu.”
21 Akhumakaru nipuro nne, Yesu aarowa muttetthe wa oTiro ni oSidoni.
22 Ni muthiyana mmoha a oFenisia aakhala muttetthe ene yoole, aamwaattamela ni aakhuwela: “Pwiya mwaana a Davidi mukimorele ikharari. Mwanaka mwaamuthiyana orookhalano munepa woonanara ni onnamuhasula.”
23 Mene Yesu, khaamwaakhunle etthu, tivawonto atthareli awe yaahoowa enanvekela yeeraka: “Pwiya, mmoomole muthiyana ola mwaha wooweera onnavirelela okhuwela anittharaka ottuli.”
24 Owo aamwaakhula: “Kirummwale waasaasa paahi iputtiputthi sooriheya sa empa ya ana a Israeli.”
25 Muthiyana ole aahoowa anakokhora ohoolo wa Yesu, eeraka: “Pwiya, mukikhavihere!”
26 Yesu omwaakhula enre: “Khavanreera okuxa epaawu ya anamwane waavaha axaana aalapwa.”
27 Omwaakhula enre: “Ekhaikhai eyo munhimaanyu Apwiya, mene axaana aalapwa entxa inyenyeeri simmora vasulu vameesa asineene vaate entxaaya.”
28 Yesu omwaakhula enre: “Muthiyana, nroromelo naa ntokweene! Eweereeleni moovarihana ni ele muntthuna anyu.” Ewoora ene yeele mwanawe aalama.
29 Avinyaka, Yesu aakhuma anarowa waattamela ephareya ya oGalileya, avinyaka aawela vamwaako anakilaathi.
30 Nto, muloko mutokotoko waatthu waamwaattamela, emuroihelaka alipa oorakala, ootuthunya, oohoona, oohuuluma, ni aretta antxipale. Aretta awo, yannaataleliwa ohoolo* wa Yesu ni owo annaalamiha.
31 Tivanto, muloko waatthu, waatikhiniheya vantxipale mwaha woowoona atthu oohuuluma yuulumaka, ootuthunya elamihinweene, oorakala yeettaka nnene ni oohoona yoonaka nnene ni atthu awo, yaanvuwiha Muluku a ana a Israeli.
32 Yesu aawiitthana atthareli awe ni aaweerela: “Ennakimoriha ikharari atthu ala mwaha wooweera aaviriha mahiku mararu ereene ni miyo ni khiyaano yootxa. Miyo nkintthuna waamwara atthu ala evolinweene etala, mwaha wooweera awo pooti okomoka mmuseweni.”
33 Atthareli awe yaamukoha: “Nipuro nna noorakamelana mittetthe simakinwe, ninkela ophwanya woowiini ipaawu eneeraaya etxe atthu ala mpaka ovona?”
34 Nto Yesu aawaakhula aakohaka ha: “Murinono ipaawu ikavi?” Waakhula yenre: “Seete ni ihopa vakhaaniini.”
35 Aarumakaru atthu okilaathi vathi,
36 aakuxa ipaawu seete ni ihopa iye, avekelakaru, aakawanya anapatxera waavaha atthareli awe ni atthareli awe yaahaavaha atthu.
37 Atthu ootheene yaahootxa mpaka ovona ni yaattottela iye saatxinwe ihala mpaka osara mittanka seete.
38 Atthu yaatxiiye yaari 4.000 alopwanaru paahi, nihaakontariki athiyana ni anamwane.
39 Yesu aamwarakaru atthu, anwela paarku anarowa muttetthe wa oMagadani.
Footnotes
^ Naari: “khiyaasivenle.”
^ Naari: “munipwiipwini.”
^ Ni eKereku: “porneía.” Nwehe masu oowiiwanyeihiwa.
^ Ni eKereku: “mmettoni.”
