An Siyahan nga Surat ha mga Taga-Tesalonica 4:1-18
4 Ha kataposan, mga kabugtoan, sugad han iyo nakarawat nga instruksyon tikang ha amon kon paonan-o kamo sadang maglakat basi mapalipay an Dios,+ sugad han iyo paglakat, naghahangyo kami ha iyo ngan nakikimalooy ha iyo pinaagi han Ginoo nga hi Jesus nga padayon nga buhaton niyo ito hin labaw pa.
2 Kay maaram kamo han mga instruksyon* nga iginhatag namon ha iyo tikang ha Ginoo nga hi Jesus.
3 Kay ini an kaburut-on han Dios, nga magin baraan kamo+ ngan maglikay ha seksuwal nga imoralidad.*+
4 An tagsa ha iyo sadang mahibaro pagkontrol han iya kalugaringon nga lawas*+ ha pagkabaraan+ ngan kadungganan,
5 diri ha hakugnon ngan diri mapugngan nga hingyap ha pakighilawas+ pariho han mga nasud nga diri nakilala ha Dios.+
6 Waray bisan hin-o nga sadang lumahos ha husto nga mga limitasyon ngan magsalingabot ha iya bugto mahitungod hini, kay hi Jehova* nagpapadapat hin sirot para hini ngatanan nga sala, sugad han amon iginsumat nga daan ha iyo ngan marig-on nga iginpahamangno liwat ha iyo.
7 Kay gintawag kita han Dios, diri para ha kahugawan, kondi para ha pagkabaraan.+
8 Salit an tawo nga nagbabalewaray hini nagbabalewaray, diri ha tawo, kondi ha Dios,+ nga naghahatag ha iyo han iya baraan nga espiritu.+
9 Pero mahitungod han minagburugto nga gugma,+ diri na kinahanglan nga magsurat pa kami ha iyo, kay kamo mismo gintutdoan han Dios nga higugmaon an usa kag usa.+
10 Ha pagkamatuod, ginbubuhat na niyo ito ha ngatanan nga kabugtoan ha bug-os nga Macedonia. Pero gin-aaghat namon kamo, mga kabugtoan, nga padayon nga buhaton niyo ito hin labaw pa.
11 Himoa niyo nga tumong nga magkinabuhi hin murayaw+ ngan ayaw panginlabot ha buruhaton han iba+ ngan pagtrabaho kamo pinaagi han iyo mga kamot,+ sugad han amon igintutdo ha iyo,
12 basi makita han mga tawo ha gawas nga naglalakat kamo hin desente+ ngan diri nagkikinahanglan hin bisan ano.
13 Dugang pa, mga kabugtoan, diri namon karuyag nga magin ignorante kamo* mahitungod han mga nangangaturog ha kamatayon,+ basi diri kamo masubo sugad han iba nga waray paglaom.+
14 Kay kon natoo kita nga hi Jesus namatay ngan ginbuhi,+ sugad man ig-uupod ha iya han Dios an mga nangaturog ha kamatayon pinaagi kan Jesus.+
15 Kay ini an amon iginsusumat ha iyo uyon ha pulong ni Jehova,* nga kita nga buhi nga nagpapabilin tubtob ha presensya han Ginoo diri gud mahiuuna ha mga nangaturog ha kamatayon;
16 kay an Ginoo mismo malusad tikang ha langit ngan mababatian an iya pagsugo, nga an tingog kanan arkanghel+ ngan may trumpeta han Dios, ngan an mga namatay nga kahiusa han Kristo amo an una nga mabubuhi.+
17 Katapos hito, kita nga mga buhi pa nga nabibilin, dadad-on ha mga dampog+ upod nira basi tapoon ha kahanginan an Ginoo;+ ngan katapos, pirme na kita makakaupod han Ginoo.+
18 Salit padayon nga liawa niyo an usa kag usa pinaagi hini nga mga pulong.
