BIIBILIYA ONNIRUKUNUXA MIRIMA SA ATTHU

“Vano Miyo Nkinuupuwela-tho Wira Kihaana Orukunuxa Olumwenku”

Elavuliwe ni Jukka Sylgren

MWAAKHA OYARIWE AWE: 1966

ELAPO ONIKHUMA AWE: OFINLÂNDIA

MWAHA ENE: NAMAKHALIHERYA A IDIREITO SA ATTHU NI INAMA

MWEETTELO AKA WA KHALAI: Okhuma enamwane aka miyo kaanisiveliwa ni itthu siri mulaponi. Ikwaha sinci, emusi aka yaanirowa mapuro ooreera saari itakhwa ni matthiya vakhiviru va epooma ahu yaitthaniwa Jyväskylä, eriyari ya oFinlândia. Nave-tho onnikisivela waaweha axinama. Kiryeene mwaana miyo kaaniphavela omukupaarela khula kwatu ni mwalapwa kaamoonaka! Nuumala wunnuwa, kaahipacerya onyoonyiheya wa moota atthu yaahaaxa aya inama. Nuuvira okathi, kaahiirela mpantta nikhuuru naakhapelela idireito sa axinama, kaasuwenle aka atthu akina yaakhala wira yaarina muupuwelo wooloka.

Hiyo naanipaka ikampaanya voohimya sa idireito sa axinama. Hiyo naanikawa ipaphelo, opaka sowooniherya ni olokiherya igrupu seetta mustaraatani nivaanyihaka otumihiwa wa isapala sa inama ni ilaboratorio saatokosa axinama. Nave-tho, naahikumiherya nikhuuru nisya naakhapelela axinama. Okhala wira naanipaka itthu mootepana nimananihaka olokiherya soophavela sahu, imaara sinceene naanikhalana mulattu ni makhulupale a elapo. Kaahitthukweliwa ni oroihiwa otribunaali ikwaha sinci.

Ohiya-vo, waathokorerya waka axinama, waahikiiriha oxankiheya ni itthu sikina sa mulaponi. Nto, miyo kaaniirela mpantta makhuuru manceene, ohela muhina Amnesty International and Greenpeace (Nikhuuru Ninkhapelela Idireito sa Olumwenku Wotheene ni Okhapelela Itakhwa). Kaaniimananiha vanceene wira kikhaliherye miteko saya. Miyo kaahiikumiherya okhala mutthu oowaakhaliherya alipa ohaawa, oovoliwa etala ni atthu akina yaahaaxiwa.

Masi, vakhaani-vakhaani, kaahipacerya woona wira nkaawerya orukunuxa elapo. Vaavo makhuuru ale yaawerya aya omaliha mixankiho saamukhaani, nto mixankiho suulupale saamutepa ovikaniha. Vaakhala wira ikuru sootakhala ti saakumiherya mixankiho olumwenku wotheene, ni khuuvo mutthu aawerya opaka etthu. Nto ikuru saka saahikimalela.

 MOOTA BIIBILIYA ORUKUNUNXE AWE OKUMI AKA: Okhala wira kaahiriipiwa murima mwaha wa ohiweryaka okhaliherya, kaahipacerya omuupuwela Muluku ni Biibiliya. Miyo kaahitoko omusoma Biibiliya ni Anamoona a Yehova. Nnaamwi vaakisivenle wira Anamoona ale yaari ooreera murima ni yaahooniherya opatthani wooloka, miyo nkailokihenrye wira kipake marukunuxo a okumi aka. Vano okathi ola, itthu saahipacerya oturukeya.

Miyo kaahimukuxa Biibiliya ni khupacerya omusoma. Nto owo aahikikhaliherya vanceene okathi ole. Kaahiweha soolempwa sinceene sa Biibiliya seiyo sinniixuttiha waathokoreryaka axinama mooreerela. Mwa ntakiheryo, Yoolepa ya Miruku 12:10 enihimya so: “Atthu ooreera murima annikhapelela inama saya”. (Good News Translation) Nave-tho, kaahiixutta wira Muluku khahiyo tonikumiherya mixankiho sa olumwenku. Masi, mixankiho sahu sinnitepa waatta mwaha woowi atthu anci khanitthara malakiheryo a Biibiliya. Etthu yuulupale yaakivanre murima, waari wiixutta wira Yehova toophenta ni oopixa murima.​—Esalimo 103:8-14.

Okathi ene yoowo, kaahittotta epaphelo (wala cupon) yooniherya moota woophwanya eliivuru Biibiliya Oniixuttiha Exeeni Tthiri? Nto kaahimaleliha olepa ni kivahererya. Moohipisa, Mulopwana mmosa ni mwaarawe yaahimana mukhora aka ni yiivahererya okisomiha Biibiliya; nto miyo kaaheemya. Nave-tho kaahipacerya orowa mmithukumanoni sa eKristau oSalau wa Omwene. Nto, ekeekhai ya Biibiliya yaahipacerya okhalana mitathaari vamurimani vaka.

Mwaha wa Biibiliya, miyo koowerya opaka mirukunuxo sinci. Miyo koohiya ompaha soona ni ohapaliwa. Koolokiherya omutthu aka ni inamuna soolavula. Nave, koorukunuxa moonelo aka voohimya sa makhulupale a mulaponi. (aRoma 13:1) Ohiya-vo, koohiya mweettelo aka wa enamuttompe, kahaareere aka osuweliwa mmuttettheni.

Etthu yootepa okivila waari okhalana moonelo wooloka voohimya sa makhuuru anikhaliherya idireito. Tthiri, nkaawenrye oturuka muupuwelo aka mowaakuveya. Wanipacerya, miyo kuupuwela wira kaarowa okhala oohiroromeleya akhala wira kaamuhiya okhaliherya makhuuru ale. Masi, kaahipacerya woona wira Omwene wa Muluku paahi tori nlipelelo neekeekhai na olumwenku ahu ola. Miyo kaahithanla orumeela ikuru saka sotheene kikhaliheryaka Omwene wa Muluku ni waakhaliherya akina wiixutta sa Omwene ola.​—Matheyo 6:33.

MOOTA OTTOTTENLE AKA MUREERELO: Vaavo kaamananiha aka orukunuxa olumwenku ntoko ativista, miyo kaanavalaanya atthu mwa igrupu piili: Atthu ooloka ni ootakhala. Nto kaanaanyokha ale kaaweha aka okhala ootakhala. Masi mwaha wa Biibiliya, miyo nkinaanyokha-tho akina. Kinnimananiha wunnuuherya ophenta waka wa eKristau wa atthu otheene. (Matheyo 5:44) Enamuna emosa yoopaka eyo, ori waalaleerya atthu awo ihapari sooreera sa Omwene wa Muluku. Kinnihakalala oweha moota muteko ola onooniherya omoriwa ikharari, onikumiherya aya murettele ni ohakalala, ni waaphwanyiha atthu yoolipelela ya ekeekhai.

Miyo koophwanya murettele mmuupuweleloni mwaha woomuhiyerya Yehova itthu sotheene. Kinnikupali wira owo, ntoko Mpattuxa, khonrowa weemya wira axinama ni apinaatamu ahaaxiwe mwa okathi wotheene, wala weemya wira elapo ela yooreera enyaanyiwe. Masi, orweela mwa Omwene awe, Muluku moohipisa onoolokiherya itthu sotheene sihononiwe. (Yesaya 11:1-9) Tthiri, osuwela ikeekhai iya sa Biibiliya ni waakhaliherya akina opaka eyo onnikihakalaliha vanceene. Vano miyo nkinuupuwela-tho wira kihaana orukunuxa olumwenku.

[Elatarato epaaxina 12]

[Elatarato epaaxina 12]

[Masu a elatarato]

Animalia

[Elatarato epaaxina 13]