“Pasidunggi an imo tatay ngan an imo nanay, basi mabuhi ka hin maiha nga panahon dida ha tuna nga iginhahatag ha imo ni Jehova nga imo Dios.”—Exodo 20:12, Bag-o nga Kalibotan nga Hubad.

 “Tahura an imo amay ngan an imo iroy basi humilawig an imo kinabuhi dida han tuna nga ihahatag ha imo han Ginoo nga imo Dios.”—Exodo 20:12, An Baraan Nga Biblia.

 Ginsugo han Dios an mga Israelita ha kadaan nga panahon nga pasidunggan an ira mga kag-anak. Pinaagi ha pagdugang hin saad hito nga sugo, naghatag hiya hin dugang nga rason ha pagsunod hito. Bisan kon an Balaud han Dios ha mga Israelita, nga gintatawag nga Mosaiko nga Balaud, diri na aplikado ha mga Kristiano, an iya mga suruklan waray magbag-o. An mga prinsipyo nga ginbasaran han Balaud han Dios aplikado la gihapon asya importante ito ha mga Kristiano.—Colosas 3:20.

 An mga anak—batan-on man o adulto—nagpapasidungog ha ira mga kag-anak kon ira ginrirespeto ngan ginsusunod hira. (Levitico 19:3; Proberbios 1:8) Bisan kon an mga anak magkaada na kalugaringon nga pamilya, padayon nira nga ginhihigugma ngan ginbubuligan an ira mga kag-anak. Pananglitan, ginsisiguro nira nga naaataman an panginahanglan han ira lagas na nga mga kag-anak, gintatagan pa ngani hin pinansyal nga suporta kon kinahanglan.—Mateo 15:4-6; 1 Timoteo 5:4, 8.

 Tigamni nga kinahanglan pasidunggan han Israelita nga mga anak an ira tatay ngan an ira nanay, iginpapakita hini nga ira ginkikilala an importante nga papel han nanay ha pamilya. (Proberbios 6:20; 19:26) Ito liwat an angay buhaton han mga anak yana.

 An sugo nga pasidunggan an mga kag-anak pirme may limitasyon. An Israelita nga mga anak diri masugot ha ira mga kag-anak, o ha bisan hin-o nga tawo, kon kontra ito ha sugo han Dios. (Deuteronomio 13:6-8) Yana liwat, an mga Kristiano ‘nasugot ha Dios sugad nga magmarando imbes nga ha mga tawo.’—Buhat 5:29.

 Ha Balaud nga ginhatag han Dios ha Israel, nagsaad hiya nga an mga anak nga nagpapasidungog ha ira mga kag-anak ‘mabubuhi hin maiha nga panahon ngan mag-uuswag’ ha tuna nga ginhatag han Dios ha ira. (Deuteronomio 5:16) Malilikyan nira an sirot para hadton mga anak nga nagbabalewaray han balaud han Dios ngan nagrirebelde ha ira mga kag-anak. (Deuteronomio 21:18-21) Waray mabag-o han panahon an mga prinsipyo nga ginbasaran hito nga mga balaud. (Efeso 6:1-3) Batan-on man kita o lagas, may baratunon kita ha aton Maglalarang. Ngan sugad la han iya ginsaad, an mga anak nga nasugot ha iya ngan ha ira mga kag-anak mabubuhi hin maiha. Ngani, may paglaom hira nga mabuhi ha kadayonan.—1 Timoteo 4:8; 6:18, 19.

 An sugo nga mababasa ha Exodo 20:12 may importante nga lokasyon ha Napulo nga Sugo, o Napulo nga Pulong. (Exodo 20:1-17) An mga sugo antes hito nagsusumat ha mga Israelita han ira obligasyon ha Dios, lakip hito nga hiya gud la an kinahanglan nira singbahon. An mga sugo katapos hito nagsusumat han ira obligasyon ha ira igkasi-tawo, lakip hito an pagin tangkod ha ira asawa ngan diri pangawat. Amo nga an sugo nga “pasidunggi an imo tatay ngan an imo nanay” ginhuhunahuna nga nagkukonektar hiton duha nga grupo han mga sugo.