Ebroxura “Veja a Boa Terra” aakhala maapha a mBiibiliyani mukhanle anyu oorumeela okathi wa yoosoma anyu ya Biibiliya wira mwiiwexexe oratteene myaha munisoma anyu. Biibiliya onnilavula mapuro manceene yaakhaliwa, ipooma ni mittetthe. Awo animookhaliheryani wiiriha yoosoma anyu okhala yekeekhai. Tthiri ebroxura “Veja a Boa Terra” enimookhaliheryani oweha ni osuwela mapuro siiraneyale aya sowiiraneya siniromoliwa mBiibiliyani. Nave animookhaliheryani wiiwexexa sowiiraneya iyo sa mBiibiliyani.

Ebroxura “Veja a Boa Terra” yookhalana maapha a ikoore soovirikana ni ikwaaturu sa mapuro ni ilapo siniromoliwa mBiibiliyani. Nave maapha awo a mBiibiliyani aakhalana idiagrama, itthu silempwale ni komputatore ni itthu sikina sinrowa wookhaliheryani wiiriha yoosoma anyu okhala yoohakalaliha ni yoovara murima.

Maapha awo a mBiibiliyani animookhaliheryani:

• osuwela mikwaha Abrahamu, Isaakhi ni Yakobe yaapanke aya

• oweha iphiro aisarayeli yaavinre aya okathi yaakhuma aya wExiitu arowaka Elapo Yooleiheriwa

• oweha mapuro aisarayeli yaakhala ni mapuro awanani aya yaakhala aya

• oweha mikwaha ni mittetthe Yesu aalaleerya awe

• osuwela mittetthe saalamuleliwa ni olamulelo muulupale oniromoliwa mBiibiliyani ntoko oBabilonia, oGrécia ni oRoma

Nyuwo pooti oweha maapha a mBiibiliyani va Watchtower EBIBLIOTEKA ONLINE.