Yohani 3:1-36
3 Aahikhala nfarisi mmosa, aihaniwa Nikodemo, yoowo aari muhooleli a ayuda.
2 Ohiyu, owo aahirowa okumana ni Yesu, onamuhimeerya wira: “Rabi, hiyo noosuwela wira mwa mwiixuttihi onikhuma wa Muluku, okhala wira khuuvo oniwerya opaka miiriirya iya munipaka anyu, ohikhaliheriwaka ni Muluku”.
3 Yesu aahimwaakhula wira: “Kinooleelani ekeekhai wira, vahikhanle wira mutthu orooyariwa vasya,* khonwerya okela Moomweneni mwa Muluku”.
4 Nikodemo aahimukoha Yesu wira: “Vaniweryaneya sai mutthu oyariwa onnuwale ene? Khuuvo oniwerya otthikela mmirimani mwa amamawe wira oyariwe-tho”.
5 Yesu aahaakhula oriki: “Kinooleelani ekeekhai wira, vahikhanle wira mutthu oyariwe ni maasi ni munepa woowaarya, khonwerya okela Moomweneni mwa Muluku.
6 Ole oyariwe ni mutthu, ti mwaana a mutthu, masi ole oyariwe ni munepa woowaarya, ti mwaana a Muluku.
7 Muhitepe otikinihiwa mwaha wa wooleelani wira: Nyuwosa muhaana oyariwa vasya.
8 Epheyo, enoopela opuro eniphavela aya. Nyuwo munniiwa oruma waya, masi khamunisuwela onikhuma aya aahiiso onikela aya. Nto ale aniyariwa ni munepa woowaarya, ari siiso”.
9 Nikodemo aahimukoha Yesu oriki: “Eyo eniweryaneya sai?”
10 Yesu aahimwaakhula wira: “Nyuwo mwa mwiixuttihi a wIsarayeli. Nlelo khamunisuwela itthu iya?
11 Kinooneelani ekeekhai wira, hiyo ninlavula itthu ninsuwela ahu, nave ninnikhalela onamoona itthu soonale ahu. Masi khamuneemererya onamoona ninvaha ahu.
12 Miyo kinnooleelani itthu siri valaponi, masi nyuwo khamunikupali. Ankhi kooleelani itthu siri wiirimu, munrowa okupali sai?
13 Khuuvo mutthu otonko owela wiirimu, ohikhanle paahi ole okhurunwe wiirimu, Mwaana a mutthu.
14 Siisaale Moise aathomeiye awe enowa vamwirini ori ene moothakoni, siiso-tho atthu anrowa omuthomeya Mwaana a mutthu,
15 wira otheene ale animukupali, aphwanye okumi woohimala.
16 “Tthiri, Muluku oophentexa olumwenku,* mpakha onvaha Mwanawe mmoseene, wira otheene ale anooniherya omwaamini yoowo, ahipwetexiwe, masi akhalane okumi woohimala.
17 Veekeekhai, Muluku khomurumme Mwanawe orwa vathi-va wira ophukele olumwenku, masi omurumme wira olumwenku woopoliwe mwaha wa yoowo.
18 Ole onooniherya omwaamini yoowo, khonrowa ophukeliwa. Ole ohinimwaamini, oophukeliwa, okhala wira khaaminni nsina na Mwaana mmoseene a Muluku.
19 Mweekeekhai, muthuko ohoorwa moolumwenkuni, masi atthu khaniphenta muthuko, aniphenta epiphi, maana awo annipaka itthu soohiloka. Tivo awo anrowa ophukeliwa.
20 Tthiri, ole onipaka itthu sootakhala, onninyokha muthuko, nave khonaattamela muthuko, wira muthuko owo ohooniherye miteko sawe sootakhala.
21 Masi ole onipaka itthu sooloka, onnaattamela muthuko, wira miteko sawe sooneyeke, okhala wira miteko iyo soovariwa ntoko Muluku oniphavela awe”.
22 Nuumala-vo, Yesu ni awiixutti awe yaahirowa mmuttettheni mwa oYudeya. Nto, aahikhala weiwo ni awiixutti awe okathi vakhaani, nave aanaapatisa atthu.
23 Masi-tho, Yohani aapatisa atthu wEnoni, waattamela oSalimi, maana yaahikhala maasi manceene opuro ole. Nto atthu yaanirowa wira apatisiwe.
24 Yohani iira nlelo oriheliwe ene mukhatteya.
25 Vano awiixutti a Yohani yaanivaanyihana ni muyuda mmosa, mwaha wa oreerihiwa.
26 Siiso, awo yaahirowa wa Yohani anamuhimeerya wira: “Rabi,* munnimuupuwela mulopwana yoole mwaamuhimya anyu ni aari ni nyuwo okhopela wa muro Yordani? Owo onaapatisa atthu. Nave atthu otheene annirowa wa yoowo”.
27 Yohani aahaakhula oriki: “Khiivo etthu mutthu onaakhela awe, ohivahiwe wiirimu.
28 Nyuwo mmansinyu mwa anamoona a itthu kaahimmye aka wira: ‘Miyo nkihiyo Kristu, masi kirummwale orowa ohoolo wawe’.
29 Muthiyana onoivariwe,* tawawe ole omunoivanri.* Masi mpatthani awe ole onoivanri,* okathi oneemela awe onanwiriyana ole onoivanri,* onnitteeliwa murima vanceene, mwaha wa omwiiwa ole onoivanri.* Siiso, otteeliwa waka murima woomalelihiwa.
30 Miteko sa Kristu sihaana wunnuwaka, vano miteko saka sivukuweke”.
31 Ole onikhuma osulu ti muulupale waavikana atthu otheene. Ole onikhuma vathi, ta vathi vaava, ni onilavula itthu sa vathi. Ole onikhuma wiirimu, ti muulupale waavikana atthu otheene.
32 Owo onnikhalela onamoona itthu oonale awe ni iiwale awe, masi khuuvo onikupali onamoona awe.
33 Ole okupanli onamoona awe, oheemererya wira Muluku teekeekhai.
34 Tthiri, ole orummwale ni Muluku, onilavula itthu sinihimya awe Muluku, okhala wira Muluku onninvaha munepa woowaarya voohiphima.
35 Tiithi onnimphenta Mwaana, nave onvahererya itthu sotheene mmatatani mwawe.
36 Ole onooniherya omwaamini Mwaana, ookhalana okumi woohimala; vano ole ohinimwiiwelela Mwaana, khonrowa ophwanya okumi owo, masi oviruwa wa Muluku onrowa okhala ni yoowo.
Inoota
^ Aahiiso, woonasa wene: “oyariwa osulu”.
^ Anihimmwa atthu a moolumwenkuni.
^ Aahiiso “Mwiixuttihi”.
^ Aahiiso, “aakameliwe”.
^ Aahiiso, “omwaakamenle”.
^ Aahiiso, “aakamenle”.
^ Aahiiso, “aakamenle”.
^ Aahiiso, “aakamenle”.
