Luka 4:1-44
4 Yesu aahikhuma omuro Yordani. Muluku aahinvaha munepa woowaarya, nto munepa owo waahimuroiha moothakoni.
2 Weiwo, aahiviriha mahiku 40 eehereriwaka ni Diabo. Okathi owo wotheene khaalya etthu. Nto nuumala mahiku awo, Yesu aahivoliwa etala.
3 Vano, Diabo aahimuhimeerya Yesu wira: “Nyuwo mwaari mwaana a Muluku, murume nluku nla nithatuwe ephaawu”.
4 Masi Yesu aahimwaakhula oriki: “Voolempwa wira: ‘Mutthu khonikhala mukumi mwaha wa ephaawu paahi’”.
5 Vano, Diabo aahimuroiha Yesu nipuro noorakama, khimooniherya mwa okathi vakhaani omwene wotheene wa mulaponi.
6 Nto Diabo aahimuleela wira: “Kinimoovahani omwene ola wotheene ni ovuwa waya, okhala wira ti wawaka, nave kininvaha ole onimphavela aka.
7 Tivonto, mwakikokhorela ekwaha emosa paahi, wotheene ole onookhala wawinyu”.
8 Nto Yesu aahimwaakhula oriki: “Voolempwa wira: ‘Mmukokhoreleke Yehova Muluku anyu, ni mmurumeeleke yoowo paahi’”.
9 Nuumala-vo, Diabo aahimuroiha oYerusalemu, aahinweliha nipuro noorakamexa na etemplo, khumwiirela: “Nyuwo mwaari mwaana a Muluku, mutuphele vathi vale,
10 maana voolempwa wira: ‘Muluku onooruma malaikha awe’, nto ‘Awo animookhapelelani’,
11 nave ‘Animookaphulani mmatatani mwaya, wira inawu sanyu sihimane nluku’”.
12 Yesu aahimwaakhula oriki: “Voohimmwa wira: ‘Muhimweehererye Yehova, Muluku anyu’”.
13 Diabo aamalinhe awe omweehererya Yesu, aahimuhiya khurowa, mpakha okathi mukina wooreerela.
14 Yesu aahitthikela oGalileya osareyale ene ikuru sa munepa woowaarya. Nto ihapari sa miteko sawe sooreera, saahimwareela mapuro otheene a elapo ele.
15 Nave-tho, aahipacerya wiixuttiha musinagoga* mwaya, vano atthu yaanimulavula saana.
16 Yesu aahirowa oNazarethi, weiwo annuwale awe. Ntoko aalimalenle awe nihiku na saabadu, owo aahikela musinagoga,* eemela, onasoma Soolempwa.
17 Siiso, aahivahereriwa eroolu ya profeta Yesaya, aahitthukula eroolu eyo, ophwanya opuro waalempwale wira:
18 “Munepa wa Yehova ori ni miyo, okhala wira ookithanla wira kaalaleerye ihapari sooreera alipa-oohaawa. Owo ookiruma waaleela ale ari ipottha wira anootaphuliwa, ni owiiriha ale yahoona otthikela woona, ni waataphula ale anihaawa.
19 Nave, ookiruma waalaleerya atthu mwaakha wa oreera murima wuulupale wa Yehova”.
20 Vano Yesu aahikhuna eroolu eyo, omuttikiherya murumeyi, khukilaathi. Nto atthu otheene yaari musinagoga-mme,* yaaninwehexexa.
21 Yesu aahaaleela wira: “Yoolepa ela emanle anyu wiiwa, ehiiraneya olelo-va”.
22 Atthu otheene yaanimulavula saana Yesu, enatikinihiwa vanceene mwaha wa moolumo ooreera yaakhuma mwaano mwawe. Nto yaanikohana ariki: “Ola khahiyo mwaana a Yosefe?”
23 Vano Yesu aahaahimeerya wira: “Tthiri nyuwo munoorumeela masu ala mukihimyaka miyo, mwiiraka: ‘Nyuwo meetiku, mwiipenuxe mmansinyu. Nave-tho, mpake mmuttettheni mwanyu-mu, itthu niiwale ahu wira moopaka oKafarnawu’”.
24 Yesu aahaahimeerya wira: “Kinooleelani ekeekhai wira, khaavo profeta onittittimihiwa mmuttettheni mwawe.
25 Nave-tho, kinooleelani ekeekhai wira: Mahiku a profeta Eliya, yaahikhala athiyana anceene anaamukhweli wIsarayeli, okathi yahaarumpe aya epula mpakha iyaakha tthaaru ni miyeeri 6. Nto yaahikhumelela etala yuulupale elapo ele yotheene.
26 Hata vari siiso, Eliya khaarummwale waakhaliherya athiyana awo, masi aarummwale orowa wa muthiyana naamukhweli a oSarefati, elapo ya oSidoni.
27 Nave-tho, mahiku a profeta Eliseyo, yaahikhala anamakokho* anceene wIsarayeli. Hata vari siiso, khuuvo a yaawo aareerihiwe,* masi Naamani a oSiiria, taareerihiwe* paahi”.
28 Vano otheene ale yaiwa itthu iya musinagoga-mme,* yaahinanariwa vanceene.
29 Yaaheemela, anvara Yesu anamutthimakiha amuroihaka ota wa epooma. Nto yaahimuroiha oneri* wa mwaako, weiwo waari epooma, wira amukakhele vathi.
30 Masi Yesu aahivira eriyari aya, onarowa.
31 Nuumala-vo, Yesu aahikhuruwa onarowa oKafarnawu, epooma ya oGalileya. Nto owo aaniwiixuttiha atthu esaabadu.
32 Vano atthu yaahitikinihiwa vanceene ni moota aixuttiha awe, maana itthu aixuttiha awe saakhuma wa Muluku.
33 Musinagoga* aahikhala mulopwana mmosa, aavariwe ni nlaikha nootakhala. Mulopwana owo aahikhuwela ni nsu noorunya oriki:
34 “Khwaa! Exeeni erina anyu ni hiyo, nyuwo Yesu munazarethi? Murwenle onipwetexa? Kinnoosuwelani saana. Nyuwo murummwale ni Muluku!”
35 Vano Yesu aahipwapwela nlaikha nle nootakhala, oriki: “Mmaale! Mmukhume mutthu owo!” Nto nlaikha nle naahimurihela vathi mulopwana ole, eriyari ya atthu. Masi khinanvulalinhe.
36 Nuumala oweha etthu ele, atthu otheene yaahitikihiniwa vanceene, anahimeeryana wira: “Mmwiiweke moota onilavula awe! Onniwerya oruma malaikha ootakhala, nto awo anakhuma!”
37 Tivonto, ihapari sa Yesu saanimwareela mittetthe sotheene soowaattamela.
38 Akhumaka-ru musinagoga,* aahiphiya owannyawe Simoni. Vano amaathi awe Simoni, yiira ewereiwaka vanceene efeepere,* nto Yesu aahivekeliwa wira aakhaliherye.
39 Yesu aahuurama, aapenuxa efeepere* aya. Niinaano-ru, amaathi awe Simoni yaahivenya anapacerya owaapeela yoolya.
40 Nsuwa nikelaka-ru, Yesu aahiruuheliwa atthu yaawereiwa iretta soovirikana. Owo aaniwiixaatherya matata, onaapenuxa.
41 Nave-tho, malaikha ootakhala yaanaakhuma atthu anceene, anakhuwela ariki: “Nyuwo mwa Mwaana a Muluku”. Masi Yesu aanipwapwela malaikha awo, ni kheemererya wira elavuleke, maana yaanimusuwela okhala Kristu.
42 Nuumala oxa, Yesu aahirowa opuro wahaavira-viriwa. Masi mittitthi sa atthu saahimphavelasa,* khuphiya opuro aari awe. Awo yaaheererya omukhoottiherya okhuma opuro ole.
43 Vano Yesu aahaaleela wira: “Kihaana olaleya ihapari sooreera sa Omwene wa Muluku ipooma sikina, maana eyo ti etthu kirummwale aka”.
44 Tivo, aahirowa waalaleerya atthu a isinagoga* sa oYudeya.
Inoota
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “anamakuttula; anamaretta”.
^ Aahiiso, “aapenuxiwe”.
^ Aahiiso, “taapenuxiwe”.
^ Nwehe Moolumo Ootthokiheriwa.
^ Aahiiso, “oxepani”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “ettekuxa”.
^ Aahiiso, “ettekuxa”.
^ Aahiiso, “saahimuxaya”.
^ Nwehe Moolumo Ootthokiheriwa.
