Olaara gayttidabawu keehi daro miishshay kiyees.

•   “Kumetta saꞌan darosan olay deꞌiyogaappe denddidaagan 2.2 triiloone Amarkkaa doolaaree kiyiis; olan hegaa keena miishshay kase mule kiyi erenna.”—Ze Washingten Post, Usuppune 13, 2024.

 Olan miishshaappe keehi aadhdhiyabaykka xayees. Ane issi leemisuwa beꞌa: Yukireene olaa.

•   Wotaaddarata. Issoti issoti qoppiyogaadan, olay doommin naaꞌꞌu layttaa giddon 500,000 gidiya wotaaddarati hayqqidosona woy masunxxidosona.

•   Aynne mooribeenna asaa. Kawotettatu Issippetettay yootiyogaadan, 28,000​ppe dariyageeti hayqqidosona woy qohettidosona. Kawotettatu Issippetettan xoqqa maatay deꞌiyogee hagaadan giis: “Ha bashshiya olan hayqqida aynne mooribeenna asaa qooday hagaa keena gaana danddayettenna.” a

 Olaynne makkalay kumetta saꞌan asay keehi waayettanaadan oottiiddi deꞌees.

•   114 miiloone. Kumetta saꞌan olaanne makkalaa gaasuwan Masqqala 2023​ppe doommidi bantta keettaa aggidi betida asaa qoodaa.

•   783 miiloone. Namisan keehi qohettiya asaa qoodaa. “Namisawu haꞌꞌikka gaaso gidiya waannabay olaa; alamiyan namisettida xeetaappe 70 kushe asay olaynne makkalay dariyo heeran deꞌiyageeta.”—Alamiya Qumaa Prograamiya.

 Olay xayiyo wodee yaanee? Sarotettay deꞌana giidi hidootana danddayiyoo? Namisaanne hiyyeesatettaa muleera xayssanawu saꞌan deꞌiya aquwa goꞌettiyo wodee yaanee? Geeshsha Maxaafay woygii?

 Geeshsha Maxaafay paraa toggida bitaniya leemisodan qonccissiyogan ubbasan denddiya olaabaa kasetidi yootiis.

•   “Hara daama parai kiyiis. Asai issoi issuwaara shuhettana mala, he paraa toggidaagaayyo sa7an olaa denttiyo wolqqai imettiis. Wogga bisoikka ayyo imettiis.”—Ajjuutaa 6:4.

 He paraa toggidaagaa kaallidi, harggiya woy harabaa gaasuwan ubbasaa laaꞌiya koshawunne hayquwawu leemiso gidiya hara naaꞌꞌu paraa toggidaageeti kiyidosona. (Ajjuutaa 6:5-8) Ha Geeshsha Maxaafaa hiraagaabaanne hegee ha wodiyan polettiiddi deꞌiyogaa nuuni ammanettana danddayiyo gaasuwa gujjada eranawu, “Oyddu Paraasata—Eti Oonee?” giya huuphe yohuwa nabbaba.

 Saꞌan deꞌiya aquwa olawu goꞌettiyogee mata wode attana. Gidikkonne, hegee hananay asay baaxetiyogaana gidenna. Geeshsha Maxaafay hagaadan gees:

•   Xoossay “sa7aa gaxaa gakkanaassi de7iya olaa” xayssana.—Mazamure 46:9.

•   Xoossay olaa gaasuwan gakkida waaye ubbaa xayssana. “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajjuutaa 21:4.

•   Xoossay ubba asay merinawu sarotettan deꞌanaadan oottana. “Ta asai sarotettai de7iyo sohuwan, naagettiya keettaaninne woppu giida shemppo sohotun de7ana.”—Isiyaasa 32:18.

 Geeshsha Maxaafaa hiraagan odettidaagaadan, olaynne ha wodiyan haniya harabati sarotettay matan yaanaagaa bessoosona.

 Xoossay sarotettay deꞌanaadan waati oottanee? I saluwa haaruwa baggaara, woy ba Kawotettaa baggaara hegaadan oottana. (Maatiyosa 6:10) He Kawotettay aybakko, qassi I nena waati maaddiyakko loytta eranawu, Xoossaa Kawotettay Aybee? giya qantta biiduwa beꞌa.