MAATIYOOSA wonggeeliyan qonccidaagaadan, “Yesuusi Beeta Maqidasiyaa gelidi, hegan baizziyaageetanne shammiyaageeta ubbaa kare yedettiis; qassi miishshaa laammiyaageetu xaraphpheezaanne haraphphiyaa baizziyaageetu oidiyaa aatti yeggidi, eta, ‘Xoossaa maxaafan, “Ta keettai Xoossaa woossiyo keetta geetettana” yaagettidi xaafetti uttiis; shin intte a panggati qosettiyo gonggolo kesseeta’ yaagiis.”—Maa. 21:12, 13.

Beeta maqidasiyan bayzziya asati shammiyaageeti qanxxana danddayiyoogaappe keehi alˈˈo waagan bayzziyoogaa beni wode xaafettida Ayhudatu taarikee bessees. Leemisuwawu, koyro xeetu layttaa M.Ln issitoo asay yarshshiyo naaˈˈu haraphetu waagay keehi alˈˈidi issi worqqa dinaare gididoogaa Ayhudatu beni maxaafay yootees. Hegee dumma eri baynna uri 25 gallassawu oottidi demmiyo miishsha. Haraphee woy haraphe maray hiyyeesa uri shiishshana danddayiyo yarshsho; shin he kafotu waagaykka keehi alˈˈiis. (Wog. 1:14; 5:7; 12:6-8) Simon ben Gamaliˈela giyo issi Rabee hanettidaban keehi yiillotidi asay shiishshana koshshiyo yarshshotu qoodaa guuttin, naaˈˈu haraphetu waagay issi kutti kase bayzettiyoogaappe xeetaappe issi kushe gidiyaagan bayzettiis.

Qommoora beˈidoogaadan, beeta maqidasiyan bayzziyaageeti bantta bayzziyoobaa harata bonqqiyoogaa keena keehi alˈˈuwan bayzziyaageeta gidiyo gishshawu, Yesuusi eta ‘panggata’ giidoogee bessiyaaba.