Banttana ziqqi oottiyaageeti harata bonchchoosona. Otorettokkonanne hara asay eta xoqqu xoqqu oottanaadan koyokkona. Bana ziqqi oottiya uri haratussi wozanappe qoppeesinne etappe tamaaranawu koyees.

Issi issitoo bana ziqqi oottiyoogee laafatettadan xeelettees. Tumaa odanawu, bana ziqqi oottiyoogee laafatetta gidennan, issi asi ba balaa ammananaadaaninne I oottana danddayennabaa akeekanaadan maaddiya minotetta.

• Bana ziqqi oottiyoogee dabbotettawu maaddees. Ze Narsizism Epidemik giyo maxaafay, “Xaaxi waaxi xeelliyo wode, banttana ziqqi oottiya asati haratuura laggetanawu metootokkona” yaagees. Gujjidikka, hegaa mala asati “hara asatuura haasayanawunne issippetettan deˈanawu metootokkona” yaagees.

• Intte naˈay bana ziqqi oottiyoogee sinttanaa deˈuwawu A maaddees. Intte naˈay bana ziqqi oottiyoogaa haˈˈi tamaarikko, I gitatidi ooso oyqqanawu metootenna. Dottoree Leonard Sakisi hagaadan giidi xaafiis: “Issi yelagay bessiyaagaappe aattidi babaa qoppikkonne I oottana danddayennabaa akeekana xayikko, ooso oyqqanawu koyiyo wode, oychchiyaageeta ufayssenna. SHin qaxariyaageeti xoqqu ootti xeelliyoobaa eranawu koyiya yelagay ooso oyqqana danddayees.” *

Babaa bessiyaagaappe aattidi qoppennaadan intte naˈaa maaddite.

GEESHSHA MAXAAFAY YOOTIYO MAARAA: “Aissi giikko, issi urai ainne hanennan de7iiddi, aibakko i hanidobaa ayyo milatikko, ba huuphiyaa cimmees.”—Galaatiyaa 6:3.

• Hanennabaa intte naˈaassi zaari zaari yootoppite. “Ne amottiyoobaa ubbaa demmana danddayaasa,” qassi “Ne koyiyooba ubbaa hanana danddayaasa” giyoogaa malabay denttettiyaaba milatikkonne hegee deˈuwan darotoo polettenna. Intte naati polana danddayiyoobaa halchchiyaabanne hegaa polanawu minni oottiyaaba gidikko loˈˈo ayfiyaa demmana.

• Nashettana bessiya oosota shaakkidi nashshite. Intte naˈaa gooba woy mino giyoogaa xallay intte naˈay bana ziqqi oottanaadan maaddenna. Mino giissidabaa shaakkidi yootite.

• Intte naˈay Intternneetiyan asaara gayttiyoogan daro wodiyaa aattennaadan oottite. Intternneetiyan  asaara gayttiyoogee darotoo issi asi ba eraanne ba oottidobaa yootiyoogan bana zaassiyoogaara gayttidaba—hegee bana ziqqi oottiyoogaappe keehi dummatiyaaba.

• Intte naˈay ellellidi tawu atto ga gaanaadan minttettite. Intte naˈay mooriyo wode I he mooruwaa akeekanaadaaninne mooridoogaa ammananaadan maaddite.

Galatanaadan minttettite.

GEESHSHA MAXAAFAY YOOTIYO MAARAA: “Galatite.”—Qolasiyaasa 3:15.

• Meretaa gishshawu galatiyoogaa. Naati merettida ubbabawu galatananne nuuni deˈuwan deˈanawu hegeeti ay keena koshshiyaakko erana bessees. SHemppanawu carkkoy, uyanawu haattaynne, maanawu qumay koshshees. Meretan deˈiya maalaaliya ubbabawu eti nashshanaadaaninne galatanaadan ha leemisotun goˈettite.

• Asaa galatiyoogaa. Asa ubbay appe aadhdhiyoobay deˈiyoogaa intte naˈawu hassayissite, qassi I harata eta eraaninne hiillan qanaatiyoogaappe, etappe waati tamaarana danddayiyaakko bessite.

• Galataa qonccissiyoogaa. Intte naati qaala xallan gidennan, wozanappe nashshiyoogan galatays gaanaadan tamaarissite. Galatiyoogee nuuni nu huuphiyaa ziqqi oottanaadan maaddees.

Harata maaddiyoogee loˈˈoba gidiyoogaa intte naata tamaarissite.

GEESHSHA MAXAAFAY YOOTIYO MAARAA: “Issoi issuwaappe gitatais yaagidi qoppennan, issoi issuwaayyo intte huuphiyaa kaushshite. Qassi issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:3, 4.

• Intte naˈa so oosuwaa ootissite. So oosuwan maaddana koshshennaagaa intte naˈaassi intte yootiyoogee, I ba oottiyoobaa keehi gitabadan xeellanaadan oottees. So giddo oosoy kaassaappe kasetana bessees. So giddo oosoy harata waati goˈˈiyaakkonne harati A nashshanaadaaninne bonchchanaadan waati oottiyaakko yootite.

• Haratuyyo oottiyoogee loˈˈoba gidiyoogaa minttidi yootite. Naati yaatiyoogee eti wozannaama gidanaadan maaddana. Hegaa gishshawu, intte naˈay maadoy koshshiyoogeeta shaakki eranaadan minttettite. I eta maaddanawu ay oottana danddayiyaakko aara tobbite. I harata maaddiyo wode intte naˈa galatitenne kaafite.