1. Etthu heeni yoohakalaliha yaalelinwaaya aYuda?

 ATTHU a Yehova yaahakalala vantxipale, eyo yannooneya vamaithoni va atthu ootheene. Yehova aahakumiha ayuda yaakhala oBabilonia “moorwela wa Kiru mwene oPérsia.” Awo, yaaviriha iyaakha sintxipale ereene akaporo oBabilonia. Mwene aathaliha weera ayuda yannatthuneya otthikela elapo aya ‘weera yamutekele epewe Yahvéh Muluku a Israeli.’ (Ezra 1:1, 3) Etthu eyo yaari yootepa ohakalaliha! Okhwipi waya, ayuda yaakela otthikihera okokhorela weekhaikhai elapo aya.

2. Eheeni yaawenraaya opaka aYuda etthikelakaru oYerusalemu mpuwa mwa ehuhu vakhaanene?

² Eyaakha ya 537 ahinakuve Kristu (a.C.) egrupu yoopatxera ya ayuda yaaroihiwe oBabilonia, yaatthikela oYerusalemu ecidade yeeyo yaari ekapitaale ya omwene wa oYuda. Evinreene ehuhu vakhaani muhoolo, mwaya awo yaapatxera ovara muteko wa oteka etemplo. Yeettaka eyaakha ya 536 a.C., awo yeera emalinheene mathipelo.

3. Eheeni amwiittani a aYuda yapankaaya weera ewootxeelihe oteka aYuda?

³ Muhoolo mwaya epatxerakaru oteka etemplo, yaapatxera osonttiwa. Ebuukhu ya Ezra 4:4 eneera: “vavale muloko wa elapo wattantta okhulumuwiha ni wukhula muloko wa Yuda wera ohiteke epewe.” Mene itthu sannavirelela oxupa. Mwa eyaakha 522 a.C., aakhumelela mwene munyowani opersa, eriwa Artaxerxes. * Amwiittani a Yuda yaaphwanya ephaka mwaha wa matxentxo ale weera yeemexere muteko wooteka epewe ya oYerusalemu. (Nsal. 94:20) Mene itthu ikina awo yaamuleela mwene Artaxerxes weera aYuda yannavaanelela omurukunuwela.  (Ezra 4:11-16) Mooriipiha murima mwene ahaakhulela wootha iwe, mwa yeeyo, aakhoottiha oteka epewe. (Ezra 4:17-23) Mwaha wa yeeyo, ohakalala wootheene yaakhalannaaya atthu ale evaraka muteko wahaamalela.—Ezra 4:24.

4. Yehova aapanke eheeni weera aakhavihere aYuda yaawo yoova mwaha wa osonttiwa? (Yesaya 55:11)

⁴ Amwiittani a Yuda ni atthu yeerela empari eguvernu ya opersa, yaapaka ele yaaweraaya weera yemexere otekiwa wa epewe. Mene Yehova aatthuna weera muteko waavirelenle ni weera akwanihere yootthunaawe. (Mmusome Yesaya 55:11.) Owo aamuthanla mprofeti oolipa murima eeriwa Zakariya amooniheraka soowonihera 8 sootikiniha. Zakariya aatthuneya waaleela aYuda soowonihera iye 8 weera saalipihe. Itthu iyo saahakhavihera aYuda woona weera khawaatthuneya owoova amwiittani, mene waatthuneya ovirelela oteka epewe yeeyo Yehova aatthunaawe weera epake. Etthu ya naathanu mprofeti Zakariya oniherinwaawe, waari onyari ni miri miili sa oliveira.

5. Eheeni ninkelaahu woona mwa yoosomeene yeela?

⁵ Atthu ootheene hiyo ninnakhulumuwa ikwaha ikina, wa yeeyo, yoowoniheriwa ya Zakariya oniheriwaawe onyaari ni oliveira pooti onlipiha ntoko yaalipinhaaya ana a israeli. Yoowoonihera ela enoorowa onikhavihera ovirelela okhala oororomeleya wa Yehova ehuhu nneeraahu niviriheke maxupo oosonttiwa, matxentxo mweekumini mwahu, ni vaavo nnaakhelaahu miruku nihiniiwexexaahu nnene sene.

6. Moota heeni yoowonihera eri va Zakariya 4:1-3, yaavanhaaya olipa murima aYuda? (Nwehe elataratho ya vakaapani.)

⁶ Mmusome Zakariya 4:1-3. Yoowonihera ya onyaari ni miri miili sa oliveira, yaahavaha olipa murima aYuda weera ewine osonttiwa ni amwiittani aya. Moota heeni? Nyuwo mohoonelela weera onyaari ooniheriwaawe mprofeti Zakariya khawaatxipa malumi aya a mooro? Ni miri iya sa oliveira siitthela makhura mutixelani ni makhura awo yannavira mutuubuni mpakana ophiya mwa aluuxu ootheene 7 a onyaari. Mwa yeeyo, aluuxu a onyaari khayaatxipha. Mprofeti Zakariya aakoha nlaika nenno naamonihera yoowonihera ele: “Itthu iya sinthonyera eheeni?” Nlaika naamwaakhula ni mutthenka waakhuma wa Yehova: “‘Khaiyene ni matxira nari ni ikuru mene ni munepa aka,’ ti siso ulumaiye Yahvéh anakhotto.” (Zak. 4:4, 6) Makhura yaathonyera owera wa munepa wootteela wa Yehova, ni munepa wootteela ikuru sihimmala. Omwene wootheene wa oPersa ni owera waya ni anakhotto aya khawaalikana nalikanxera ni munepa wootteela wa Yehova. Nnikhavihero na Yehova, atthu ale yaavara muteko yaamukela omaliha muteko nnamweera yaasonttiwa. Mweekhaikhai, yoowonihera ela yahaalipiha aYuda ale ni nikhavihero yaatthunaaya! Itthu soothesene aYuda yaatthunaaya opaka waari omuroromela Yehova ni otthikela oteka. Mweekhaikhai yaari ti yeeyo awo yaapankaaya, nnaamweera yaasuwela weera muteko wannakhottihiwa.

7. Eheeni yaakhavihenre aYuda omaliha oteka epewe?

⁷ Mene matxentxo mamoha yahaahakalaliha aYuda. Matxentxo heeni yaawo? Mpuwa mwa eyaakha ya 520 a.C., mwene munyowani aapatxera olamulela oPérsia: Eeriwa Dario I. Eyaakha ya naaveli ya olamulelo awe, owo ahoonelela weera nlamulo nimoha naakhottihera oteka epewe naari noohixariya. Mwa yeeyo, Dario aahima weera muteko ovireleleke. (Ezra 6:1-3) Yoothanla ela yaari yootutuxera wa elapo yootheene. Mene kheemenle vaavo. Mwene aalamula weera anamwaattamanani aya yaawo  yawoopopiha ewemexihaka muteko ole wooteka weera yaavaheke musurukhu ni itthu ikina weera ekhavihere muteko! (Ezra 6:7-12) Mwa yeeyo, sivinreene iyaakha ixexe aYuda yaawera omaliha epewe eyaakha ya 515 a.C.—Ezra 6:15.

8. Mwaha wa heeni nihintthuneyaahu woova etthu vaavo ninsonttiwaahu?

⁸ Anamoona a Yehova olelo va, annasonttiwa-tho. Mwa ntakihero, mapuro makina muteko ahu woolaleera onnakhoottihiwa. Mwaha wa yeeyo, asinna “annakuxiwa eronhiwaka wa maguvernatore ni mamwene” weera yathorihiwe eyo enneeriha weera awo ehelele onamoona. (Math. 10:17, 18) Ikwaha ikina enneereya eyo mwaha wa otxentxiwa wa olamulelo, yakhumelela eyo asinnihu annamukokhorela Yehova mootaphuwa. Ikwaha ikina mphuki ontthara exariya, onnapaka yoothanla yooreera yeeyo enkhavihera muteko ahu. Mpaka asinna akina annasonttiwa moota mukina. Nnaamweera ekhanleeneno otaphuwa woomukokhorela Yehova elapo ankhalaaya asinna awo anihaawa mwaha woosonttiwa ni amusi aya, yaawo ampaka sootheene weera yaahiihe omukokhorela Yehova. (Math. 10:32-36) Vaavo amusi awo anoonelelaaya weera khanwera waahiiha asinnihu omukokhorela Yehova, annahiya waasontta. Ni emaara ekina atthu yaala yaasontta moohixariya Anamoona a Yehova annakhala Anamoona a Yehova. Mene nto wakhala weera nyuwo munnaviriha maxupo nto mala, muhitthikele ottuli. Mulipeke murima Yehova ori ni nyuwo ni onkela ovarela munepa awe wootteela woowera weera ookhavihereni. Mwa yeeyo, nyuwo khontthuneya woova etthu!

9. Mwaha wa heeni aYuda akina yaariipinwaaya murima vaavo yoonnaya mathipelo a epewe enyowani emalihiwaka?

⁹ Ayuda akina oowunnuwela yaahinla vaavo yoonnaaya epewe enyowani emalihiwaka mathipelo aya. (Ezra 3:12) Awo yaahoona epewe yooreera yaatekiwe ni Salomoni. Vamaithoni vaya epewe enyowani “khayaakhanle sawasawa” yaraaya epewe ya khalayi. (Hag. 2:2, 3) Mwaha woovirikana ipewe iye piili sannaariipiha murima alopwana ale, mene yoowonihiwa Zakariya ooniheriwaawe yaamwaakhavihera ophwanya ohakalala. Moota heeni?

10. Moota heeni masu a nlaika yaakhavihenraaya aYuda otthikela ohakalala? (Zakariya 4:8-10)

¹⁰ Mmusome Zakariya 4:8-10. ‘Yaataphulela eheeni masu a nlaika vaavo naahimmaaya  weera aYuda yaamuhakalala ni woona epurumu mmatatani mwa Zorobabeli,’ guvernatore aYuda? Epurumu ekaruma envareliwa muteko weera yookoleliwe etthu nnenesene. Mene nto nlaika naatthuna ohima weera nnaamweera epewe ele yaari yoohireeraxa, vaavo yeeraaya emalihiwe yaakela okhalaka moovarihana ni malamulo a Yehova. Nto Yehova amuhakalalela epewe ele. Mwaha wa heeni nto aYuda yeeraaya ehihakalaleke? Etthu yootthuneya eri yooweera Yehova annaakhulela epewe enyowani weera akokhoreliweke ntoko owo ontthunaawe. Mene nto awo yaatthuneya wuupuwela weera etthu yootepa otthuneya ori omukokhorela Yehova ntoko owo ontthunaawe, ohiya oreera wa epewe. Wakhala weera yanvarexexa eyo, yaamutthikela ohakalala.

11. Maxupo heeni anaaphwanya arumeyi a Yehova?

¹¹ Wa atthu antxipale a hiyo oviriha matxentxo maxupo matokweene. Atthu akina yaavara muteko wa ehuhu yootheene mpuwa mwa iyaakha sintxipale ahaakhela matxentxo a soothanleliwa saya. Nave atthu akina yaahiiya eparakhaaya ni miteko saasivela ovara mwaha wa wuuluvala. Menento, ti wokhweya oriipiwa murima vaavo matxentxo ala ankhumelelaaya. Pooti weera woopatxerani khuvankhweya wiiwelela yoothanla eyo. Pooti weera ninnuupuwela makhalelo ahu a muttuli. Nto nuupuwelaka etthu eyo, nnapatxera okhulumuwa noonaaka weera khaninwera onvarela Yehova muteko ntoko neeraahu khalayi. (Mir. 24:10) Mwa yeeyo, ntoko yowooniheeriwa ya Zakariya, enkela onikhavihera hayi ovirelela ompakela muteko Yehova ele ninweraahu?

12. Moota heeni yowooniheriwa ya Zakariya enkelaaya wookhaviherani oviriha matxentxo?

¹² Tiwookhweya oviriha maxupo wakhala weera nnookhalano moonelo mmoha ni Yehova. Opaka itthu sootikiniha olelo va ni nookhalano eparakha yoovara vamoha ni Yehova. (1 Akor. 3:9) Soothanleliwa sahu pooti otxentxa va nihukuni, nto etthu eneera ehitxentxe nri nsivelo na Yehova ni hiyo. Wakhala weera matxentxo a mareherero annootaphani. Muhiviriheke ehuhu mupuwelaka mathowa yeerinhe ovahiwa matxentxo awo. Ohiya okhala muloheraka “ehuhu ya khalayi,” munvekeleke Yehova weera ookhavihereni okhovelela makhalelo avaanaano. (Koh. 7:10) Muhimakeleke wuupuwelela itthu muhinweraanyu opaka; mupuweleke itthu munweraanyu opaka vanaano va. Tiyeeyo nxuttenraahu ni yowooniheriwa ya Zakariya: ti wootthuneya  okhalano mukhalelo wooreera. Nnaamweera itthu sitxentxaka moowaakuveya, vano nnoowera ovirelela okhala oororomeleya wa Yehova.

13. Mwaha wa heeni aYuda akina nahaasivenlaaya nlamulo nootthikela oteka epewe?

¹³ Muteko wootthikihera oteka epewe wanavirelela okhoottihiwa. Nnamwera vareene hiiho namakeya—mutokwene Yehoxuwa ni guvernatore Zorobabeli, yaawo yaalamuleela,—“yatthikihera oteka empa ya Muluku”. (Ezra 5:1, 2) Pooti weera ayuda akina yoona weera etthu ele yapankaaya khesaahiyono saari miruku sooreera. Mwaha woweera awo khiyaweera oteka wowiipithiiha epewe? Amwittanaaya yannaakhumihera maxupo. Mweekhaikhaini, Zorobabeli ni Yehoxuwa yaatthuneya olipihiwa ni Yehova. Awo yahaakhela nlipiho nna. Moota heeni?

14. Moovarihana ni Zakariya 4:12, 14, miruku heeni aakhenlaawe Yehoxuwa ni Zorobabeli?

¹⁴ Mmusome Zakariya 4:12, 14. Empari ela ya yowooniheriwa ya Zakariya, nlaika namuleela Zakariya weera miri miili sa oliveira saathoonyera “othanliwa” a Yehova—Yehoxuwa ni Zorobabeli. Nlaika naahima weera ntoko asilopwana eeli yaakhala ntoko “yemenle oholo wapwiya a elapo yootheene,” naari neere, Yehova. Mweekhaikhai ele yaari eparakha etokweene Yehova waaroromela alopwana ale. Mwa yeeyo, atthu a Yehova yannaroromela itthu sootheene yaahimmaaya mwaha wooweera Yehova taahoolela yaawo.

15. Moota heeni nneeraahu noonihere nttittimiho ni miruku Yehova onnivahaawe moorweela mBiblyani?

¹⁵ Yehova onnavirelela oweettiha atthu awe olelo va moorweela mwa masu awe, Biblya. Mbiblyani Yehova onnaleela etthu neeraahu nipakeke weera nimukokhorele. Moota heeni nneerahu noonihere nttittimiho miruku nnaakhelaahu moorwela mBiblyani? Onnatthuneya wiisunkera ehuhu weera nimusome Biblya ni ophimelela. Tivawo mwiikoheke ha: ‘vaavo kimmusomaka Biblya naari ibuukhu, kinneemela ni wuupuwelela ni ophimelela etthu kinsomaaka? Miyo kinnaasa itthu kinoonaaka okhala “sooxupa wiiwexexa” mBiblyani? (2 Ped. 3:16) Naari kimmusoma Biblya kihiphwatthaka ele kinsomaaka?’ Ninkela owera opaka etthu Yehova onvekelaawe ovarela muteko naalaleeraka wakhala weera ninnisukera ehuhu weera niphimelele ele Yehova onnixuttihaawe.—1 Tim. 4:15, 16.

16. Eheeni enkela onikhavihera vaavo ninkelaahu waakhela miruku sa “kaporo oororomeleya” nihiniiwexexaahu nnene?

 ¹⁶ Yehova onnanivaha miruku morweela mwa “kaporo oororomeleya ni a miruku”. (Math. 24:45) Ikwaha sintxipale kaporo oororomeleya onnanivaha miruku sooxupa wiiwexexa. Mwa ntakihero, nyuwo pooti weera mootoko waakhela miruku woohima sa wiirehera vahinaaye okhumelela erisa mapuro munkhalaanyu ni nyuwo munona weera erisa eyo khetonko okhumelela mapuro munkhalaanyu. Naari-tho, pooti weera miruku naakhenlaahu weera niikosoope ehuhu ya Coronavirus sinnatepihiwa. Vanonto, nipakeke heeni wakhala weera ninnavahiwa miruku nihiniiwexexaahu? Muupuweleke moota waraaya wooreera aYuda otthara miruku yaavahiwaaya ni Yehoxuwa wamoha ni Zorobabeli. Nave-tho, nyuwo pooti wuupuwela sooweereya sa mBiblyani ikina. Ikwaha ikina atthu a Muluku a khalaayi yahaakhela miruku seiyo sahaavareleya muteko ni moonelo aya. Nnaamweera vaarene hiiho, miruku iyo saavuluxa ikumi sa atthu.—Aph. 7:7; 8:10.

17. Moota heeni yoowoonihera ya onyaari yakhavihenraaya aYuda?

¹⁷ Yoowooniheriwa ya Zakariya ya naathanu yaari yowaakuveya mene yoowera. Eyo yahaavaha aYuda okhalano moonelo wooreera woohima sa muteko wa okokhorela wa nnene. Vaavo yaapakaaya itthu moovarihana ni ele yaaxuttenraaya woohima sa yowooniheriwa ya Zakariya, yahoona weera Yehova annaakosoopa ni oweettiha ni owakihera ni waavaha miruku. Yehova aavarela muteko munepa awe wootteela weera aakhavihere atthu awe ovirelela ovara muteko ni otthikela ohakalala.—Ezra 6:16.

18. Yowoonihera ya Zakariya enkela wookhaviherani hayi mweekumini mwanyu?

¹⁸ Yoowooniheriwa ya Zakariya nisommaahu pooti onipakiha matxeentxo mweekumini mwaahu. Ntoko nonaahu, eyo pooti wookhaviherani yoovahakani ikuru weera nvilele osonttiwa, ohakalala vaavo munvirihaanyu matxentxo mwekumini ni ororomela weera mwiiwelele miruku muhiniwexexaanyu. Vanonto, etthu heeni entthuneya opaka naavirihaka maxupo mweekumini? Muhinaaye opaka etthu, moone Zakariya onnaawe—sowooneeya sinoonihera weera Yehova onnaakosoopa nnene muloko awe. Avinyaka mmuroromele Yehova, nvirelelaka omukokhorela ni murimaanyu wootheene. (Math. 22:37) Tivawonto, Yehova onkela wookhaviherani weera munvarele muteko ni ohakalala.—Akol. 1:10, 11.