Koyro bitanee Addaamee daro xeetu layttaa deˈiis. SHin i wurssettan ceeggidi hayqqiis. He wodeppe doommidi, asay ceeggennaadan darobaa maliis. Gidikkokka, ooninne hayquwaappe attana danddayenna. Aybissi? Addaamee Xoossaayyo azazettennan ixxidi nagaraa oottido gishshau, ceeggidi hayqqiis. Nuunikka ceeggoos; ayssi giikko, Addaameppe nagaraanne hayquwaa laattida.—Doomettaabaa 5:5; Roome 5:12 nabbaba.

Nuuni merinaa deˈuwaa demmanaadan issi uri nuna wozana koshshees. (Iyyooba 33:24, 25) Wozoy issi ura naxa kessanau qanxxettiya waagaa; qassi nuuni hayquwaappe naxa kiyana bessees. (Kessaabaa 21:29, 30) Yesuusi nu gishshau hayqqido wode he waagaa qanxxiis.—Yohaannisa 3:16 nabbaba.

Harggiyaappenne ceegatettaappe naxa kiyanay ubba asaa gidenna. Addaameegaadan Xoossaayyo azazettenna asay deˈuwaa demmenna. Eta nagaray atto geetettido asatu xallay merinaa deˈuwaa demmana.—Isiyaasa 33:24; 35:3-6 nabbaba.

Nu nagaray atto geetettanaadan nuuni oottana koshshiyaabay deˈees. Nuuni Xoossaa Qaalaa, Geeshsha Maxaafaa xannaˈidi Xoossaa erana koshshees. Geeshsha Maxaafay nuuni loˈˈo deˈuwaa deˈiyo ogiyaa, qassi Xoossan nashettiyoonne merinaa deˈuwaa demmiyo ogiyaa tamaarissees.—Yohaannisa 17:3; Oosuwaa 3:19 nabbaba.