“Nagarancha gididaageeti hayqqosaara eta shemppoy eti qaxxayettiyo sohuwaa siˈooliyau, ‘merinau toˈenna tamau’ bees.” (Katekiizim of zi Kaatelik CHerch) Haymaanootiyaa kaalettiya issoti issoti, siˈooliyan deˈiyaageeti Xoossaappe muleera shaahettidoogaa yootoosona.

“Nagaraa oottiya shemppoi i bau haiqqana.” (Hizqqeela 18:4) “Haiqqidaageeti aibanne erokkona.” (Eranchchaa 9:5) SHemppoy hayqqiyaabanne aybanne erennaba gidikko, ‘merinau toˈenna taman’ woy merinau Xoossaappe shaahettiyoogan waanidi waayettana danddayii?

Geeshsha Maxaafan darotoo “siˈooliyaa” geetettidi birshshettida Ibraysxxe qaalaynne Giriike qaalay asaa naatu ubbaa duufuwaa giyoogaa. Leemisuwau, Iyyoobi iita harggiyan waayettiyo wode, “Neeni tana duufo [“siˈooliyaa,” 1954 Amaarattuwaa] giddon genttada, . . . qottidabaa gidarkkiishsha” yaagidi woossiis. (Iyyooba 14:13) Iyyoobi barchetiyo sohuwaa woy Xoossaappe haakkidi deˈiyoogan tuggatiyo sohuwaa gidennan, shemppiyo sohuwaa, duufuwaa baanau koyiis.

Xoossay meqettaa iita gidikko, hegee nuuni akko shiiqanaadan gidennan, appe haakkanaadan oottees. Mekisiiko biittan deˈiya Rosiyo giyo maccaasiyaa hagaadan gaasu: “Taani naatettaappe doommada siˈooliyaa tamaabaa tamaaraas. Taani keehi yayyido gishshau, Xoossau loˈˈo eeshshi deˈees gaada qoppabeykke. I sohuwaara hanqqettiyaabadan qoppaas.”

Geeshsha Maxaafay Xoossaa pirddaabaanne hayqqidaageeti deˈiyo hanotaabaa yootiyo qoncce gididabay Rosiya Xoossaa xeelliyo hanotay kaseegaappe laamettanaadan oottiis. A hagaadan gaasu: “Ta bollappe wolqqaama toohuwaa wottidabadan hashshukkonne gaas. Xoossay nuussi loˈˈobaa qoppiyoogaa, nuna siiqiyoogaanne taani a siiqana danddayiyoogaa ammaniyoogaa doommaas. I ba naatu kushiyaa oyqqiyaanne etau loˈˈobaa amottiya aawa mala.”—Isiyaasa 41:13.

Daroti siˈooliyaa tamaa yayyidi haymaanootiyaa kaalloosona, shin Xoossay nuuni a yayyiyo gishshau ayyo oottanaadan koyenna. Hegaappe dumma hanotan, Yesuusi, “Intte Godaa intte Xoossaa . . . siiqite” yaagiis. (Marqqoosa 12:29, 30) Hegaa bollikka, ha wodiyan Xoossay iitabaa oottennaagaa nuuni eriyo wode, i sinttappe suure pirddaa pirddanaagaakka ammanettana danddayoos. Iyyooba laggiyaa Eelihugaadan nuuni ammanettidi, “Ubbaa Danddayiya Xoossai iitabaa mulekka oottenna” gaana danddayoos.—Iyyooba 34:10.