Yesu aahaavaha awiixutti awe miruku sooloka sa moota woorumeela mihakhu sa werutthuni. Masi khahiyo wira awiixutti awe paahi ti yanwiriyana. AFarisi yaari opuro yoole ni yaahaana ocalela miruku iye. Nthowa xeeni? Okhala wira “yari anamilili” aahiiso yaanisiveliwa musurukhu. Okathi yiiwale aya ele Yesu aahimmye awe awo ‘yanimwàpa’.​—Luka 15:2; 16:13, 14.

Masi Yesu khoovale. Owo aahaaleela wira: “Nyuwo mumphavela wisoniherya okhala anaxariya vamaithoni v’atthu: masi Muluku onnisuwela mirima sanyu. Vekekhai, itthu sinttittimihiwa n’atthu ti sothanyeya vamaithoni va Muluku”.​—Luka 16:15.

Okhuma khalai ene, aFarisi waanaasivela ovuwihiwa “vamaithoni v’atthu”, masi waahiphiya okathi wira mukhalelo ole oturukeye. Atthu yaale yooniwa okhala oovuwa mwaha woothaaciri, okhala akhulupale a ipoliitika ni okhala ahooleli a itiini, yaarowa okuruxiwa. Vano atthu ale pure yaasuwela wira yaari amasikhini momunepani yaamunnuwihiwa. Nto Yesu aahooniherya wira waamukhumelela murukunuxo muulupale.

Yesu aahimmye so: “Ikano sa Moise ni sa maprofeta sahikhala mpakha orwa Yohani. Okhuma vavo, ennilaleiwa ehapari yorera y’Omwene wa Muluku: khula mutthu onnìlipiha wira akelé-mo. Vano, ti yokhweyexa omala erimu n’ilapo ya vathí, ohiya orimela etthu yamukhanixa ya Ikano”. (Luka 3:18; 16:16, 17) Moota xeeni masu a Yesu yooniherya aya wira waanikhumelela murukunuxo?

Makhulupale a etiini ya aYuda yaaniihimya otthara Nlamulo na Moise. Muupuweleke wira okathi Yesu anvoninhe awe mulopwana ahoona oYerusalemu, aFarisi oowiixinnuwiha yaahihimya wira: “Hiyo n’awixutti a Moise. Hiyo nosuwela wira Muluku ahimulavuliha Moise”. (Yohani 9:13, 28, 29) Naahipakiwa Nlamulo na Moise wira naaroihe atthu oowiiyeviha wa Mesiya, eyo piiyo, Yesu. Yohani Mbatiza aahimuhimya Yesu okhala Mwaapwittipwitthi a Muluku. (Yohani 1:29-34) Okhuma okathi wa muteko woolaleerya wa Yohani, aYuda oowiiyeviha otepexa wene anamuhaawi yaaniwiriyana “ehapari yorera y’Omwene wa Muluku”. Tthiri sookhala ‘ihapari sorera’ wa ale aniphavela ottottela mureerelo ni olamuleliwa ni Omwene wa Muluku.

Nlamulo na Moise naahiiraneya. Nave naahiweettiha atthu mpakha orwa Mesiya. Nto, atthu ale khiyaakhanyereriwa-tho weettela nlamulo nne. Mwa ntakiheryo, Nlamulo naaneemererya omwalana mwaha wa khula nthowa. Masi vano Yesu aahitthokiherya wira “mulopwana onimwalana ni mwar’awe, khumuthela mukina, onoraruwa: n’ule onimuthela muthiyana omwalanne n’iy’awe, onoraruwa nave”. (Luka 16:18)  Eyo yaahaananara vanceene aFarisi yaawo yaapaka malamulo a khula etthu!

Vano Yesu aahilavula nlikanyiho nooniherya wira oturukeya iwe waarowa okhala wuulupale. Owo aalavunle sa alopwana anli yaarina makhalelo oovirikana ni moota makhalelo aya yaaturuken’ye aya moowaakuveya. Vaavo ninthokorerya ahu nlikanyiho na Yesu, muupuweleke wira yaahikhala aFarisi yaawo yaari oophenta musurukhu ni yaattittimihiwa vanceene ni atthu.

Yesu aahimmye so: “Ahikhala mutthu mmosá thajiri, awara ikuwo sorerexa ni sorika: mahiku othene anìlikanyiherya solya sinjene ni sosivexa. Mulipa-òhawa mmosá, ihaniwa Lázaro, asareiyene makhwatta, animmathi vamukhora va thajiri uwo. Aniphavela mano wiva etala ni yolya yamora vamesa va thajiri yowo: nto khavo anvaha. Ohiya vo, alapwa yanrwa olata makhwatt’awe”.​—Luka 16:19-21.

Okhala wira aFarisi yaanisiveliwa vanceene musurukhu, niireke vaanivila waasuwela ale yaathoonyerya mulopwana “thajiri”, a nlikanyiho na Yesu? Nnaari! Maana akhulupale a etiini ya aYuda waanaasivela owara ikuwo sa musurukhu munceene ni sooreera. Ohiya paahi mihakhu yaarina aya, yaahikhala ntoko athaaciri mwa enamuna ekina, okhala wira yaahikhalana iparakha sinceene. Nto nlikanyiho na mulopwana thaaciri aawara ikuwo soorikexa, naanooniherya mukhalelo wa aFarisi, nto ikuwo sootteela, sooniherya wiixinnuwiha waya.​—Daniyeli 5:7.

 Akhulupale ale athaaciri ni oowiixinnuwiha, yaawoonela sai atthu pure ni ohaawa? Awo yaanaaramusa yaahimyaka okhala ‛am ha·’aʹrets, aahiiso atthu a valaponi (vathi), yaawo yahaaphwanela osuwelihiwa Nlamulo aahiiso wiixuttihiwa. (Yohani 7:49) Eyo yaanooniherya mukhalelo wa “mulipa-òhawa mmosá, ihaniwa Lázaro”, yoowo ahaareere ovoliwa etala onaphavela “wiva etala ni yolya yamora vamesa va thajiri”. Ntoko Laazaro aasareyale awe makhwatta, atthu pure khiyooneliwa vatthu ni yooniwa ntoko wira yaaniwereiwa momunepani.

Mukhalelo ole wowooniha othunku waahikhala okhuma khalai, masi Yesu aanisuwela wira mukhalelo wa ale yaari ntoko thaaciri ni Laazaro, waamuturukeya.

Yesu aahivikaniha olavula oturukeya wa makhalelo aatthu ale anli, oriki: “Vano, masikhini uwo ahikhwa. Malaikha yahimukuxa emurowanaka okhala n’Abrahamu. Ahikhwa-tho thajiri uwo, khuvithiwa. Nipuro n’alipa-òkhwa naryawe, thajiri yowo anihaxiwa vanjene. Vano, atexaka maitho, ahimona ottaiwene Abrahamu ni Lázaro vamosá ni yowo”.​—Luka 16:22, 23.

Atthu ale yanwiriyana Yesu yaahisuwela wira Abrahamu aahikhwa ni aari Mmahiye. Biibiliya onnooniherya wira khuuvo mutthu ori Mmahiye aahiiso Seol, oniwerya oweha aahiiso olavula, omuhela muhina Abrahamu. (Musuweli 9:5, 10) Ahooleli a itiini yoona wira Yesu aaphavela ohimya exeeni ni nlikanyiho nawe? Nto Yesu aaphavela ohimya exeeni vaavo aalavunle awe atthu pure ni ahooleli a itiini oosiveliwa musurukhu?

Yesu aahooniherya wira waahikhala oturukeya vaavo aalavunle awe wira “Ikano sa Moise ni sa maprofeta sahikhala mpakha orwa Yohani. Okhuma vavo, ennilaleiwa ehapari yorera y’Omwene wa Muluku”. Ntoko siisaale muteko woolaleerya wa Yohani ni Yesu Kristu, Laazaro ni thaaciri yaahikhwa mwa mukhalelo aya wa khalai ni yaahivahiwa mukhalelo mukina vamaithoni va Muluku.

Tthiri atthu oowiiyeviha ni oohaawa, khiyaarina yoolya yomunepani. Masi vano yaanikhaliheriwa ni yaanaakhulela muhupi wa Omwene, wanipacerya waalaleiwa ni Yohani Mbatiza, muhoolo mwaya ni Yesu. Ohinatthi okathi ole, awo yaahaana ohakalala ni itthu ‘vakhaani somunepani saamora vameesa’ va akhulupale a itiini. Vano awo yaanilyihiwa ni ikeekhai sootthuneya sa Soolempwa, otepexa wene, itthu yaatthokiheriwa aya ni Yesu. Nto yaakhala ntoko wira yaari nipuro noweemereriwa vamaithoni va Yehova Muluku.

Moovirikana ni vo, ahooleli a itiini yaawo yaari athaaciri ni oosuwela nlamulo, yaahikhootta  weemererya muhupi wa Omwene waalaleiwa ni Yohani ni Yesu elapo ele yotheene. (Matheyo 3:1, 2; 4:17) Tthiri, awo yaahinanariwa mwaha wa muhupi ole woophukela wa Muluku waalikana ntoko mooro. (Matheyo 3:7-12) Ahooleli ale oophenta musurukhu yaamutaphuwa vanceene, vaakhanle wira Yesu ni awiixutti awe yaahihiya olaleya muhupi wa Muluku. Ahooleli ale yaari ntoko thaaciri a nlikanyiho na Yesu, yoowo aahimya wira: “Tithi Abrahamu, mukònele othunku! Mmurume Lázar’owo, ananihe ekath’awe mmàsini, arwé arìrihe nlumi naka. Nkirère ohawa omoroni nno”.​—Luka 16:24.

Masi eyo khiyiiraneyale. Ahooleli anceene a itiini khiyaarowa oturuka mukhalelo aya. Awo yaahikhootta onwiriyana “Moise ni maprofeta”, yaawo soolepa saya saarowa waakhaliherya omweemererya Yesu okhala Mesiya a Muluku ni Mwene. (Luka 16:29, 31; aGalasia 3:24) Masi, khiyaarina wiiyeviha ni khiyeemerenrye otthara mukhalelo wa alipa-oohaawa, yaawo yaamweemerenrye Yesu akhalana wataana wooloka ni Muluku. Nave awiixutti a Yesu khiyaatthuneya opahula aahiiso otuluxa ekeekhai wira yaasiveliheke ahooleli a itiini aahiiso waataphula. Nlikanyiho Yesu aapanke awe, aahitthokiherya ekeekhai ela orumeelaka nuulumo noowi “Tithi Abrahamu”, omuhimyaka mulopwana thaaciri.

Yesu aahimmye wira: “Mwan’aka, mupuwele sana wira mwahakhela sorera sanyu vathí varyanyu mukumi: Lazaro akhenle ohawa pahi. Vano owo onohakalalihiwa, nyuwo muhawaka. Ohiya vo, eriyari ya hiyo ni nyuwo khurere wixa: tivó, akhalá ontthuna ovenya va, alapuwelaka iwo oryanyu, khanwerya: walá ovenya iwo, arwaka nno, khanwerya”.​—Luka 16:25, 26.

Tthiri ti wa xariya ni vookhalela okhumelela marukunuxo awo! Maana eyo yaataphulela oturukeya wa mukhalelo wa ahooleli a itiini oowiixinnuwiha ni wa atthu oowiiyeviha, yaawo yeemerenrye nlattulo na Yesu na omaalihiwa ni olyihiwa momunepani. (Matheyo 11:28-30) Oturukeya iwo waarowa wooneya vanceene sihalaka myeeri vakhaani wira Nlamulo na nivarihano niranttelihiwe ni nivarihano nsya. (Yeremiya 31:31-33; aKolosi 2:14; aHéberi 8:7-13) Vaavo Muluku aakumihenrye awe munepa wootteela, Pentekoositi a 33 EC, aahooniherya wira aaniweemererya awiixutti a Yesu, ohiya aFarisi ni ahooleli akina a itiini.