Luka 3:1-38
3 Seettaka iyaakha 15, Tibeerio Seesari olamulelaka, ni Ponsio Pilato ori ene kuvernatoro a oYudeya, Herodi* aari namalamulela a edistritu ya oGalileya. Vano Filipe, munnawe Herodi, aari namalamulela a edistritu ya wItureya ni oTarakoniti, nto Lisaania aari namalamulela a edistritu ya Abileni,
2 mahiku a mukhulupale a anamukuttho Hanaaxi ni Kaifa. Mahiku awo, Muluku aahilavula ni Yohani, mwaana a Zakariya, moothakoni.
3 Vano Yohani aaheetteetta mapuro otheene yaattamenle muro Yordani, aalaleeryaka atthu wira opatiso ti ethoonyeryo ya orukunuxa murima, wira mutthu oleveleliwe itampi,
4 ntoko silempwale aya eliivuru ya profeta Yesaya, wira: “Nsu na mutthu ninnikhuwela moothakoni niiraka: ‘Mulokiherye ephiro ya Yehova! Mookolole istaraata sawe.
5 Malitti otheene yuuheeliwe, miyaako ni mattumuxa otheene sipwexakasiwe; iphiro sookottoopa sihaana wookololiwa, nave iphiro soothipakaseya, suuheeliwe.*
6 Atthu otheene anrowa woona woopola wa Muluku’”.*
7 Nto Yohani aahipacerya ohimeerya mittitthi sa atthu saarwa opatisiwa nuuwo, wira: “Nyuwo nloko na ivili, muleeliwe naani wira munoowerya otthyawa oviruwa wa Muluku, weiwo ohanle orwa?
8 Tivonto, nvareke miteko sinooniherya wira moorukunuxa murima. Nyuwo muhihimyeke wira: ‘Tiithi ihu ti Abrahamu’. Mweekeekhai, kinooleelani wira Muluku onniwerya otatuxa maluku ala wira ekhale anamwane a Abrahamu.
9 Tthiri, maxatto oolikana* wira iikitthe mitathaari sa miri. Tivo, khula mwiri ohiniima mihokorokho sooreera, onimwiikitthiwa oriheliwe vaikho”.
10 Nto mittitthi iye sa atthu saanimukoha Yohani wira: “Nto nipakeke exeeni?”
11 Owo aahaakhula oriki: “Mulopwana orina malaya manli, onvaheke nimosa ole ohirina. Nave ole orina yoolya, onvaheke ole ohirina”.
12 Nave-tho, alipa-ooliviha mpoosito yaahirwa wira apatisiwe. Awo yaanimukoha Yohani ariki: “Mwiixuttihi, nipakeke exeeni?”
13 Yohani aahiwaakhula wira: “Muliviheke paahi musurukhu wa mpoosito onivekeliwa ni nlamulo, masi muhincereryeke”.
14 Nave-tho, atoropa yaanimukoha wira: “Hiyo nipakeke exeeni?” Owo aahaahimeerya wira: “Muhimwiiyerye* aahiiso omootherya mutthu, masi muhakalaleke ni itthu munivahiwa anyu”.*
15 Vano atthu yaanilipelela vanceene orwa wa Mesiya. Tivo otheene aya yaanimuupuwelela Yohani vamurimani vaya ariki: “Khino ola ti Kristu?”
16 Yohani aahiwaakhula otheene aya oriki: “Miyo kinoopatisani ni maasi, vano onnoorwa mutthu oowerya okivikana miyo, yoowo kihimphwanela aka otaphula isantaalya sawe. Owo onrowa woopatisani ni munepa woowaarya ni mooro.
17 Nave ookuxa epoxolo mmatatani mwawe, wira ovalaanye etiriku ni ikavava.* Owo onrowa okwesa saana opuro oneepetthiwa etiriku, ni onoothukumanya etiriku mwaarumasiya. Masi ikavava* saya onrowa opaha ni mooro ohinttipha”.
18 Siiso, aanaatumererya atthu ni moolumo makina manceene, nave khaahiyererya waalaleerya ihapari sooreera.
19 Masi Yohani, aahimpwapwela Herodi, yoowo aari namalamulela, mwaha wa Herodiya, mwaara a muulupale awe, ni mwaha wa itthu sotheene sootakhala Herodi aapanke awe.
20 Tivonto, Herodi aahipaka-tho etthu ekina yootakhala: owo aahimutthukwela Yohani mukhatteya.
21 Vano, nuumala atthu otheene opatisiwa, nave-tho Yesu aahipatisiwa. Yesu ovekelaka, erimu yaahihuleya,
22 nto munepa woowaarya waahimukhuruwela wooneyaka ntoko epompa.* Nave, naahiiwanyeya nsu nikhumaka wiirimu, naahimya wira: “Nyuwo mwa Mwanaka, kinimphentexa aka, onikihakalaliha vanceene”.
23 Okathi Yesu aapacenrye awe muteko awe, aarina iyaakha soowiiraka 30. Atthu yuupuwela wira aari mwaanaa Yosefe,mwaana a Heli,
24 mwaana a Mathati,mwaana a Levi,mwaana a Melikhi,mwaana a Yanayi,mwaana a Yosefe,
25 mwaana a Matathiya,mwaana a Amosi,mwaana a Nahumi,mwaana a Esili,mwaana a Nagayi,
26 mwaana a Maathi,mwaana a Matathiya,mwaana a Semeyi,mwaana a Yosekhi,mwaana a Yoda,
27 mwaana a Yohanani,mwaana a Resa,mwaana a Zorobabeli,mwaana a Salathiyeli,mwaana a Neri,
28 mwaana a Melikhi,mwaana a Adi,mwaana a Kosami,mwaana a Elimadami,mwaana a Eri,
29 mwaana a Yesu,mwaana a Eliyezeri,mwaana a Yorimi,mwaana a Mathati,mwaana a Levi,
30 mwaana a Simeyoni,mwaana a Yuda,mwaana a Yosefe,mwaana a Yonami,mwaana a Eliyakimi,
31 mwaana a Meleya,mwaana a Mena,mwaana a Matatha,mwaana a Natani,mwaana a Davidi,
32 mwaana a Yese,mwaana a Obedi,mwaana a Bowazi,mwaana a Salimoni,mwaana a Naasoni,
33 mwaana a Aminadabi,mwaana a Arini,mwaana a Esironi,mwaana a Peresi,mwaana a Yuda,
34 mwaana a Yakobe,mwaana a Isaakhi,mwaana a Abrahamu,mwaana a Terahi,mwaana a Nahori,
35 mwaana a Serukhi,mwaana a Rewu,mwaana a Pelekhi,mwaana a Heeberi,mwaana a Xela,
36 mwaana a Kayina,mwaana a Aripakaxadi,mwaana a Semi,mwaana a Nowe,mwaana a Lameki,
37 mwaana a Metuxela,mwaana a Enokhi,mwaana a Yeredi,mwaana a Mahalaleli,mwaana a Kayina,
38 mwaana a Enoxi,mwaana a Sethi,mwaana a Adamu,mwaana a Muluku.
Inoota
^ Eyo piiyo, Herodi Antipa. Nwehe Moolumo Ootthokiheriwa.
^ Aahiiso, “sikhale sowaataleya”.
^ Aahiiso, “enamuna ya woopola wa Muluku”.
^ Aahiiso, “epaso yoolikana”.
^ Aahiiso, “Muhimuhaaxe”.
^ Aahiiso, “muhakalaleke ni musurukhu muniliviwa anyu”.
^ Aahiiso, “ikokhola”.
^ Aahiiso, “ikokhola”.
^ Aahiiso, “ekhuntta”.
