MAYO 18, 2022
POLAND
Usa nga Espesyal nga Pagbisita ha Poland Para ha mga Boluntaryo Ngan mga Refugee nga Taga-Ukraine
Tikang han Domingo, Mayo 1, 2022, hi Brother Mark Sanderson nga membro han Nagmamando nga Lawas han mga Saksi ni Jehova, kaupod an tulo nga membro han Branch Committee, binisita ha mga kabugtoan nga pinalagiw tikang ha Ukraine ngadto ha Poland. Hito nga bug-os nga pagbisita, hi Brother Sanderson ngan an iya mga kaupod nakapamati han mga istorya han mga refugee ngan ginpasarig hira han gugma ngan suporta han Nagmamando nga Lawas.
Tikang ha wala tipatoo: Hi Tomasz Wolczko nga membro han Branch Committee ha Poland, hi Mark Sanderson, hi Vesa Väänänen nga membro han Branch Committee ha Poland, ngan hi Tommi Kauko nga membro han Branch Committee ha Finland
Nag-iiristorya ha border han Poland ngan Ukraine mahitungod han panhatag hin relief
Ha sulod hin unom ka adlaw, an grupo nagbiyahe hin sobra 2,500 ka kilometro; ginbisita nira an mga refugee nga naukoy ha iba-iba nga lokasyon. Upod hini an upat nga Assembly Hall ngan an pipira nga Kingdom Hall. Ginbisita liwat nira an mga boluntaryo ha mga border butnga han Poland ngan Ukraine.
Usa nga brother nga taga-Ukraine an nagsiring, “Nadasig gud kami ngan narepreskohan hito nga pagbisita, sugad hin nakainom kami hin matugnaw nga tubig ha mapaso nga panahon.”
“Makalilipay gud ini nga pagbisita!” siring han usa nga sister nga taga-Ukraine. “Nakita namon kon paonan-o kami gin-aataman ni Jehova.”
Usa pa nga sister nga taga-Ukraine an nagsiring, “Pag-abot namon ha Poland, waray kami bisan ano, pero salamat kan Jehova kay yana may-ada na kami han tanan nga amon ginkikinahanglan.”
Usa nga grupo hin mga drayber ngan iba pa nga mga boluntaryo ha gawas han Assembly Hall ha Stęszew, Poland
Nagbisita liwat an grupo ha mga boluntaryo nga nabulig ha mga refugee. Ginpahinumdoman hira ni Brother Sanderson nga hinigugma hira han Nagmamando nga Lawas ngan iya gin-unabi an mga pulong ha Hebreo 6:10 ngan iginsaysay nga hi Jehova ‘diri mangangalimot han ira mga buhat.’ Hiya nagdugang, “Diri liwat kami mahingangalimot.” An mga boluntaryo nagsiring nga mapasalamaton hira nga makabulig ha ira mga kabugtoan.
Ginbibisita an edaran na nga mga sister tikang ha Ukraine ha gawas han usa nga Kingdom Hall ha Radymno, Poland
Hi Brother Vesa Väänänen, usa nga membro han Branch Committee ha Poland, nagsiring: “Makaparig-on gud makita kon paonan-o ginkukontrol ni Jehova an ngatanan. Igintatagana ni Jehova kon ano gud an ginkikinahanglan ha husto nga panahon pinaagi han paggiya han Nagmamando nga Lawas ngan han pagin andam han kabugtoan nga bumulig ha iba.”
Mga boluntaryo ha Assembly Hall ha Stęszew, Poland, diin didto gin-aandam an mga relief
Samtang padayon nga igintatagana han kabugtoan an panginahanglan han kada tagsa, anoman an ira kahimtang, naieksperyensyahan nira an kalipay ha paghatag nga iginsaad ni Jesus.—Buhat 20:35.
