1, 2. Muhimye moota Maria seettale awe, ni etthu yiiriha ohikhala vookhweya mukwaha eetta awe.

MARIA iira eettale ene iwoora sinceene orowaka oBethelehemu. Nto mwaha wootemwa, aahipacerya orukunuwela epantte ekina okilaathale ene vasulu va mwabuuru oriki mweetta. Yosefe aari ohoolo wira omweettiheke mwabuuru ephiro ele yoorakama enirowa oBethelehemu. Maria aahitthikela-tho woona weeteteya wa mwaana aamurupanle awe.

² Vano Maria iira ohalaka vakhaani oyara, maana Biibiliya onihimya wira Maria iira arupanle ene nihalaka ophiya nihiku nawe nooyara. (Luka 2:5, 6) Okathi Maria ni Yosefe yeetta aya aviraka ematta ti ematta, woonasa wene atthu akina yaala wala olima yaaniikoha ariki: xeeni muthiyana orupanle siisa oneetta awe mukwaha. Exeeni yaamwiirihale Maria orakamela muttetthe awe, oNazarethi?

3. Muteko xeeni aavahiwe awe Maria, ni etthu xeeni enrowa ahu ophavela wiixutta?

³ Khalai myeeri sivinre, mwali ola muYuda aahivahiwa muteko ohitonko wiireya wa apinaatamu otheene. Owo aarowa omuyara mwaana yoowo ohoolo waya aarowa okhala Mesiya, niire so, Mwaana a Muluku! (Luka 1:35) Nto vahalaka vakhaani oyariwa mwaana owo, Maria aahaana opaka mukwaha omanle ohimmwa. Eettaka mukwaha ole, Maria aahikumana mixankiho seehererya waamini wawe. Nrowe niwehe etthu yaamukhalihenrye ovikaniha olipiha waamini wawe.

4, 5. (a) Exeeni yamwiirihale Yosefe ni Maria orowa oBethelehemu? (b) Nlamulo naakumiheriwe ni Seesari naakhalihenrye sai wiiraneya wa eprofesia?

⁴ Khahiyo wira Yosefe ni Maria yeetta ekhaya paahi. Mahiku ale mwene Seesari Augusto aahiruma orepeliwa atthu otheene a mulaponi, nto khula mutthu aahaana orowa elapo awe wira arepeliwe. Nto Yosefe aapakale exeeni? Biibiliya onihimya so: “Nave Yosefe ahivenya oNazarethi, elapo y’oGalileya, arowaka oYudeya, muttetthe wa Davidi, wihaniwa Bethelehemu, okhala wira ari a nloko na Davidi, amuhatat’awe”.—Luka 2:1-4.

⁵ Khahiyo waari mahala ene Seesari aarumihale awe orepeliwa atthu okathi ole. Eprofesia yaalempwe iseekulu 7 khalai, yaahimya  wira Mesiya aarowa oyariwa oBethelehemu. Vano aahikhala muttetthe mukina wiitthaniwa Bethelehemu, orakamelana waya ni Nazarethi waari wa ikiloomo 11 paahi. Masi eprofesia yaahihimya muttetthe ene waarowa oyariwa Mesiya eriki: “oBethelehemu wa wÉfrata”. (Mmusome Mikeya 5:1.) Wira mutthu ophiye wEfrata okhumaka oNazarethi, ahaana weetta ikiloomo 130 iphiro sa omwaako, oviraka muttetthe wa oSamariya. Nto oBethelehemu wEfrata, Yosefe taarowa awe orepeliwa, okhala wira yaari epooma yaakhaliwa ni amuhavinre a emusi ya mwene Davidi, nto Yosefe ni Maria yaari a emusi yeele.

6, 7. (a) Xeeni woonasa wene mukwaha woorowa oBethelehemu waarya aya woovila wa Maria? (b) Otheliwa ni Yosefe waavekela mirukunuxo xeeni voohimya sa soothanla sa Maria? (Nwehe enoota.)

⁶ Niireke Maria aarowa weemya orowa ni Yosefe ottharihelaka nlamulo? Maana weetta mukwaha ntoko ole waarowa okhala vooxankiha. Owehasa wene waari wanipacerya wa mwiita, okathi yoole onipacerya aya orupa epula vakhaani wanikisa wa elimwe. Omuhimyaka Yosefe, Biibiliya mukina oni: “aahiwela okhumaka oGalileya”; nto moolumo awo annikhalela, maana Bethelehemu aakhala opuro woottukhuwa wa imeeturu 760; tivonto wira mutthu ophiye oBethelehemu, aahaana weetta mukwaha wooxankiha waavekela mahiku manceene owelaka. Pooti wira mukwaha ola waarowa okhala wootepexa ovila weetta, maana makhalelo a Maria yaavekela ophumurya ikwaha sinceene. Nave ola ti okathi mwali orupanle oniphavela awe owaattamela amusi ni apatthani wira amukhaliheryeke apacerya woona owerya wooyara. Tthiri Maria aahaana okhala oolipa murima wira eette mukwaha ola.

 ⁷ Tivonto Luka vanilepa awe wira Yosefe “ahirowa ni Maria . . . olepiha masin’aya”. Onnihimya-tho wira Maria aahithelana ni Yosefe ntoko saaleiheriwe aya. (Luka 2:4, 5) Otheliwa ni Yosefe, waahikumiherya marukunuxo maalupale wa Maria voohimya sa opaka soothanla. Owo aanimoona iyawe okhala namahoolela awe oomunepani, nto Maria aaheemya muteko aavahiwa awe ni Muluku ntoko namakhaliherya, anarowa ni Yosefe. * Nto waari mwaha wa wiiwelela paahi wamwiirihale Maria okumana mixankiho iye seehererya waamini wawe.

8. (a) Etthu xeeni ekina woonasa wene yaamwiirinhe Maria orowa oBethelehemu ni Yosefe? (b) Enamuna xeeni ntakiheryo na Maria nryaaya nootthuneya wa arumeyi a Muluku?

⁸ Etthu xeeni ekina yaamwiirinhe Maria wiiwelela? Niireke anisuwela eprofesia yoowi Mesiya aarowa oyariwa oBethelehemu? Biibiliya khohihimya etthu. Masi khanikhanle oovaanyiha, maana awiixuttihi a itiini ni atthu anceene yaanisuwela eprofesia eyo. (Math. 2:1-7; Yoh. 7:40-42) Voohimya sa osuwela Soolempwa, Maria aari mwali oosuwela saana. (Luka 1:46-55) Maria oovaha ntakiheryo nooloka, hata nihisuwelaka etthu yaamwiiriha weemya; okhale mwaha womwiiwelela iyawe, wiiwelela nlamulo, wiiraneya wa eprofesia ya Yehova, wala wiiraneya wa itthu iyo sotheene vamosa. Yehova  onnisiveliwa ni alopwana wala athiyana oowiiyeviha, ni aniiwelela. Mahiku ala oowaatta atthu ahimphavela wiiwelela, mweettelo wa Maria onnooneya okhala ntakiheryo nuulupale wa atthu a Muluku wa khula elapo.

9, 10. (a) Etthu xeeni woonasa wene Maria ni Yosefe yuupuwela aya nuumala waattamela oBethelehemu? (b) Xeeni Yosefe ni Maria ahalaka orowa orupa opuro waakhala axinama?

⁹ Maria aahihakalala nuumala woona wira aanaattamela oBethelehemu. Okathi eetta awe owelaka, oviraka mmatta mwaari miri sa olivera, onaweha ipyo sookiserya ohepha; pooti wira Maria ni Yosefe yaanuupuwela sowiireya sa khalai sa muttetthe ole wooyeva. Muttetthe ole waari woohivuwa tivonto khiwaakontariwa ntoko mittetthe sikina sa oYuda, ntoko saahimyale awe profeta Mikeya; masi ole taari muttetthe waayariwe atthu ntoko Bowazi, Nahumi, ohoolo waya Davidi, etthu yoovikanaka iyaakha 1.000 saavinre.

¹⁰ Maria ni Yosefe yaahiphiya khaaphwanya atthu anceene. Atthu akina yaaphiyale khalairu wira yarepeliwe, tivonto Maria ni Yosefe khiyaaphwannye opuro woorupa. * Nto khiivo etthu ekina yoopaka, ohikhanle orowa orupa opuro onikhala axinama. Nkahaya muupuwele oxanka wa Yosefe nuumala onweha mwaarawe opaceryaka woona owereya weiwo waatepa wuncerereya. Nto oryeene opuro ole woohireerela oyara, Maria aahipacerya woona owereya ophavelaka oyara.

11. (a) Xeeni ohimmwaka wira athiyana a khula elapo anomoonela othunku Maria? (b) Mwa inamuna xeeni Yesu oryaawe “òpajerya oyariwa”?

¹¹ Axithiyana a khula elapo anoowerya omoonela othunku Maria. Khalai iyaakha 4.000 sivinre, Yehova aahihimya wira axithiyana yaarowa ohaawaka okathi wooyara mwaha wa yoottheka eranve aya. (Maph. 3:16) Nto khiivo enooniherya wira Maria khahaawenle oyara wawe. Eliivuru ya Luka khenihimya itthu sotheene siiraneyale, elavulaka mwa miruku ni vomuttittimiha Maria enihimya so: ‘ahimuyara mwan’awe òpajerya’. (Luka 2:7) Tthiri aari mwanawe ‘òpajerya’ oyariwa wa anamwane anceene oowiiraka 7, Maria aarowa awe waayara. (Mar. 6:3) Masi mwaana ola aarowa okhala oovirikana ni akina. Khahiyo aari oopaceriwa oyariwa wa Maria paahi, masi-tho aari “òpajerya mwa itthu sothene sopattuxiwa”, niire so, Mwaana oopaceriwa mmoseene a Muluku!—aKol. 1:15.

12. Maria ampwenhe vai mwaana, nto xeeni oryaaya voovirikana ni ithoonyeryo sinooniheriwa sa okathi waayariwe Yesu?

¹² Owo ti okathi wiiraneyale masu oovuwa alempwale so: “[Maria]  ahimukhunela n’ikuwo, khumwatalela munikulani”. (Luka 2:7) Idesenyo ni inamuna sikina sa otthekula sinooniheriwa sithoonyeryaka oyariwa wa Yesu, sinikhala sootepihiwa. Nihaana wuupuwela makhalelo a okathi ole. Nikula etthu eniheliwa yoolya wira axinama alyeeke. Muupuwele-tho wira emusi ele yaamakale opuro onikhala axinama; okhuma khalai mpakha vano, opuro owo onikhala woohiratteliwa ni wootepa wunkha. Nto anamuyari xeeni yaarowa othanla omuyara mwanaya opuro woohikhalela yoonaka opuro wooreerela? Tthiri anamuyari anceene aniphavela wira anaaya akhaleke vooreera. Tthiri Maria ni Yosefe yaaniphavela mureerelo wa Mwaana a Muluku!

13. (a) Mwa enamuna xeeni Maria ni Yosefe yaarumeelale aya mwa miruku itthu saarina aya? (b) Moota xeeni anamuyari olelo akhanle aya oomutakiha Maria ni Yosefe?

¹³ Masi, Maria ni Yosefe khiyanlaseya mwaha wa ovelavela waya; awo yaapakale etthu yooreerela yaawerya aya. Mwa ntakiheryo, moone wira Maria aahimukhapelela saana mwaana, aahimukhuneela ni ikuwo wira ooneke oviha, khumwaatalela saana munikulani wira arupeke opuro wookhalela saana ni wohoopiha. Maria kheemyale wira mixankiho simukhoottiherye opaka etthu yaawerya awe, mmureerelo wa mwanawe. Maria ni Yosefe, yaanisuwela wira omukhapelela mwa enamuna ya omunepani ti yaari etthu yootepexa otthuneya yaakhanle aya oopaka. (Mmusome Otumererya 6:6-8.) Olelo-va, anamuyari a miruku annipaka etthu emosaru, yaakhapelelaka anaaya mwa enamuna ya omunepani, olumwenku ola woothowa atthu animoova Muluku.

14, 15. (a) Exeeni yaawiiriha amakampusi ophavela omoona mwaana? (b) Nuumala omoona Yesu munikulani amakampusi yaapakale exeeni?

¹⁴ Naananoru yaahikhala etthu yaamalinhe omaaleleya wa opuro ole. Amakampusi yahaakuva arowaka opuro waapwehiwa axinama, aphavelaka woona emusi ele, vanceenexa mwaana. Murima wanaavava alopwana ale, nto ohakalala waya waanooneya owiitho waya. Yaahiphiya ariki waakuva, akhumaka omathalani omwaako waakhapelela aya inama saya. * Nto anamuyari yaahitikinihiwa nuumala owoona amakampusi aphiyaka, nto amakampusiyaahihimya itthu sootikiniha soonale aya. Aryeene omwaako, ohiyu eriyari, naananoru nahaakhumelela nlaikha. Nto ovuwa wa Yehova  wahaamwaleela, nlaikha nahahimeerya wira, vano oBethelehemu ooyariwa Kristu wala Mesiya. Nto yaarowa omphwanya mwaana owo akhuneeliwe ene ni ekuwo, aataleliwe ene munikulani. Naananoru, etthu yootepexa otikiniha, wahikhumelela-tho muttitthi wa malaikha a wiirimu yaamuttottopela Muluku!—Luka 2:8-14.

¹⁵ Tivonto vahintikhina ahu wira alopwana ale oowiiyeviha, yaahirowa oBethelehemu atthimakaka! Tthiri woonasa wene murima wahaakhuma aphavelaka omoona mwaana oyariwe niinano aataleliwe ene, siisaale nlaikha saahimyale aya. Nto khiyaawerya ohihimya ihapari iye sooreera. “Yahilaleya itthu sahimeriwaya sa mwan’ole . . . Othene ale yaiwa sahimyaya amakampusi, yanitikinihiwa”. (Luka 2:17, 18) Woonasa wene, okathi ole makhulupale a itiini khiyaacala ele amakampusi yaahimya aya. Masi vannooneya wira Yehova, aanaavaha efaita alopwana ale oowiiyeviha, ni oowaamini. Nto Maria aalipihiwe sai ni orwa wa amakampusi ale?

16. Maria oonihenrye sai okhala muthiyana aasuwela wuupuwelela saana itthu, nto eyo enivarihana sai ni waamini wawe?

¹⁶ Hata Maria aari ookhulumuwa mwaha wooyara wawe niinano, owo aaniwiriyana saana khula nuulumo. Masi khahiyo anwiriyana paahi: ‘Maria anisuka itthu iyo sothene, atthokelelaka mmurimani mwawe’. (Luka 2:19) Tthiri mwali ole aari muthiyana aasuwela wuupuwelela. Owo aanisuwela wira ihapari salaleiwale ni malaikha saari sootthuneya. Yehova, Muluku a Maria aaphavela omusuweliha waakhumale awe ni efaita yaarina awe mwaana ole. Tivonto khahiyo aarimwiiwa paahi. Maria aahipweha vamurimani vawe moolumo ale, wira uupuweleke khuta okathi, khuta mweeri, ni khuta mwaakha. Nto ti yeeyo yaamwiirinhe Maria olipiha waamini wawe okumi wotheene.—Mmusome aHéberi 11:1.

17. Ninrowa otthara sai waamini wa Maria voohimya sa ikeekhai siri mBiibiliyani?

¹⁷ Niireke munootthara ntakiheryo na Maria? Yehova ohiiriha olempwa mBiibiliyani soohimmwa sinceene sa ekeekhai. Masi ikeekhai iyo, khasinrowa onikhaliherya akhala wira khannithokorerya saana. Nnimwiira saana omusoma Biibiliya voohihiyererya, niire so, ohiya ntoko eliivuru paahi ennisivela, masi ntoko Nuulumo nowuupuxeriwa ni Muluku. (2 Tim. 3:16) Nto nimutakihaka Maria, nihaana wiixutta ekeekhai voohimya sa Yehova, ni wuupuwelela vamurimani vahu. Akhala wira ninnuupuwelela ele enisoma ahu mBiibiliya, ni woona enamuna ekhanle ahu oovarela muteko saana malakiheryo a Yehova, nnimwiiriha waamini wahu okhala woolipa.

18. (a) Maria ni Yosefe yaiwelenle sai Nlamulo na Moise mahiku oopacerya a okumi wa Yesu? (b) Mukuttho waavahale awe Maria ni Yosefe, onooniherya exeeni voohimya sa itthu saarina aya?

¹⁸ Okathi mwaana ole aarina awe mahiku 8, Maria ni Yosefe yaahimuroiha wira athikiliwe ntoko saaruma aya Nlamulo na Moise, khunvaha nsina noowi Yesu, ntoko saalelihiwa aya. (Luka 1:31) Nto nuuvira mahiku 40, yaahikhuma oBethelehemu amuroihaka otemplo oYerusalemu, etthu yowiiraka ikiloomo 10, nto yaahivaha mukuttho woreerihiwa, attharihelaka Nlamulo naahimya wira atthu oohaawa yaahaana ovaha masiya manli wala ipomba piili. Akhala wira Yosefe ni Maria yahoona ehaaya mwaha wa yoovaha ele yooyeva, voovirikana ni anamuyari akina, eyo khiyawiirihale ohiiwelela Nlamulo mwa enamuna yookhalela yaawerya aya. Mwaha waivaavo, yaahilipihiwa vanceene aryeene otemplo.—Luka 2:21-24.

19. (a) Simeyoni aahimyale itthu xeeni Maria saapwehale awe vamurimani vawe? (b) Hana aapakale exeeni nuumala onweha Yesu?

¹⁹ Mulopwana mmosa oowuuluvala iitthaniwa Simeyoni aahiwaattamelakhuhimyamoolumomakinayaawo Maria aapwehale awe vamurimani vawe. Simeyoni aarolaiheriwa wira ohinatthi okhwa, aamunweha Mesiya, nto vano munepa wootteela wa Yehova khumooniherya wira mwaana ole Yesu, aari Moopoli yoowo aalaiheriwe. Simeyoni aahimulopola-tho Maria wira ohoolo amphwanya owereya. Khuhimya wira owereya iyo waarowa okhala ntoko ekatana yoorakama yaarowa omuhoma. (Luka 2:25-35) Tthiri hata masu ala yaari oowoopiha,  yaahimukhaliherya Maria ovilela owereya, nuuvira iyaakha 33. Nuumala Simeyoni olavula masu ala, muthiyana mmosa aari profeta nsina nawe Hana, aahinweha mwaana ole Yesu nto khupacerya olavula voohimya sa mwaana ole, olavulaka ni khuta mutthu aalipelela otaphuliwa wa Yerusalemu.—Mmusome Luka 2:36-38.

20. Xeeni varya aya etthu yootepexa otthuneya okuxiwa Yesu khuroihiwa otemplo oYerusalemu?

²⁰ Tthiri Yosefe ni Maria yaahipaka yoothanla yooloka ya omuroiha mwaana ole otemplo wa Yehova, oYerusalemu! Maana yoothanla ele waari opacerya wa mwanaya ole omurumeela Muluku, tthiri khonahiye orowa otemplo wa Yehova. Aryeene oYerusalemu, awo yaahinvaha Yehova itthu saawerya aya, nto khuhimeeriwa itthu saawiixuttiha ni waalipiha. Tthiri nihiku nne, Maria aahikhuma otemplo iwe olipihiwe ene waamini wawe, ni murima awe osareyale ene itthu sinceene saarowa awe wuupuwela ni waaleela atthu akina.

21. Nihaana opaka exeeni wira waamini wahu okhale wootepa olipa ntoko Maria?

²¹ Tthiri mahiku ala ti vooreera waaweha anamuyari, attharaka ntakiheryo nna. Okhala wene, anamuyari ari Anamoona a Yehova, annaakuxa anaaya arowaka omuthukumanoni. Anamuyari awo, annipaka ele eniwerya aya, alavulaka itthu sinaalipiha annaya ari maKristau. Nto annikhuma omuthukumanoni aryeene oolipihiwa, oohakalala, ni oosareya itthu sooreera siniwerya aya waaleela akina. Tthiri ti voohakalaliha othukumana ni anna moota owo! Okathi nimpaka ahu eyo, waamini wahu onnilipa nimutakihaka Maria.