Silempwale ni Matheyo 6:1-34
-
MWAHA YESU AAPANKAAWE VAMWAAKO (1-34)
6 “Mwiikosoope weera muhipakeke miteko sooreera vamaithoni va atthu ni yootthuna weera mooniwe naawo; wakhala weera munoopaka eyo, Atiithi anyu eri wiirimu khanootthuvelani.
2 Vano, wakhala weera monvaha etthu mutthu oohaawa, muhilaleye,* ntoko hiihaale eneeraaya anamootha yanvaha vale mutthu etthu enalaleya musinakooka* ni mphironi ni yootthuna weera ettottopeliwe ni atthu. Kinnooleelani ekhaikhai weera: awo ahaakhela ntthuvelo naya vaavo.
3 Vano, nyuwo mwanvaha vale etthu mutthu oohaawa, muhihiye ntata nanyu noothiyana nsuwelaka ele ntata noolopwana nipankaaya,
4 weera soovaha sanyu sihisuweliwe ni atthu. Mene Atiithi anyu eri wiirimu enoona itthu sootheene, enimootthuvelani.
5 “Nyuwo mwaavekelaka vale, muhivekeleke ntoko eneeraayano anamootha, awosa waasivela ovekela yeemenleene musinakooka ni mapuro oowaattiwa weera yooniwe ni atthu. Kinnooleelani ekhaikhai: Awosa ahaakhela ntthuvelo naya vaavo.
6 Menento, mwaavekelaka vale, nvoloweke mpaani,* mwawala vale mulako mwaavekeleke Atiithi anyu ehinooneya, mene Atiithi anyu eri wiirimu enoona itthu sootheene enimootthuvelani.
7 Mwaavekelaka vale, muhihimeke masu mamoha-moharu ikwaha sootheene ntoko eneeraya atthu amulaponi. Awo enuupuwela weera mwaha wootthikela masu mamoha-moharu, Muluku onimwiiwa mavekelo aya.
8 Muhaatakiheke awo, mwaha wooweera Atiithi anyu ennasuwela ele munhaawelaanyu, muhinaayeru waavekela.
9 “Vano, nyuwo nvekeleke ha:
“‘Tiithi muri wiirimu, nsina nanyu ntteelihiwe.
10 Omwene anyu owe. Yeereye yootthuna anyu elapo ela ya vathi, ntoko yeereñyaaya wiirimu.
11 Munivahe yootxa* ya nihiku noolelo.
12 Munlevelele soottheka sahu, ntoko hiihaale hiyo nnaalevelelaahu ale ennitthekela.
13 Muhinihiye mooweereriwani, mene munivuluxe mmatatani mwa Mutakhali.’
14 “Vano, wakhala weera nyuwo munnalevelela soottheka sa atthu akina, Atiithi anyu tho eri wiirimu, enoolevelela soottheka sanyu;
15 nto, wakhala weera khamunaalevelela atthu enootthekelani, Atiithi anyu eri wiirimu, khenkela woolevelelani soottheka sanyu.
16 “Mwamutthuka vale ramasaani, owiitho wanyu ohoonihereke oriipiwa murima ntoko eneeraaya anamootha, awosa yamutthuka vale ramasaani ennatxentxa owiitho weera yooniweke weera aamutthuka. Kinnooleelani ekhaikhai: Awo ahaakhela ntthuvelo naya vaavo.
17 Mene nyuwo mwamutthuka vale ramasaani, musuusuleke owiitho ni musoleke makhura mmuru,
18 weera atthu ehisuwele weera moomutthuka, nto esuwele paahi Atiithi anyu weera moomutthuka. Mene Atiithi anyu a wiirimu enoona itthu sootheene, enimootthuvelani.
19 “Muhiye wiithukumanyera mihakhu elapo ela ya vathi, vaava atthumpwiha ni murawa sinnanarihaaya itthu ni vaava anamwiiya envoleelaaya eniiya.
20 Ohiya othukumanya muhakhu elapo ela ya vathi, mwiithukumanyereke mihakhu wiirimu, weiwo atthumpwiha ni murawa ehikhanlaayawo ni weiwo anamwiiya ehinvoleelaaya itthu weera yiiye.
21 Nto, vaavo ori muhakhu anyu tonrowaayavo okhalavo murima anyu.
22 “Muthuko wa erutthu anyu niitho, tivanto, wakhala weera maitho anyu ennaweha itthu sooreera, erutthu anyu enimweetta nnene.*
23 Mene wakhala weera niitho nanyu noosareya nrima, erutthu anyu yootheene enrowa osareya epiphi, nto wakhala weera murinono epiphi ohiya waara, epiphi muraanyuno etokotoko.
24 “Muhikhale namuteko amapatarawu meeli; mwaha wooweera munaamwiitteke mmoha ni mmusiveleke mukina. Nyuwo khamunwera onvarela muteko Muluku ni emaara emoharu mihakhu.
25 “Tivanto, kinooleelakani weera: Muhixupeyeke ni ekumi anyu woohima sa eheeni munkelaanyu otxa naari munkelaanyu owura. Ekumi khempwaha yootxa ni erutthu khempwaha soowara?
26 Mwaawehexexe nnene apalame, awo khenhepha naari kheenaala ni khiyaanoono ntatha, mene Atiithi anyu eri wiirimu ennaatxiha. Neereke nyuwo khamukhanle ootthuneya waapwaha apalame awo?
27 Taani a nyuwo onwera waatxeerera mahiku a ekumi awe mwaha wooxupeya?
28 Mwaha wa heeni munxupeyaanyu ni ikuwo? Muxuttere etthu ni ifuloore sa mmatta moota sinunnuwaaya, iyo khasinvara muteko naari khasintthava ikuwo.
29 Mene kinnooleelani weera: Naari Salomoni yoowo moovuwani mwawe mootheene khintale owara ntoko ifuloore iya.
30 Vano, waari weera Muluku onnawariha ifuloore iya sinkhala mahiku vakhaaniini avinyaka sinahisiwa, neereke khoovahani ikuwo nyuwo atthu a nroromelo vakhaaniini?
31 Tivanto, muhixupeye mweeraka: ‘Nnaatxe eheeni?’ ‘Nnaawure eheeni?’ naari ‘Nnaaware eheeni?’
32 Menento, itthu sene ti seiya amalapo enaasaasaaya. Atiithi anyu a wiirimu aasuwela weera nyuwo munnahaawela itthu sene seiya.
33 “Tivanto, mwiilipihereke ohela Omwene wa Muluku nipuro noopatxeera ni exariya ya Muluku, mwaha wooweera mwapaka itthu iya, itthu ikina seneiya munimwaatxeereriwa.
34 Vanonto, nyuwo muhixupeyeke mwaha wa omaalo, mwaha wooweera nenne nri nihiku nookhalano sooxupa saya.
Footnotes
^ Naari: “muhoope nipalapatta.”
^ Naari: “okwaartu.”
^ Ni eKereku: “epaawu.”
^ Naari: “enimwaara.”
