•  Maaram ka ba mag-multitasking?

•  An sayop nga panhunahuna ha multitasking

•  Mas maopay nga paagi

•  An ginsisiring han imo mga igkasi-batan-on

 Maaram ka ba mag-multitasking—an dudrungan nga pagbuhat han pipira nga butang? Damu an naghuhunahuna nga mas maopay mag-multitask an mga tawo nga nagamit hin teknolohiya tikang pa ha kabata kay ha mga tawo nga nahibaro hito han daku na hira. Pero tinuod gud ba ito?

 TAMA o SAYOP?

•   Kon nagmu-multitask ka, mas damu an imo nahihimo.

•   Kon pirme mo ito ginhihimo, magigin mas maopay ka mag-multitask.

•   Mas maopay mag-multitasking an mga batan-on kay ha mga edaran.

 Kon “tama” an imo baton hito nga mga ginsiring, bangin natoo ka na ha “sayop nga panhunahuna ha multitasking.”

 Ha imo hunahuna, madudungan mo ba pagbuhat an duha nga butang? Bangin kaya mo pagdunganon an pipira nga buruhaton nga diri nawawara an imo pokus. Pananglitan, kon namamati ka hin music samtang naglilimpyo ha imo kwarto, posible nga malimpyohan mo la gihap an imo kwarto.

 Pero kon sasarihan mo pagdunganon an duha nga buruhaton nga pariho nagkikinahanglan hin pokus, posible nga diri magigin maopay an resulta hito nga duha. Bangin ito an rason nga an batan-on nga hi Katherine nakagsiring mahitungod ha multitasking: “Imbes nga damu an imo mahimo nga buruhaton, damu la lugod an imo nahimo nga sayop.”

 “May kaistorya ako han may nag-text ha akon nga kinahanglan ko mag-reply. Gintestingan ko nga pagdunganon ito. Salit waray ko mabatii an iba nga ginsiring han akon kaistorya ngan haros puro sayop an spelling han akon igin-reply.”—Caleb.

 An eksperto ha teknolohiya nga hi Sherry Turkle nagsurat: “Kon ginhuhunahuna naton nga nagmu-multitask kita, . . . naiibanan an aton pokus ha kada bag-o nga buruhaton nga naidudugang. An pag-multitask nagpapagios ha aton utok nga hunahunaon nga mas nagtitikaopay an aton ginbubuhat, pero balitaw nagtitikaraot la lugod.” a

 “Usahay kahuna ko kaya ko pagdunganon an pakig-text ha usa nga tawo ngan pakig-istorya ha iba nga tawo, tubtob nga nasantop ko nga an akon unta iri-reply ha akon ka-text amo lugod an akon nayakan ha akon kaistorya ngan an akon unta ibabaton ha akon kaistorya amo lugod an akon nai-text!”—Tamara.

 Mas makukurian la kita kon magmu-multitask kita. Pananglitan, kasagaran na nga mas maiha naton matapos an aton homework. O bangin kinahanglan utruhon naton an trabaho nga kahuna naton tapos na. Hain man hito an mahitabo, mas daku nga panahon an nakakarag han mga nagmu-multitask!

 Ito an rason kon kay ano nga an psychotherapist ngan school counselor nga hi Thomas Kersting nagsiring: “Kon ipapariho ta an utok ha usa nga file cabinet diin organisado nga iginbubutang an importante nga mga impormasyon, an utok han nagmu-multitask masamok gud.” b

 “Kon naniningkamot ka nga pagdurunganon an mga buruhaton, mas damu nga importante nga detalye an diri mo mapapansin. Ha katapos-taposan, nagdadamu lugod an imo trabahoon ngan kahuna mo nakakatipid ka hin panahon pero diri ngay-an.”—Teresa.

•   I-train an imo kalugaringon nga magpokus ha usa la nga buruhaton. Bangin makuri gud ito, labi na kon nahiara ka nga dudrunganon an imo mga buruhaton. Pananglitan, nag-aaram samtang nagtitext. Pero an Biblia nasiring ha aton nga ‘siguruhon an mas importante nga mga butang.’ (Filipos 1:10) An mga buruhaton diri parapriho an pagkaimportante. Salit pagdesisyon kon ano an imo uunahon, ngan pagpokus ha usa la nga buruhaton tubtob nga matapos ito.

   “An diri nakapokus nga hunahuna pariho gud hin gutiay nga bata; usahay kinahanglan sidngan mo nga diri, bisan kon mas masayon nga pabay-an na la kon ano an iya karuyag.”—Maria.

•   Likayi an mga nakakadisturbo. Nasusulay ka ba nga kitaon an imo celfon samtang nag-aaram ka? Ibutang ito ha iba nga lugar. Paronga an TV, ngan ayaw paghunahunaa an social media! An Biblia nasiring: ‘Gamita ha pinakamaopay nga paagi an iyo panahon.’—Colosas 4:5.

   “Napansin ko nga mas maopay gud an pagpokus ha usa la nga butang. Hito nga paagi, nalilipay ako kon natatapos ko an usa nga buruhaton ha akon listahan ngan bubuhaton na liwat an sunod. Tungod hito, kontento gud ako.”—Onya.

•   Pamati hin maopay ha imo kaistorya. Kon nagkikinita ka ha imo celfon samtang nakikiistorya, pagpakita ito hin kawaray-respeto ngan diri matutuhay an iyo pag-istorya. An Biblia nagsasagdon ha aton nga trataron an iba ha paagi nga karuyag naton nga trataron kita.—Mateo 7:12.

   “Danay, samtang nakikiistorya ako ha akon bugto, nagtitinext hiya o may ginhihimo ha iya celfon. Naaaringit gud ako hito! Pero an tinuod, danay ginhihimo ko liwat ito!”—David.