Daro haymaanootetun Xoossaa ufayssanau koyiya ashkke asati deꞌoosona. Xoossay he asata beꞌees, qassi etau qoppees. SHin issi issi asay haymaanootiyaa goꞌettidi iitabaa oottiyoogee azzanttiyaaba. (2 Qoronttoosa 4:​3, 4; 11:​13-15) Televizhiiniyaanne gaazeexaa malaban odettiyaagaadan, issi issi haymaanootee shabbirssaa, zariyan dummatiyoogaa gaasuwan asaa buttiyoogaanne olaa minttettees, qassi guutta naata qohiyoogaanne wolqqan etaara asho gaytotettaa poliyoogaa coꞌꞌu gi xeellees. Hagee Xoossaa ammaniya ashkketa keehi azzanttiyaaba!​—Maatiyoosa 24:​3-5, 11, 12 nabbaba.

 Tumu haymaanootee Xoossaa bonchissees; shin worddo haymaanootee a azzanttees. Worddo haymaanootee Xoossaabaanne hayqqidaageetubaa gujjin, Geeshsha Maxaafan baynna worddobaa tamaarissees. SHin asay babaa tumaa eranaadan Yihooway koyees.​—Hizqqeela 18:4; 1 Ximootiyoosa 2:​3-5 nabbaba.

 Xoossaa siiqoos giiddi, Seexaanaa alamiyaa siiqiya haymaanootetun Xoossay cimettana danddayenna. (Yaaqooba 4:4) Xoossaa Qaalay worddo haymaanoote ubbaa “Gita Baabiloono” yaagidi xeegees. Nohe wode Bashsha Haattaappe simmin worddo haymaanootee doommidoy beni Baabiloone katamaana. Asaa naata balettiyaanne huqqunniya haymaanootiyaa Xoossay mata wode xayssana.​—Ajjuutaa 17:​1, 2, 5, 16, 17; 18:8 nabbaba.

 SHin alame yuushuwan worddo haymaanootiyaa kaalliya ashkke asaa Yihooway dogibeenna. I tumaa tamaarissiyoogan hegaa mala asata issippe shiishshiiddi deꞌees.​—Mikiyaasa 4:​2, 5 nabbaba.

 Tumaanne suure gididabaa dosiya asau Yihooway qoppees. Eti worddo haymaanootiyaappe kiyanaadan i yootees. Xoossaa siiqiya asay a ufayssiyaabaa oottanau koyees.​—Ajjuutaa 18:4 nabbaba.

 Koyro xeetu layttan deꞌida ashkke asay, kiitettidaageeti mishiraachuwaa yootido wode ufayssan siyiis. Eti halchoynne hidootay deꞌanaadan oottiya, ufayssiya deꞌo oge gidida oorattabaa Yihoowappe tamaaridosona. Eti mishiraachuwaa siyidi, bantta deꞌuwan Yihoowa kaseyido gishshau, ha wodiyan nuuyyo loꞌꞌo leemiso gidoosona.​—1 Tasalonqqe 1:​8, 9; 2:​13 nabbaba.

 Worddo haymaanootiyaappe kiyidi, au goynnanau yiyaageeta Yihooway mokki ekkees. Yihooway siiquwan shoobbiyoogaa neeni siyiyaaba gidikko, au dabbo gidaasa; Yihoowayyo goynniya, siiqo so asaa yame gidaasa; qassi merinaa deꞌuwaa demmaas.​—Marqqoosa 10:​29, 30; 2 Qoronttoosa 6:​17, 18 nabbaba.

 Worddo haymaanootee mata wode xayanaagee mishiraacho. Hegee saꞌa ubban deꞌiya asaa huqqunnaappe woppissana. Hegaappe simmin worddo haymaanootee asay shaahettanaadan oottennanne asaa balettenna. Qoppiya mereta ubbay ­issippe issi tumu Xoossau goynnana.​—Ajjuutaa 18:​20, 21; 21:​3, 4 nabbaba.