Wiisuupulula 4:1-11
4 Nuumala itthu iya, kaahiweha mukhora woohuleya wiirimu. Nsu noopacerya kaiwale aka nikilavulihaka, naalikana ni nlope, nihimyaka wira: “Nwele-va, miyo kinoowooniheryani itthu sinrowa wiiraneya nuumala itthu iya”.
2 Nuumala-vo, niinaano-ru, kaahaakhela munepa woowaarya, nto kaahiweha ehice epwehiwe ene nipuro naya wiirimu, nave kaahimoona mutthu okilanthi ene veehiceni-vo.
3 Ole aakilanthi veehiceni, mukhalelo awe waalikana ni nluku nniihaniwa xaspe ni sartio,* nave ehice yotheene yaahirukureriwa ni ekhweyi, yaalikana ni esmeralta.*
4 Ehice ele, yaahirukureriwa ni ihice 24, ni kaahiwoona axitokweene 24 akilaathenle ene ihice iyo, ewanre ene malaya ootteela, nave yaahiwara vamuru ikhara sa eweero.
5 Veehiceni-vo, waanikhuma overunya, ni masu, ni okukutteya. Nave saahikhala mithuko 7, seiyo saapatta ohoolo wa ehice. Mithuko iyo, sinithoonyerya minepa 7 sa Muluku.
6 Ohoolo wa ehice ele, naahikhala ntthiya na maasi, naalikana ni eviituru aahiiso ekiristaale.*
Mukerekhere mwa ehice, khula mpantta saahikhala soopattuxiwa sikumi ixexe, saasareiye maitho, ohoolo ni ottuli.
7 Yoopattuxiwa ekumi yoopacerya, yaalikana ni kharamu, ni yoopattuxiwa ekumi ya nenli, yaalikana ni mwaanyompe, ni yoopattuxiwa ekumi ya neeraru, owiitho waya waalikana ni owiitho wa mutthu, nave yoopattuxiwa ekumi ya neexexe, yaalikana ni murumaasi onivava.
8 Vano, soopattuxiwa sikumi ixexe, khula yoopattuxiwa ekumi yaahikhalana mapupha 6, yaawo yaasareiye maitho. Othana ni ohiyu, voohihiyererya, saanihimya wira: “Oowaarya, oowaarya, oowaarya ti Yehova Muluku Oowerya Sotheene, yoowo aakhanle, ni onikhala ni onirwa”.
9 Khula okathi soopattuxiwa sikumi ixexe sininvuwiha aya, ni omuttittimiha ni omuxukhurela Ole okilanthi veehiceni, yoowo onikhala mahiku otheene ni voohimala,
10 nto axitokweene 24 annikhoroma ohoolo wa Ole okilanthi veehiceni, anamukokhorela yoowo onikhala mahiku otheene ni voohimala, ni annipweha ikhara saya ohoolo wa ehice, anahimya wira:
11 “Yehova, Muluku ahu oowerya, nyuwo munniphwanelela waakhela ovuwa ni nttittimiho, okhala wira moopattuxa itthu sotheene, nave itthu sotheene sinnikhala, mwaha woowi ti siiso mphavenle anyu”.
Inoota
^ Aahiiso, “nluku nooxeerya na efaita yuulupale”.
^ Nluku nooripelela na efaita yuulupale.
^ Nluku noowaarya ni noowooneela.
