AISARAYELI saanaasivela vanceene isipo. Nave Biibiliya onnaalavula atthu yiipa ni yaarumiha ikaruma sa isipo. Mpantta muulupale wa mbiibiliyani, olempwale ntoko isipo. Mwa ntakiheryo, Esaalimu, Nsipo Noophentana ni Wiikhupanyerya. Eliivuru emosa enilavula sa okumi okathi wa Biibiliya, ehimmye wiira “aisarayeli yaaniipa isipo okathi yaavara aya miteko sa khula nihiku”.

Isipo sa khula nihiku. Aisarayeli yaaniipa isipo wiira yooniherye ohakalala waya. (Yes. 30:29) Athiyana yaaniipa ilulu, woopa malapa, wiipa isipo ni wiina okathi woohakalaliha. Mwa ntakiheryo, okathi mwene aathanliwa awe, okathi anakhotto yaaxintta aya awanani aya aahiiso okathi wookokhorela. (Makh. 11:34; 1Mam. 1:39, 40) Nave-tho aisarayeli yaaniipa okathi yakhweliwa mutthu yamphenta aya. (2Wah. 35:25) Ntoko enihimya aya eCyclopedia ya John McClintock ya 1981, mweekeekhai “aheeberi naari nloko naasiveliwa wiipa isipo”.

Isipo yiipeliwa mamwene. Mamwene a wIsarayeli nave yaanisiveliwa vanceene ni isipo. Mwa ntakiheryo mwene Sawuli aahimwiitthana Davidi wiira omwiipele isipo opalaasio wawe. (1Sam. 16:18, 23) Nuuvira okathi vakhaani nuumala Davidi okhalihiwa mwene, owo aahipaka ikaruma sa isipo, aahilepa masipo ene ni aahilokiherya ekurupu ya atthu yaawo yaarowa wiipaka mutemplo. (2Wah. 7:6; Am. 6:5) Nave mwene Salomoni aahikhalana alopwana ni athiyana yaawo yaamwiipela opalaasio wawe. — Mus. 2:8.

Isipo okathi yaamukokhorela aya Yehova. Etthu yoohakalaliha okhala wiira aisarayeli yaanimwiipela isipo Yehova okathi wookokhorela. Wiira niiwexexe saana, yaahikhala alopwana 4.000 yaawo yaamwiipela Yehova mutemplo oYerusalemu. (1Wah. 23:5) Awo yaanirumiha isimbalo, atthakare ni aviyola. (2Wah. 5:12) Masi awo khahiyo yaari meekhaya yaamukokhorela Yehova yiipaka isipo. Aisarayeli anceene yaaniipa okathi yaarowa aya oYerusalemu omukokhorela Muluku. Masipo makina yaasuweliwa ntoko Nsipo na Atthu Aniwela. (Esaal. 120-134) Moovarihana ni soohimmwa sa ayuda, aIsarayeli yaaniipa isalimo a aahiiso isipo okathi yaamwiira aya Paasikha.

Nave-tho olelo-va, arumeyi a Yehova annoona isipo okhala etthu erina efaita yuulupale. (Yak. 5:13) Wiipa oniirela mpantta okokhorela wahu. (aEef. 5:19) Hiyo ninnikhalana waataana wooloka ni anna ni arokora okathi nniipa ahu isipo sa Omwene. (aKol. 3:16) Ohiya-vo, isipo sinninikhaliherya okathi ninxanka ahu. (Mit. 16:25) Moohaanyiherya, wiipa isipo enamuna enooniherya waamini ni omphenta wahu Yehova.