An pakiana mahitungod ha katuyoan han kinabuhi mahimo igpakiana ha damu nga paagi, sugad han Kay ano nga aanhi kita? o May katuyoan ba an akon kinabuhi? Iginpapakita han Biblia nga an katuyoan han aton kinabuhi amo an pagkaada maopay nga relasyon ha Dios. Tagda inin pipira nga importante nga kamatuoran nga iginpapakita han Biblia.

•   An Dios an aton Maglalarang. An Biblia nasiring: “[An Dios] an naghimo ha aton, ngan diri kita mismo.”​—Salmo 100:3, ftn; Pahayag 4:11.

•   May katuyoan an Dios ha tanan nga ginlarang niya, upod na kita.​—Isaias 45:18.

•   Ginlarang kita han Dios nga may “espirituwal nga panginahanglan,” nga nag-uupod han hingyap nga hibaroan an katuyoan han kinabuhi. (Mateo 5:3) Karuyag niya nga tagbawon ito nga aton hingyap.​—Salmo 145:16.

•   Napupun-an naton an aton espirituwal nga panginahanglan pinaagi ha pagkaada maopay nga relasyon ha Dios. Bisan kon para ha pipira baga hin imposible nga magin sangkay an Dios, gin-aaghat kita han Biblia: “Magin duok ha Dios, ngan magigin duok hiya ha iyo.”​—Santiago 4:8; 2:23.

•   Basi magin sangkay an Dios, kinahanglan naton magkinabuhi uyon ha iya katuyoan para ha aton. Ginsusumat han Biblia ini nga katuyoan ha Eclesiastes 12:13: “Tahora an Dyos ngan tumana an iya mga sugo, kay amo la ini an tuyo han paghimoa han tawo.”​—Maupay nga Sumat.

•   Diri na mag-iiha, maieksperyensyahan na naton hin bug-os an orihinal nga katuyoan han Dios para ha aton kon wad-on na niya an pag-antos ngan tagan hin kinabuhi nga waray kataposan an iya kasangkayan, adton mga nagsisingba ha iya.​—Salmo 37:10, 11.