1. Tani onivanhe yoovaha ya owerya olavula?

 OLAVULA, yoovaha enikhuma wa Muluku ahu oophenta. Nuumala opattuxiwa, mulopwana oopacerya Adamu aaniwerya orumeela moolumo wira olavuleke ni Tiithi awe a wiirimu. Owo aaniwerya opakelela moolumo makina wira incererye ale aasuwela awe. Adamu aaniwerya orumeela osuwela wawe olavula, wira ovare muteko aarummwale awe ni Muluku wa ovaha masina inama sootheene. (Maph. 2:19) Moohaanyiherya Adamu khaareere ohakalala mukwaha woopacerya aalavunle awe ni mutthu mukina, eyo piiyo, mwaara awe oreera, Eva!—Maph. 2:22, 23.

2. Khalai, atthu akina yaarumenle sai moolumo oohiloka, nave eyo eniiraneya sai olelo-va?

² Ovinre ene okathi vakhaani paahi, yoovaha ela ya olavula khiyaarumeeliwe saana. Satana Diabo, aahimoototha Eva, nto wootha iwo wookumiherya etampi ni ohimalela. (Maph. 3:1-4) Adamu khaarumenle saana yoovaha ya olavula okathi aamurunenle awe Eva ni Yehova, mwaha wa etthu yoohiloka aapanke awe. (Maph. 3:12) Kayini, aahimoototha Yehova nuumala omwiiva muhima awe, Abeli. (Maph. 4:9) Muhoolo mwaya, osuulu wa Kayini aitthaniwa Lameki, aahiipa nsipo nooniherya moota otakhala wuulanne aya mahiku ale. (Maph. 4:23, 24) Olelo-va, mweettelo wa atthu ori sai? Ikwaha sikina, ahooleli akina a ipoliitika annilavula moolumo oohiloka aahiiso ooruwana vaatthuni. Nave olelo-va, khivanikhweya ophwanya ifilme sihinromola moolumo oohiloka. Anaxikola animakela wiiwa moolumo awo oskola, hata atthu aalupale anniiwa mapuro anivara aya muteko. Moota anrumeeliwa aya moolumo ooveeha  olelo-va, onnooniherya wira mweettelo wa atthu woohononeya.

3. Etthu xeeni ninreerela ahu okhalana ephoole wira nihipake? Nave exeeni ninrowa ahu othokorerya mwaha ola?

³ Naahikhalane ephoole, mwaha woomakelaka wiiwa alavuliwaka moolumo ooruwana, ni hiyo-tho pooti opaceryaka orumeela moolumo awo. Tivonto, ntoko makristau, omuhakalaliha Yehova onihela muhina itthu sinceene, ohiya paahi ohilavula moolumo ooveeha. Nihaana orumeela yoovaha ya olavula mwa enamuna yooloka ni eninvuwiha Muluku. Mwaha ola, nnoothokorerya moota woopaka eyo (1) okathi woolaleerya, (2) okathi wa mithukumano, ni (3) okathi ninvaanela ahu khula nihiku. Masi nrowe toko niwehe moota Yehova onoonela awe moolumo ahu.

4. Moovarihana ni Malakhiya 3:16, xeeni Yehova onithokorerya awe moolumo ahu?

⁴ Mmusome Malakhiya 3:16. Biibiliya onihimya wira Yehova ookhalana ‘eliivuru’ erina masina a atthu, anooniherya ni moolumo aya wira annimoova Muluku, ni wira annuupuwelela nsina nawe. Exeeni emwiirinhe okhalana eliivuru eyo? Moolumo ahu annooniherya itthu nnuupuwela ahu. Yesu aahimmye so: “Eyano enilavula itthu sisareyale vamurimani”. (Math. 12:34) Moolumo ahu annooniherya akhala wira ninnimphenta Yehova wala nnaari. Nave Yehova oniphavela wira atthu yaale animphenta, yaaphwanye ekumi ehinimala elapo esya.

5. (a) Okokhorela wahu onivarihana sai ni itthu ninlavula ahu? (b) Sintoko enooniherya aya efootu, exeeni ninreerela ahu wuupuwelela okathi ninlavula ahu?

⁵ Moota ninlavula ahu, onnooniherya akhala wira Yehova onimweemererya okokhorela wahu. (Yak. 1:26) Atthu akina ahinimphenta Muluku, anlavula moowali, moonyoholela, ni moowiixinnuuha. (2 Tim. 3:1-5) Khivanreerela waatakiha atthu awo, maana nimphavela onvuwiha Yehova ni moolumo ahu. Masi niireke Yehova aamuhakalala akhala wira nnoomananiha orumeela moolumo oreera okathi ninkhala ahu ni anna a mmulokoni ni okathi woolaleerya, masi nakhala owaani, nnalavula moowali?—1 Ped. 3:7.

6. Exeeni yaakhumelenle mwaha wa Kimberly ohilavula moolumo ooruwana?

⁶ Okathi ninrumeela ahu saana moolumo ahu, ninniwooniherya atthu akina wira nimmukokhorela Yehova. Nave eyo ennaakhaliherya oweha  saana moota “anaxariya, yawo animurumela Muluku” anivirikana aya ni “alipa-òtakhala ahinimurumela”. (Mal. 3:18) Eyo yaahooneya ni murokora mmosa oniitthaniwa Kimberly. * Nihiku nimosa, aahithanleliwa ompaka TPC, ni muthiyana mukina aasomana awe. Nuumala ompaka, muthiyana ole aahoona wira Kimberly aahivirikana ni anaskola akina. Kimberly khaawaapa atthu akina, aalavula mooreerela murima, nave khaalavula moolumo ooruwana. Ele yaahimusivela muthiyana ole, nto nuuvira okathi aaheemya omusoma Biibiliya. Tthiri Yehova onnihakalala vanceene okathi onniweha awe nilavulaka mwa enamuna eniwiiriha atthu akina ophavela omusoma Biibiliya.

7. Exeeni mulakenle anyu oopaka wira murumeeleke saana yoovaha ya olavula?

⁷ Ootheene ahu nihaana olavula mwa enamuna eninvuwiha Yehova ni enlipiha ompatthani ahu ni axinnihu. Nrowe nthokorerye inamuna sikina soovareleya muteko nikhanle ahu oowiimananiha wira nihihiye okhala ‘ntakiheryo nooloka . . . [ni] moolumo ahu’.

8. Ntakiheryo xeeni Yesu onihiyenrye awe na moota woorumeela moolumo ahu okathi woolaleerya?

⁸ Mulavuleke mooreera murima ni mwa nttittimiho okathi muntthekeliwa anyu. Okathi Yesu aari awe valaponi, aahootheriwa okhala namuhapaliwa, namalya, murumeyi a Diabo, ohittittimiha eSaabadu, ni onveeha Muluku. (Math. 11:19; 26:65; Luka 11:15; Yoh. 9:16) Hata vari siiso, khaakhula moowali. Moolikanasa ni Yesu, nihikhala-khale niwiirelaka itthu soohiloka atthu anniveeha. (1 Ped. 2:21-23) Ekeekhai wira khivanikhweya olavula mooreera murima okathi ninveehiwa ahu. (Yak. 3:2) Exeeni enrowa onikhaliherya?

9. Exeeni enrowa onikhaliherya okhalana ephoole ni moolumo ahu okathi ninlaleerya ahu?

⁹ Akhala wira mwaneene etthoko khoniwaakhulani saana, muhaakuveke oveeheya. Munna mmosa oniitthaniwa Sam, ohimmye so: “Kinnimananiha owehexexa wira mwaneene etthoko onoowerya opaka marukunuxo mweekumini mwawe, ni ohiliyala wira tthiri onoowerya opaka eyo”. Okathi mukina mutthu owo, pooti onanariwaka mwaha woowi niphiyale okathi woohireerela. Okathi mutthu mukina onlavula awe ni owali, vannireerela opaka etthu onimakela awe opaka murokora mmosa oniitthaniwa Lucia. Hiyo pooti opaka nivekelo noowaakuveya wira Yehova onikhaliherye omaaleleya, ni wiikasoopa wira nihilavule etthu yoohiloka.

10. Moovarihana ni 1 Timootheyo 4:13, yoolukama xeeni ninreerela ahu okhalana?

¹⁰ Mukhaleke mutthu oosuwela wiixuttiha. Timootheyo aari mukristau aasuwela itthu sinceene. Masi hata vari siiso aahaana ohihiya olokiherya inamuna sawe soowiixuttiha. (Mmusome 1 Timootheyo 4:13.) Ninrowa okhala sai atthu  oosuwela wiixuttiha okathi ninlaleerya ahu? Nihaana wiilokiherya saana. Moohakalaliha nookhalana itthu sinceene sinnikhaliherya okhala atthu oosuwela wiixuttiha. Nyuwo pooti ophwanya soohimmwa sinceene musomaka ebroxura Mwiilipiheryeke Osoma ni Wiixuttiha ni mpantta oni: “Mukhaleleke Nthiti Muteko Woolaleerya”, onikumiheriwa ni Okumi ni Orummwa Ahu wa Ekristau—Ekaderno Enirumeeliwa Omuthukumanoni. Niireke munnittottela mureerelo itthu iyo? Akhala wira ninniilokiherya saana, nnoolavulaka nihoovaka etthu ni moolipiherya.

11. Exeeni yaakhalihenrye makristau makina okhala atthu oosuwela wiixuttiha?

¹¹ Nave hiyo pooti okhala atthu oosuwela wiixuttiha, niwehaka moota atthu akina a mmulokoni aniixuttiha aya. Eyo ti etthu onipaka awe munna oniitthaniwa Sam, nimuromonle ahu woopaceryani. Onnaaweha saana anna oosuwela wiixuttiha. Nuumala-vo onnimananiha waatakiha. Murokora mmosa oniitthaniwa Talia, onnivaha ephoole yuulupale enamuna anna anilavula aya saana myaha sa atthu otheene. Eyo ennimukhaliherya wiixutta moota woovaanela ni atthu myaha sinimakela okohiwa okathi woolaleerya.

12. Muxankiho xeeni onaaphwanya atthu akina?

¹² Otheene ahu nnoowerya wiiriha mithukumano okhala soolipiha, niipaka hoothe isipo sa Omwene ni ovaha ikomentaario soolokiheriwa saana. (Esal. 22:23) Anna akina waavila wiipa ni okomentari okathi wa mithukumano. Niireke ni nyuwo ti siiso? Akhala wira ti siiso, munoohakalala osuwela itthu saakhalihenrye atthu akina oxintta woova iwo.

13. Woonasa wene exeeni enrowa wookhaliheryani wiipa ni murima wootheene okathi wa mithukumano?

¹³ Mwiipeke ni murima wootheene. Okathi nniipa ahu isipo sa Omwene, yoophavela ahu ekhaleke onvuwiha Yehova. Murokora mmosa oniitthaniwa Sara, onniixoona okhala mutthu ohinsuwela wiipa. Masi hata vari siiso, omusivela omuttottopela Yehova ni isipo. Wira oxintte muxankiho owo, ohoona okhala vooreerela olokiherya isipo okathi onlokiherya awe ipantte sikina sa mithukumano. Onninsayari ni onnimananiha oweha moota moolumo a isipo iyo anivarihana aya ni myaha sinrowa othokoreriwa. Sara ohimmye so: “Eyo ennikikhaliherya owehexexa etthu nsipo nlo ninhimya aya, ohiya owehexexa akhala wira kinniipa saana”.

14. Akhala wira munnoovelela olavula ohoolo wa atthu anceene, exeeni enrowa wookhaliheryani?

¹⁴ Mukomentariki mithukumano sootheene. Ohimya ekeekhai atthu akina khivanaakhweela opaka eyo. Mwaha wa xeeni? Murokora Talia nimuromonle ahu woopaceryani ohimmye so: “Atthu akina khansuwela wira okixankiha olavula ohoolo wa atthu anceene. Tivonto vankivila aya okomentari okathi wa mithukumano”. Hata vari siiso, Talia khonihiya okomentari. Nave khoniliyala  wira ekomentaario yoopacerya enaakhula nikoho, ehaana okhala yookhuveya ni yooluluwanya. Onihimya-tho so: “Eyo enooniherya wira ekomentaario aka pooti okhala yookhuveya ni yoohaattiheriwa itthu, nave ti etthu eniphavela awe munna onihoolela mpantta owo”.

15. Exeeni ninreerela ahu wuupuwelela okathi nimphavela ahu okomentari omuthukumanoni?

¹⁵ Masi hata atthu yaale ahinoova, ikwaha sikina pooti woovelelaka okomentari. Mwaha wa xeeni? Murokora mmosa oniitthaniwa Juliet, onitthokiherya so: “Ikwaha sikina kinnoovelela okomentari, mwaha woowuupuwela wira ekomentaario aka ti yookhweya ni kheniphiyerya etthu”. Akhala wira ni nyuwo munuupuwela siiso, muhiliyale wira Yehova khonoovekelani ovaha ekomentaario yoovara murima muhinwerya anyu. * Owo onnihakalala vanceene okathi onniweha awe niimananihaka okomentari, hata noovelelaka.

16. Moolumo xeeni ahinreerela ahu olavula?

¹⁶ Muhilavuleke moolumo ‘ooruwana’. (aEef. 4:31) Sintoko niwenhe ahu woopaceryani, khivanireerela mukristau olavula moolumo ooveeha. Masi-tho sookhala itthu sikina mukristau ohinreerela awe olavula. Mwa ntakiheryo, nihaana okhalana ephoole wira nihaalavuleke moohiloka atthu a nloko aahiiso elapo ekina. Nave nihaana osyaka olavula itthu sinrowa waawereya atthu akina. Munna mmosa onihimya so: “Ikwaha sikina kaanilavula itthu soohiloka saawereya atthu akina, kiphavelaka otheiha paahi. Vaavo okathi waavira aya, mwaaraka aanikikhaliherya vanceene. Okathi wootheene kaalavula aka etthu yoohiloka, nakhala mekhihu aanikooniherya moota etthu kilavunle aka enwereyale aya mutthu mukina aahiiso yena”.

17. Moovarihana ni aEefeso 4:29, ninrowa waalipiha sai atthu akina?

¹⁷ Mulavuleke mwa enamuna enaalipiha akina. Ohiya omakelaka wiixinliha, mwaattottopeleke atthu akina. (Mmusome aEefeso 4:29.) Aisarayeli yaahikhalana mathowa manceene oomuxukhurela Yehova. Masi ohiya opaka eyo, yaamakela wiixinliha paahi. Okathi mutthu onimakela awe wiixinliha, nave atthu akina annipacerya omutakiha. Woonasa wene munnuupuwela wira nuumala anamahottela 10, ohimya itthu sookhulumula sa elapo yaaronwe aya ohottela, “atthu othene a Isarayeli yahimwapa Moise n’Aroni”. (Moth. 13:31–14:4) Ohiya opaka eyo, ottottopeliwa onnaaphwanyiha atthu ohakalala. Mwa ntakiheryo, ottottopeliwa ni axaapara awe, waahimukhaliherya mwanawe Yefte, ovara muteko aathanleliwe awe. (Makh. 11:40) Sara nimuromonle ahu woopaceryani onihimya so: “Okathi nnaattottopela ahu atthu akina, annoona wira anniphentiwa ni Yehova vamosa ni anna ootheene”. Nto mwiimananiheke  ohaavya inamuna soottottopela ni murima anyu wootheene.

18. Moovarihana ni Esalimo 15:1, 2, xeeni ninreerela ahu olavulaka ekeekhai? Nave-tho nihaana osyaka opaka exeeni?

¹⁸ Mulavuleke ekeekhai. Khaninrowa owerya omuhakalaliha Yehova nihilavulaka ekeekhai, okhala wira Yehova onninyokha wootha. (Mir. 6:16, 17) Mooriipiha murima atthu anceene olelo-va, anuupuwela wira wootha etthu yaamukhaani paahi. Masi hiyo nintthara moonelo wa Yehova. (Musome Esalimo 15:1, 2.) Tthiri nihaana osyaka olavula itthu sinikhala wira ti seekeekhai, masi sikhanle oowiiriha atthu akina wuupuwela itthu sikina nahaaphavela ahu ohimya.

19. Inamuna xeeni sa ovaanela ninreerela ahu okhalana ephoole?

¹⁹ Muhiwaapeke atthu akina. (Mir. 25:23; 2 aTes. 3:11) Juliet nimuromonle ahu, onnihimya moota onikhala awe okathi oniwiiwa awe atthu akina awaapaka akhwa aya. Onihimya so: “Okathi kimmwiiwa aka mutthu omulavulaka voohiloka mukhwaawe, vannikiwereya. Eyo ennikiiriha ohimuroromela mutthu owo onlavula, woonasa wene nave mutthu owo okathi onikhala awe ni atthu akina, nave onnikaapa”. Okathi munvaanela anyu ni mutthu, nave munoona wira oopacerya waalavula moohiloka atthu akina, muhaana olavula etthu ekina yoolipiha.—aKol. 4:6.

20. Nihaana ophavela orumeela sai moolumo ahu?

²⁰ Ninkhala olumwenku atthu anaamutepa aya orumeela moolumo oohiloka. Nihaana wiimananiha vanceene wira moolumo ahu amusiveleke Yehova. Muhiliyale wira owerya olavula, nivahiwe Nuuwo, nave onniweha moota ninrumeela ahu yoovaha eyo. Nikupaliki wira Yehova onoonireeliha akhala wira nnoorumeela moolumo ahu mwa enamuna yoolipiha okathi woolaleerya, mmuthukumanoni, ni okathi ninvaanela ahu ni atthu akina. Muhoolo wamala olumwenku ola wootakhala, vanookhweyaka omuttottopela Yehova ni moolumo ahu. (Yuda 15) Nto nilipelelaka okathi owo, nihaana wiimananiha onvuwiha Yehova ni ‘moolumo a mwano mwahu’.—Esal. 19:15.