Marko 9:1-50
-
Othatuwa wa Yesu (1-13)
-
Mmiravo aavariwe nlaikha nootakhala onnipenuxiwa (14-29)
-
Wa ale arina waamini, itthu sotheene sinniweryaneya (23)
-
-
Okhwa wa Yesu onnihimmwa-tho vahinatthi (30-32)
-
Awiixutti anninyakulihana mwaha wa okhulupale (33-37)
-
Ole ohinnivirikanya, ori ni hiyo (38-41)
-
Itthu sinitthekiha (42-48)
-
“Mukhalaneke maakha mookumini mwanyu” (49, 50)
9 Yesu aahaahimeerya-tho wira: “Kinooleelani ekeekhai wira, aakhala ari vaava ahinrowa okhwa, ahoonale toko Omwene wa Muluku orwaaka ni owerya”.
2 Nuuvira mahiku 6, Yesu aahimukuxa Pedru, Yakobo ni Yohani, khurowa ni yaawo paahi vamwaako woorekama. Vano, Yesu aahithatuwa ohoolo waya.
3 Malaya awe a ota yaanaarya vanceene ni yaahitteela vanceene. Nto olumwenku wotheene, khuuvo mulipa-ookattha ikuwo aarowa otteeliha siiso.
4 Nave, Eliya ni Moise yaahikhumelela, enavaanela ni Yesu.
5 Nto, Pedru aahimuleela Yesu wira: “Rabi,* vaareera hiyo okhala vaava. Nrowe nteke iheema tthaaru, emosa yawinyu, ekina ya Moise, nave-tho ekina ya Eliya”.
6 Tthiri Pedru khaasuwela yoohimya, maana awo yaamoova.
7 Nave naahikhumelela neeku, naakhuneela. Vano, naahiiwanyeya nsu nikhumaka muneekuni-mmo, naahimya wira: “Ola Mwanaka, kinimphentexa aka. Mmwiiweleleke yoowo”.
8 Niinaano-ru, awiixutti yaahiwehaweha, masi khiyaamoonale mutthu mukina ohikhanle Yesu paahi.
9 Okathi yaakhuruwa aya vamwaako, Yesu aahaalopola oratteene awiixutti ale, wira ahimuleele mutthu itthu iye soonale aya, Mwaana a mutthu ohinatthi ohihimuxiwa mookhwaani.
10 Awo yaahiiwelela* moolumo a Yesu, masi nlelo yaanikohana ele Yesu aaphavela awe ohimya ni moolumo oowi ohihimuxiwa mookhwaani.
11 Nto, yaahipacerya omukoha Yesu ariki: “Xeeni, alipa-oowiixuttiha Nlamulo anihimya aya wira Eliya ohaana opacerya orwa ohinatthi Kristu?”
12 Yesu aahiwaakhula oriki: “Tthiri, Eliya tonrowa opacerya orwa wira olokiherye itthu sotheene. Nto, vanikhala sai olempwa wira Mwaana a mutthu ohaana ohaaxiwa vanceene ni onyoholiwa?
13 Masi kinooleelani wira Eliya ohoorwa tthiri. Nave ntoko silempwale aya ni Nuulumo na Muluku, awo aamwiiriha sotheene saaphavela aya”.
14 Nuumala ophiya waari awiixutti akina, yaahiphwanya muttitthi muulupale wa atthu waarukurenrye ene, vamosa ni alipa-oowiixuttiha Nlamulo, avaanyihanaka ni awiixutti ale.
15 Muttitthi ole wa atthu omoonaka-ru Yesu, waahitikinihiwa vanceene, onamutthimakela wira omukhomase.
16 Siiso, Yesu aahaakoha iiraka: “Exeeni munivaanyihana anyu?”
17 Nto mutthu mmosa aari ni muttitthi owo, aahimwaakhula wira: “Mwiixuttihi, kihooruuhelani mwanaka mwaamulopwana okhala wira ovariwe ni nlaikha nootakhala nimmwiiriha ohilavula ni ohiiwa.
18 Nlaikha nlo nuumala onvara, ninnimurihela vathi, onakhuma nipheru mwaano ni onalumanyiha maino, nave khonikhalana ikuru. Kihaavekela awiixutti anyu wira yoomole, masi awo khawenrye”.
19 Yesu aahaakhula oriki: “Nyuwo atthu oohaamini! Kinrowa okhala ni nyuwo mpakha silini? Kinrowa woovilelani mpakha silini? Mukiruuhele-va”.
20 Tivonto, yaahimuroihela Yesu mwammiravo owo. Okathi nlaikha naamoonale aya Yesu, naahimurihela vathi mwaana ole. Nuumala omorela vathi, aanuupuruwa okhumaka nipheru mwaano.
21 Nto Yesu aahimukoha paapa awe mwaana ole, oriki: “Opacenrye silini wira siisa?” Paapa awe aahaakhula wira: “Opacenrye ori ene mwaamukhaani,
22 nave ikwaha sinceene, nlaikha nlo ninnimurihela vaikho ni mmaasini, niphavelaka omwiiva. Masi vakhala wira munniwerya ompenuxa, munimorele ikharari ni munikhaliherye”.
23 Yesu aahimuhimeerya oriki: “Xeeni ohimyaka wira ‘Vakhala wira munniwerya’? Wa ale arina waamini, itthu sotheene sinniweryaneya”.
24 Niinaano-ru, paapa awe mwaana ole aahikhuwela, iiraka: “Miyo kinnaamini! Mukikhaliherye wuncererya waamini waka!”
25 Okathi Yesu aawenhe awe muttitthi ole omutthimakelaka, aahipwapwela nlaikha nle nootakhala, oriki: “Weyo nlaikha nootakhala, nihiniiwa ni nihinlavula, ti miyo kinooruma wira omukhume mwammiravo ola, ni ohimutthikele-tho!”
26 Nuumala okhuwela vanceene ni omuthukumeliha vaalupale, nlaikha nle naahimukhuma. Vano mwaana ole aakhala ntoko orimookhwa. Nto atthu anceene yaahimya wira: “Ohookhwa!”
27 Yesu aahinvarela ntata, khunvenxa. Owo aaheemela.
28 Nuumala Yesu ophiya vatthokoni, awiixutti awe yaahimukoha wiiphiini, ariki: “Xeeni nihiwenrye ahu woomola nlaikha nle nootakhala?”
29 Yesu aahiwaakhula wira: “Muthinto ola wa nlaikha nootakhala, khuuvo oniwerya woomola, ohipanke nivekelo”.
30 Yesu ni awiixutti awe yaahikhuma vale, anavira oGalileya, masi owo khaaphavela wira atthu asuwele vaari awe.
31 Yesu iira owiixuttihaka awiixutti awe, ni aaleelaka wira: “Mwaana a mutthu onrowa ovarihiwa ni ovahereriwa mmatatani mwa atthu, awo anrowa omwiiva. Hata amwiivaka, onrowa ohihimuxiwa nihiku na neeraru”.
32 Nnaamwi vari siiso, awo khiyaiwexenxe moolumo awe, ni yaanoova omukoha.
33 Vano yaahiphiya muttetthe wa oKafarnawu. Okathi aari awe mpaani, Yesu aahaakoha awiixutti awe wira: “Exeeni mwaanyakulihana anyu mustaraatani?”
34 Vano awo yaaroomaala, maana mustaraatani yaaninyakulihana wira ti pani aari mukhulupale.
35 Yesu aahikilaathi, owiihana arummwa 12, onaahimeerya wira: “Ole oniphavela okhala oopacerya eriyari anyu, ohaana okhala ookiserya ni ohaana okhala murumeyi anyu”.
36 Vano Yesu aahimukuxa mwanamwane mmosa, omweemexa eriyari aya. Nuumala-vo, aahimukhupaarela, onaahimeerya awiixutti awe wira:
37 “Ole onimwaakhela mwanamwane ntoko ola, mwaha wa nsina naka, onikaakhela miyo. Nave, ole onikaakhela, khonikaakhela miyo paahi, masi-tho onimwaakhela Ole okirumme”.
38 Yohani aahimuhimeerya Yesu wira: “Mwiixuttihi, nonweha mutthu oomolaka malaikha ootakhala mwa nsina nanyu. Nto hiyo niheererya omukhoottiherya, maana kheetta ni hiyo”.
39 Masi Yesu aahihimya wira: “Muheererye omukhoottiherya, okhala wira khuuvo onivara miteko sootikiniha mwa nsina naka, nuumala-vo onakihimyana itthu sootakhala.
40 Tthiri, ole ohinnivirikanya, ori ni hiyo.
41 Nave, kinooleelani ekeekhai wira, ole onoovahani maasi oowurya mwaha wookhala awiixutti a Kristu, tthiri khonrowa wooceela waakhela etthuvo awe.
42 Masi, ole onimwiiriha mmosa a acikhaani ala anikaamini, ohiya waamini, fataari aatthukweleliwe muxikoni nluku nuulupale, khuriheliwa mphareya.
43 “Akhala wira ntata nanyu ninnootthekihani,* mwiikitthe. Fataari ophwanya okumi mututhunyaka, ohikhanle oriheliwa ni matata oomanli oGehena,* weiwo mooro ohinttipihiwa aya.
44 *——
45 Akhala wira nnawu nanyu ninnootthekihani,* mwiikitthe. Fataari ophwanya okumi murakanle ene, ohikhanle oriheliwa ni inawu soopiili oGehena.*
46 *——
47 Nave-tho, akhala wira niitho nanyu ninnootthekihani,* murihele ottaiwene. Fataari okela Moomweneni mwa Muluku murina ene niitho nimosa, ohikhanle oriheliwa oGehena,* murina ene maitho oomanli,
48 weiwo miyunku sihinikhwa aya, ni mooro ohinttipihiwa aya.
49 “Tthiri atthu otheene ahaana weeleeliwa ni mooro.
50 Maakha etthu yooreera. Masi, maakha yahiya osiva waya, munrowa owerya sai ottikiherya osiva waya maakha awo? Mukhalaneke maakha mookumini mwanyu, ni mukhalaneke murettele mukina ni mukhwaawe”.
Inoota
^ Aahiiso, “Mwiixuttihi”.
^ Aahiiso, woonasa wene: “Awo yaahiisukerya mmensaya”.
^ Ekereku, “ninnookwattulihani”.
^ Nwehe Moolumo Ootthokiheriwa.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Ekereku, “ninnookwattulihani”.
^ Nwehe Moolumo Ootthokiheriwa.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Ekereku, “ninnookwattulihani”.
^ Nwehe Moolumo Ootthokiheriwa.
