Waray isumat han Biblia an petsa han katawo ni Jesus; waray liwat ito magsiring nga kinahanglan naton iselebrar an iya birthday. An Cyclopedia nira McClintock ngan Strong nasiring: “An pagselebrar han Pasko diri tikang ha Dios, ngan diri liwat tikang ha B[ag-o nga] T[ugon].”

 Lugod, kon uusisahon an kasaysayan han Pasko, makikita nga tikang ito ha mga rituwal han pagano nga relihiyon. Iginpapakita han Biblia nga napapasina naton an Dios kon ginsisingba naton hiya ha paagi nga diri niya gin-uuyonan.​—Exodo 32:5-7.

1.   Pagselebrar han birthday ni Jesus: “An siyahan nga mga Kristiano waray magselebrar han katawo [ni Jesus] kay para ha ira an pagselebrar han katawo han bisan hin-o nga tawo pagano nga kustomre.”​—The World Book Encyclopedia.

2.   Disyembre 25: Waray ebidensya nga natawo hi Jesus hito nga petsa. Posible nga ginpili han mga lider han singbahan ini nga petsa basi makadungan ha pagano nga mga piyesta nga ginsiselebrar ha panahon han winter solstice o hirani hito.

3.   Panhatag hin regalo, engrande nga pangaon, mga parti: An The Encyclopedia Americana nasiring: “An Saturnalia, usa nga kapiyestahan han mga Romano nga ginsiselebrar ha kabutngaan han Disyembre, an nagin basihan han damu nga kustomre han karisyohan kon Pasko. Pananglitan, ini nga selebrasyon an gintikangan han engrande nga pangaon, panhatag hin regalo, ngan pagdagkot hin mga kandila.” An Encyclopædia Britannica nasiring nga “waray trabaho ngan sarado an mga negosyo” kon Saturnalia.

4.   Mga Christmas light: Sumala ha The Encyclopedia of Religion, gindidekorasyonan han mga taga-Europa an ira mga balay “hin mga suga ngan ngatanan nga klase hin evergreen” ha pagselebrar han winter solstice ngan sugad nga pangontra ha magraot nga espiritu.

5.   Mistletoe, holly: “An mga Druid natoo nga an mistletoe may-ada gahum. An evergreen nga holly ginsisingba sugad nga saad han pagbalik han adlaw.”​—The Encyclopedia Americana.

6.   Christmas tree: “An pagsingba ha kahoy, nga komon ha pagano nga mga taga-Europa, nagpadayon bisan kon nakombirte na hira ha Kristianidad.” Usa nga paagi nga nagpadayon an pagsingba ha kahoy amo an kustomre han “pagbutang hin Yule tree ha entrada o ha sulod han balay ha kapiyestahan ha kabutngaan han kathagkot.”​—Encyclopædia Britannica.