2 Timootheyo 4:1-22
4 Kinnootumereryani oratteene, ohoolo wa Muluku ni wa Kristu Yesu, yoowo onrowa waaphukela atthu akumi ni alipa-ookhwa, okathi onrowa awe wooniheriwa vamosa ni Omwene awe:
2 Mulaleyeke nuulumo na Muluku; mukhaleleke nthiti olaleya nuulumo nlo okathi wooreerela ni wooxankiha; nwooniheryeke atthu vatthenke aya, mwaalopoleke oratteene, mwaatumereryeke mwaapixeryaka murima vanceene ni nwiixuttihaka saana.
3 Onoophiya okathi awo anrowa aya okhoottaka soowiixuttiha sooreera.* Anrowa ottharaka itthu aniphavela aya, ni anrowa owaavyaka alipa-oowiixuttiha wira aleeliweke itthu aniphavela aya wiiwa.
4 Anookhoottaka owiriyana ekeekhai, awiriyaneke myaha soowoothiwa.
5 Masi nyuwo muupuweleke saana mwa itthu sotheene, nvileleke mwaahaaxiwaka, muhihiyeke olaleya ihapari sooreera, nvareke muteko wa Muluku voomalela.
6 Miyo kinniivahererya ntoko eviinyu yaayiiheriwa valtaari, nave woopoliwa waka ori vakhiviru.
7 Miyo koowana ekhotto yooreera, kootthimaka mpakha ophiya oponta, kootthara waamini.
8 Vano Apwiya, yaawo aniphuka mwa xariya, aakisukerya ekhara. Ekhara eyo asukeriwe ale ari anaxariya. Apwiya anookitthuvela ekhara eyo nihiku noophukela. Khanrowa okivaha miyo paahi, masi-tho animwaavaha ale anlipelela vanceene wooniheriwa waya.
9 Mwiimananihe wira murwe nno voohipisa.
10 Dema ookihiya mwaha woowi onniphenta itthu sa olumwenku ola,* khurowa oTesaloonika. Vano Kresente oorowa oGalasia, nave Tito oronwe oDalmasia.
11 Nto Luka paahi tori ni miyo. Okathi onirwa anyu, mmuruuhe Marko, okhala wira owo onnikikhaliherya muteko wa Muluku.
12 Koomuruma Tiikhiko orowa wEefeso.
13 Okathi munirwa anyu, muruuhe ekasako aka kihiyale aka oTrowade, vatthokoni va Karpo. Nave-tho, muruuhe iroolu, vanceenexa iroolu sa esapala.
14 Alexandre, mulipa-oohana ekoopiri, khoreere okihaaxa. Masi Yehova onoomuliva ottharihaka miteko sawe.
15 Nyuwo-tho muhaana wiikasoopa nuuwo, okhala wira ookhootta vanceene itthu naalavula ahu.
16 Ekwaha yoopacerya kaixaakiha aka ohoolo wa makhulupale, khuuvo aakikhalihenrye, otheene aya yaahikihiya. Nto, Muluku ohaavahe nthowa atthu awo mwaha wa etthu eyo.
17 Masi Apwiya khiyaakihiyale mekhaka, awo yaahikivaha ikuru wira kilaleye moolumo otheene a Muluku, wira atthu a maloko otheene yiiwe. Nave, Apwiya aakoopola mwaano mwa kharamu.
18 Apwiya anookaakiherya itthu sotheene sootakhala ni anookoopola wira kikele Moomweneni mwaya wa wiirimu. Apwiya awo avuwihiwe mahiku otheene ni voohimala. Amen.
19 Munvahe makhomaso aka Priska ni Aakila, vamosa ni atthu a etthoko ya Onesiiforo.
20 Erasto oohala oKorinto, masi koomuhiya Troofimo owereiwaka, oMileto.
21 Mwiimananihe wira mphiye nno ehinatthi ophiya eyiita.
Eubulo, ni Pudenti, ni Lino, ni Klaudia, vamosa ni axinna otheene, annookhomasani.
22 Apwiya ekhale ni nyuwo mwaha wa mukhalelo wooreera munooniherya anyu. Oreera waya murima wuulupale okhale ni nyuwo.
Inoota
^ Aahiiso, “sooloka; siniphwanyiha mureerelo”.
^ Aahiiso, “okathi ola”. Nwehe Moolumo Ootthokiheriwa.
