Masaalimu 31:1-24
Para tiretoore a isipo. Esaalimu ya Davidi.
31 Yehova, miyo kootthyawela wa nyuwo.
Kihikhala-khale kuuliwaka muru.
Mukoopole, mwaha wa exariya anyu.
2 Mukiwiriyane.*
Mwaakuve, murwe mukoopole.
Mukhale mwaako kinitthyawela aka,Nipuro noolipihiwa wiira mukoopole.
3 Nyuwo mwa mwala aka ni empa aka yoolipihiwa;Mwaha wa nsina nanyu, munrowa okihoola ni okooniherya ephiro.
4 Nyuwo munookoopola mmatthavini anireiwa wiira akivare,Okhala wiira nyuwo mwa empa aka yoolipihiwa.
5 Kinnoovahereryani okumi* aka mmatatani mwanyu.
Nyuwo Yehova, Muluku eekeekhai,* mookoopola.
6 Kinnaanyokha ale anaakokhorela amuluku eethiru, ahirina efaita,Masi miyo, kinimuroromela Yehova.
7 Kinootteeliwa murima vanceene, mwaha wa ophenta wanyu woororomeleya,Okhala wiira munniweha ohaawa waka;Nave munnisuwela wiira kooxanka vanceene.
8 Khamukivaherenrye mmatatani mwa awanani,Masi mookeemexa nipuro noovareleleya.
9 Khoo Yehova, mukireerele murima, okhala wiira kooxanka.
Maitho aka ni erutthu aka yootheene, sootteettheya mwaha wooxanka.
10 Okumi aka woosareya oriipiwa murima,Nave iyaakha saka soosareya wuupulela.
Ikuru sinnikimalela mwaha wa etampi aka;Makhuva aka aatteettheya.
11 Awanani aka ootheene annikitheya,Vanceenexa ale kaattamanne aka.
Ale kinaasuwela aka, annikoova vanceene;Okathi anikiweha aya nipuro noowaatta atthu, awo annikitthyawa.
12 Awo aakikumiha vamurimani vaya* ni aakiliyala, okhalaka ntoko kirimookhwa;Kiri ntoko murinki woophweeya.
13 Kinniiwa itthu sinceene sootakhala sinilavuliwa;Kinnoova vanceene.
Awo annithukumana poromosa, anampaka palano wiira akiive.Annimpaka palano wiira akiive.
14 Masi miyo kinoororomelani nyuwo Yehova.
Miyo kinnihimya wiira: “Nyuwo mwa Muluku aka”.
15 Mahiku aka ari mmatatani mwanyu.
Mukoopole mmatatani mwa awanani aka, ni mmatatani mwa ale anikilupattha.
16 Mmureerele murima murumeyi anyu.
Mukoopole mwaha wa ophenta wanyu woororomeleya.
17 Xontte Yehova, kihuuliwe muru okathi kiniwiitthanaakani.
Atakhali yuuliwe muru;Aroihiwe Mmahiye* ni amaalihiwe.
18 Nwale iyano sa anawoothe,Yaawo anilavula voowiixinnuwiha ni anaathanya anaxariya.
19 Oreera wanyu murima ti wuulupale!
Nyuwo muhaasukerya ale aniwoovani, yaale anitthyawela wa nyuwo.Nave muhooniherya eyo wa atthu ootheene.
20 Nyuwo munrowa waavitha nipuro nanyu noowiipitheya,Wiira nwaakiherye wa atthu ootakhala anaapakela apalano;Munoowiipithiha mutentani mwanyu,Wiira ahitupheliwe ni atakhali.
21 Ottottopeliwe Yehova,Okhala wiira ookooniherya ophenta wawe woororomeleya mwa enamuna yootikiniha, kiri ene epooma erukureriwe ni awanani.
22 Miyo kihoova, kinahimya wiira:
“Kinoopwetexiwa ohoolo wanyu”.
Nyuwo mookiiwa okathi kaakhuwela aka, kivekaka okhaliheriwa.
23 Mumphenteke Yehova, nyuwo ootheene oororomeleya wa yena!
Yehova onnaakhapelela atthu ororomeleya,Masi onrowa waahukhumu vanceene ale oowiittottopa.
24 Mulipe murima ni mwiilipihe,Ootheene nyuwo munimulipelela Yehova.
Inoota
^ Aahiiso, “Muurame ni mukiiwe”.
^ Eheeperi, ruach, nintaphulela “ikuru sa okumi”.
^ Aahiiso, “Muluku oororomeleya”.
^ Aahiiso, “mmuupuweloni mwaya”.
^ Nwehe Moolumo Ootthokiheriwa.
