Yoobi 26:1-14
26 Yoobi aahaakhula iiraka:
2 “Munoona wiira moomukhaliherya mutthu ohirina owerya?
Moomoopola mutthu ohirina ikuru?
Nnaari!
3 Munoona wiira monvaha miruku sooreera mutthu ohirina ankhili?
Moomooniherya miruku sanyu ni murima wootheene?*
Nnakhala vakhaani!
4 Ti pani muneererya anyu omulavuliha,Nave miruku iya mphwannye woowi?
5 Alipa-ookhwa, yaawo ahirina owerya, annittettemela ohoolo wa Muluku;Atthu awo ari vathi-xa ovikana maasi a mphareya, ni itthu sinikhala mphareya memmo.
6 Khiivo etthu eri Mmahiye* enivitheya vamaithoni va Muluku,*Owo onniwerya oweha opuro erutthu enipwetexiwa aya.*
7 Owo ohaatala erimu opuro ohikhanle etthu,Oothomeya elapo ehivareleliwe ni etthu;
8 Onnithukumanya maasi mmeekuni,Masi meeku awo khaniphuleya mwaha wa olemela waya;
9 Owo onnittiyelela ehice awe,Onakhuneela ehice eyo ni neeku.
10 Oohela mukano eriyari ya erimu ni ephareya;Oohela mukano eriyari ya okokola ni epiphi.
11 Ipilaari sa wiirimu sinnittikinyeya;Iyo sinnittettemela mwaha wa opwapweliwa ni Muluku.
12 Ni ikuru sawe, onniiriha ephareya okhala yootupa,Ni ankhili awe, onnithikilasa enama yuulupale ya mphareya yoowoopiha.*
13 Ni iphumu* sawe, onniiriha erimu okweereya;*Ni ntata nawe, onniiva enowa eniipurula.
14 Moone! Itthu iya sootheene, ti epantte yaamukhaani ya miteko sawe;Mpakha-va, itthu sawe niiwale ahu siri vakhaani!
Nto ti pani oniwerya osuwela saana okukutteya wawe wuulupale?”
Inoota
^ Aahiiso, “voowaatta”.
^ Nwehe Moolumo Ootthokiheriwa.
^ Eheeperi, “Owo”.
^ Aahiiso, “Abadoni”.
^ Eheeperi, “Rahaabi”.
^ Aahiiso, “epheyo”.
^ Aahiiso, “ohikhala meeku”.
