LUZIYYO HADDIRSSA TOHOY WOBBE. Asappe asa eesuwan oyqqiya, bolla giddon deˈiya narbbiyaa qohiya poliyomaylaytis giyo harggee O naatettan oyqqiis. Luziyyo layttay 16 gidido wode, O ootissiya maccaasiyaa iyyo, “Neeni ne aayeessi azazettabeenna gishshawunne iitido gishshawu nena sila oottidi Xoossay qaxxayiis” gaada yootaasu. Luziya he wode keehi azzanidoogaa daro layttappe guyyiyan haˈˈikka hassayawusu.

DAMARISA BANA GUUGGIYAA KANSSEREE OYQQIDOOGAA ERIDO WODE, I aaway O hagaadan oychchiis: “Neeni ay oottido gishshawu hagee nena oyqqidee? Neeni keehi iitabaa oottennan waaya aggana. Xoossay nena qaxxayiyoy hegaa gishshataassa.” I haasayidoban Damarisa keehi azzanaasu.

Xoossay asaa sahuwan qaxxayees giyo qofay beniisappe deˈiyaaba. “Sahuwawu gaasoy sahettida ura woy A dabbotu nagaraa, qassi hegee he nagaraa gaasuwan qaxxayiyooba” gidiyoogaa Kiristtoosi saˈan deˈiyo wode daroti ammaniyoogaa Maaners end Kastems of Baybl Lands giyo maxaafay yootees. Qassi Kiristtoosa wodiyaappe daro xeetu layttay aadhdhi simmin, “issi issi asay Xoossay eta nagaraa gaasuwan eta qaxxayanawu boshaa ehiidoogaa ammaniyoogaa” he wode xaliyaabaanne boshaabaa qonccissiya maxaafay yootees. Yaatin, 14tta xeetu layttan kumetta Awurooppan miilooniyan qoodettiya asay boshan hayqqido wode, Xoossay iita asaa bolli pirddiis giyoogee? Woy qassi xannaˈiyaageeti hegaappe simmin akeekidoogaadan he boshay bakiteeriyaa gaasuwan gakkidaabee? Xoossay asaa eta nagaraa gaasuwan qaxxayanawu tumuppe sahuwaa goˈettii? giidi issoti issoti qoppana danddayoosona. *

HAGAA QOPPA: Sahoynne waayee Xoossaa qixaate gidikko, Yesuusi sahettida asaa pattidoy aybissee? Yaatiyoogee Xoossaa pirddaanne xillotettaa geellayennee? (Maatiyoosa 4:23, 24) Yesuusi Xoossay oottiyoobaa phalqqiyaabaa mule oottenna. I, ‘Taani ubba wode A ufayssiyaagaa oottays,’ qassi ‘taani Aaway tana azazidoogaadan oottays’ yaagiis.—Yohaannisa 8:29; 14:31.

Geeshsha Maxaafay yootiyoobay qoncce. Xoossaa Yihooway pirddaa mule geellayenna. (Zaarettido Wogaa 32:4) Leemisuwawu, Xoossay horoophiliyan biya issi ura qaxxayanawu koyido gishshawu, aynne mooribeenna xeetan qoodettiya asay hayqqanaadan horoophiliyaa bolli daafabay gakkanaadan mule oottenna! Xoossawu ammanettidi oottida Abrahaami Xoossay “xillota iitatuura” mule xayssennagaa, Xoossaa xillotettaara maayiyaabaa yootiis. I hagaadankka giis: “Ha sa7aa ubbaa pirddiyaagee xillo pirddenneeyye?” (Doomettaabaa 18:23, 25) Qassi Geeshsha Maxaafay ‘Xoossay iitabaa oottennaagaa’ yootees.—Iyyooba 34:10-12.

Nuuni waayettiyo waayee nu nagaraa gaasuwan Xoossay nuna qaxxayiyooba gidenna. Yesuusinne I erissiyo ashkkarati yelettoosappe doommidi qooqe gidida issi bitaniyaa beˈido wode, Yesuusi he yohuwaa xeelliyaagan qonccebaa yootiis. “Erissiyo ashkkarati Yesuusa, ‘Tamaarissiyaagoo, ha bitanee  qooqe gididi yelettanaadan, nagara oottidai oonee? I oottideeyye? Woi a yelidaageeti oottidonaa?’ yaagidi oichchidosona. Oichchin Yesuusi, ‘Xoossaa oosoi a bollan qonccana mala qooqidoogaappe attin, i woi a aayyiyaanne a aawai nagara oottibookkona’ [yaagiis].”—Yohaannisa 9:1-3.

Hegawu gaaso gidida nagaraa bitaneekka A aawaynne A aayyiyaakka oottibeennaagaa Yesuusi ba erissiyo ashkkaratussi yootido wode, keehi aakkida bala qofaa gaasuwan erissiyo ashkkarati garamettennan waayi aggana. Yesuusi qooqe bitaniyaa pattiyoogaa xalla gidennan, I yaatiyoogan waayee Xoossaa qixaate giyo bala ammanuwaa laaliyaabaa oottiis. (Yohaannisa 9:6, 7) Ha wodiyan keehi sahettidi waayettiyaageeti bantta waayiyawu gaasoy Xoossaa gidennaagaa eriyoogan minettana danddayoosona.

Geeshsha Maxaafay nuna minttettiyoobaa

• “Xoossai iitan paacettanau danddayenna; qassi i ba huuphen oonanne paaccenna.” (YAAQOOBA 1:13) Daro xeetu layttawu asaa qohida sahoy, waayee, hayqoynne hegaa mala ‘iitabay’ mata wode xayana.

• Yesuus Kiristtoosi “harggida asa ubbaakka pattiis.” (MAATIYOOSA 8:16) Xoossaa Naˈay baakko yiida ubbaa pattiyoogan, Xoossaa Kawotettay kumetta saˈan ay polanaakko bessiis.

• “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—AJJUUTAA 21:3-5.

Yaatin, asaa bolli tuggaynne waayee daridoy aybissee? Asay daro xeetu layttawu he oyshaa qoppiiddi takkiis. Hegawu gaasoy Xoossaa gidana xayikko, oonee? Ha oyshatu zaaroy kaalliya huuphe yohuwan qonccana.