•  Kay ano nga diri ako nakakapokus?

•  Kon paonan-o mas makakapokus

•  An ginsisiring han iba nga batan-on

 “Hadto mahilig ako magbinasa hin mga libro. Pero yana nadiri na ngani ako pagbasa bisan hin higlaba nga parapo.”—Elaine.

 “Ginpa-fast-forward ko an usa nga video kon nahihinayan ako han istorya hito.”—Miranda.

 “Bisan kon may importante ako nga ginbubuhat, kon nagtutunog an akon phone, an akon na la nahuhunahuna, ‘Hin-o daw la an nag-text ha akon?’”—Jane.

 Nakukurian ka ba pagpokus tungod han teknolohiya? Ito an inaabat han iba. “Kon mas agsob kita nga nag-i-Internet, mas ginti-train naton an aton utok nga diri makapokus—nga magproseso hin impormasyon hin malaksi hinduro ngan ha maopay nga paagi pero diri nagpupokus hito,” siring han awtor ngan management consultant nga hi Nicholas Carr. a

 Kitaa an tulo nga sitwasyon diin mahimo makagwara han imo pokus an teknolohiya.

•   Kon nakikiistorya. “Bisan kon magkaatubang nga nag-iiristorya an mga tawo,” siring han batan-on nga babaye nga hi Maria, “nagti-text la gihapon hira o naggi-games o agsob magkita ha social media ha ira celfon. Diri hira naghahatag hin bug-os nga atensyon ha ira kaistorya.”

•   Kon aada ha klase. “Kadam-an han mga estudyante an nasiring nga ginagamit nira an ira gadyet ha panahon han ira klase basi mag-text, mag-browse, o magbasa o magkita hin bisan ano,” siring han libro nga Digital Kids, ngan ginagamit nira an ira mga gadyet para ha mga butang nga “diri konektado ha ira klase.”

•   Kon nag-aaram. “Makuri gud para ha akon nga diri kitaon an akon celfon ha kada panahon nga nagtutunog ito,” siring han 22 anyos nga hi Chris. Kon estudyante ka, an usa ka oras nga homework mahimo magin tulo ka oras o sobra pa kon diri ka nakakapokus tungod han imo mga gadyet.

 Hinumdumi: Makukurian ka nga makapokus kon magpapadisturbo ka ngan magpapakontrol ha teknolohiya.

•   Kon nakikiistorya. An Biblia nasiring: ‘Panginanoa diri la an iyo kalugaringon nga kaopayan, kondi pati liwat an kaopayan han iba.’ (Filipos 2:4) Magpakita hin konsiderasyon pinaagi ha pagpamati hin maopay. Pagkita pirme ha mata han imo kaistorya, ngan ayaw pagpadisturbo ha imo mga gadyet.

   “Kon may kaistorya ka, likayi gud nga kitaon an imo celfon. Magpakita hin respeto ha imo kaistorya pinaagi ha paghatag ha iya han imo bug-os nga atensyon.”—Thomas.

   TIP: Kon nakikiistorya ka, ibutang an imo celfon ha dapit nga diri mo nakikita. An mga researcher nasiring nga an pakakita la han imo celfon mahimo na makagwara han imo pokus, kay may makikita ka dida nga posible makadisturbo ha imo.

•   Kon aada ha klase. An Biblia nasiring: “Tagi hin atensyon kon paonan-o kamo namamati.” (Lucas 8:18) Uyon hito nga prinsipyo, kon igintutugot han iyo eskwelahan an pag-Internet ha klasrum, ayaw pag-check hin message, pag-games, o pag-chat online ha panahon nga dapat nakapokus ka ha klase.

   “Pangalimbasugi nga magin mas atentibo ha iyo klase. Isurat an ginsisiring han iyo titser. Kon posible, lingkod hirani ha prente han klasrum basi waray ka makita nga makakadisturbo ha imo.”—Karen.

   TIP: Gamit hin bolpen ngan papel ha pagsurat imbes nga mag-type ha kompyuter. Iginpapakita han research nga mas gutiay an posibilidad nga madisturbo ka ngan mas mahinunumdoman mo an imo nahibaroan.

•   Kon nag-aaram. An Biblia nasiring: “Kuha hin kinaadman ngan kuha hin pagsabot.” (Proberbios 4:5) Nag-uupod ito hin mas hilarom nga paghunahuna imbes nga magdagmit ha pagbasa han aradman basi la makapasar ha eksam.

   “Kon nag-aaram ako, gin-i-airplane mode ko an akon tablet ngan nagpupokus la ha akon ginbubuhat. Diri ako nagkikita ha mga notification. Kon may nahuhunahuna ako nga kinahanglan ko hinumdoman, ginsusurat ko ito.”—Chris.

   TIP: Siguroha nga an lugar diin ka mag-aaram makakabulig ha imo nga magpokus. Tipigi ito nga limpyo ngan mahawan.