Yoobi 36:1-33
-
Elihu onnivuwiha okhulupale wa Muluku (1-33)
36 Elihu aahilavula-tho oriki:
2 “Mukipixerye murima vakhaani, okathi kinilavula aka,Nlelo kookhalana moolumo anikhuma wa Muluku, wiira kilavule.
3 Kinoohimya itthu sootheene kinisuwelaka,Nave kinoomuhimya Mpattuxa aka okhala naxariya.
4 Mweekeekhai, moolumo aka khahiyo toowootha;Moolumo ala anikhuma wa Ole onisuwela itthu sootheene.
5 Tthiri, Muluku toowerya ni khonimukhootta mutthu;Owo onnisuwela itthu sinceene.
6 Owo khonrowa okhapelela okumi wa atakhali;Masi onoowiirela exariya ale anihaaxiwa.
7 Khonihiya waawehexexa anaxariya;Onniwiiriha okhala mamwene,* ni annivuwihiwa mahiku ootheene.
8 Masi akhala wiira aatthukiwa ni ikwirinti,Ni annihaawa mwaha woowi aatthukiwa,
9 Muluku onniwooniherya etthu apanke aya,Onniwooniherya itampi apanke aya mwaha wa wiixinnuwiha waya.
10 Owo onnitthukula maaru aya wiira yiiwe waattaruxa wawe,Ni onnaaleela wiira attharuwe ovara itthu sootakhala.
11 Akhala wiira anoomwiiwelela ni anoomurumeela,Anookhalaka saana mpakha okhwa,Nave iyaakha saya sinrowa okhala soohakalaliha.
12 Masi yaahimwiiwelele, animwiiviwa ni espaata,*Nave animookhwa ahisuwelaka etthu.
13 Atthu ootakhala murima anninanariwa.
Awo khanivekela okhaliheriwa hata okathi onaahukhumu awe.
14 Awo annookhwa nlelo ari ene amiravo,Okumi aya wootheene, aniviriha* ari ene ni alopwana anamararuwa a mutemplo.
15 Masi Muluku,* onniwoopola atthu oohaawa okathi anihaaxiwa aya;Onnitthukula maaru aya okathi anihasuliwa aya.
16 Owo onniwaakihani moohaawani,Onooroihani nipuro noovareleleya nihikhanle mixankiho,Weiwo munrowa anyu omaalihiwa ni eyoolya yoowaatta vameesa vanyu.
17 Nyuwo munootteeliwa murima mwaha wa ophukeliwa wa atakhali,Nihiku anrowa aya ophukeliwa ni enrowa aya okhalihiwa exariya.
18 Masi mukhalane ephoole wiira onanariwa wanyu ohiwiiriheni okhala mutthu oothanya,Nave muheemererye wiira okunyariwa woohapuxeni.
19 Niireke mwaamukhuwela nvekelaka nikhaliheryo,Aahiiso wiimananiha wanyu wuulupale waamurowa owoopolani okathi wa mixankiho?
20 Muhinleleke wiira vailale,Okathi yoowo atthu anikhwa aya voowaakuveya.
21 Muhithanleke ovara itthu sootakhala,Ohiya-vo, muthanleke ovilela ohaawa.
22 Moone! Muluku onnivuwihiwa mwaha wa owerya wawe;Mwiixuttihi xeeni onlikana nuuwo?
23 Ti pani otonko omwiirela Muluku wiira:‘Nvare ela’?Aahiiso omwiirela wiira: ‘Etthu mpanke anyu ti yoohiloka’?
24 Muhiliyale ovuwiha miteko sawe,Seiyo atthu anceene aniipela aya masipo.
25 Atthu ootheene anniweha miteko iyo,Pinaatamu onniweha ori ene ottaiwene.
26 Hiyo khaninwerya osuwela munnuwelo wa owerya wa Muluku;Iyaakha sawe khasinkontareya.
27 Muluku onniiriha maasi okhala etthapwe, enarowa musulu;Nto etthapwe eyo ennuupaana, enakhala epula;
28 Nuumala-vo, meeku annimwarexela maasi vathi;Meeku awo annirupihela epula vathi, anaavaha maasi atthu ootheene.
29 Niireke ookhala onisuwela moota meeku anaataleya aya,Ni onisuwela okukutteya onikhuma opuro onikhala awe?*
30 Nkawehani moota onaatala awe etari mmeekuni,Nkawehani moota onikhuneela awe ni maasi ephareya yoowiixa.
31 Owo onnirumeela itthu iyo wiira aalyihe* atthu;Onnaavaha eyoolya yoowaatta.
32 Owo onnittiyelela etari ni matata awe,Nave onniiriha etari eyo omana nipuro oniphavela awe.
33 Okukutteya wawe onnilaleya orwa wawe,Hata mihuwo sinnimulaleya ole* onrwa.
Inoota
^ Aahiiso, woonasa wene: “Onnaakhaliha mamwene”.
^ Aahiiso, “xoowa”.
^ Aahiiso, woonasa wene: “emalelo”.
^ Eheeperi, “Owo”.
^ Eheeperi, “muxaxa”.
^ Aahiiso, woonasa wene: “waakiha mulattu wa”.
^ Aahiiso, woonasa wene: “ele”.
