Surat ha mga Taga-Filipos 4:1-23
4 Salit mga kabugtoan ko nga akon hinigugma ngan ginhahandom, nga akon kalipay ngan korona,+ tindog kamo hin marig-on+ hini nga paagi nga kahiusa han Ginoo, mga hinigugma ko.
2 Gin-aaghat ko hi Euodia ngan gin-aaghat ko hi Sintike nga magkaada pariho nga hunahuna sugad nga kahiusa han Ginoo.+
3 Oo, ginhahangyo ko liwat ikaw, sugad nga tinuod nga igkasi-magburuhat,* nga padayon nga buligan ini nga kababayin-an nga nangalimbasog* kaupod ko para ha maopay nga sumat, pati hi Clemente ngan an iba pa nga akon igkasi-magburuhat, nga an mga ngaran aada ha libro han kinabuhi.+
4 Magrayhak kamo pirme ha Ginoo. Uutruhon ko, Magrayhak kamo!+
5 Ipakita ha ngatanan nga tawo an iyo pagkamakatadunganon.+ An Ginoo hirani na.
6 Ayaw kamo kabaraka ha bisan ano nga butang,+ kondi ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo;+
7 ngan an kamurayawan+ han Dios nga labaw ha ngatanan nga pagsabot magbabantay han iyo kasingkasing+ ngan han iyo panhunahuna pinaagi kan Kristo Jesus.
8 Ha kataposan, mga kabugtoan, bisan ano nga butang nga tinuod, bisan ano nga butang nga sadang tagdon hin seryoso, bisan ano nga butang nga matadong, bisan ano nga butang nga putli,* bisan ano nga butang nga makapaaghat han gugma, bisan ano nga butang nga dungganon, bisan ano nga butang nga maopay, ngan bisan ano nga butang nga darayawon, padayon nga tagda* niyo ini nga mga butang.+
9 An mga butang nga iyo hinbaroan sugad man ginkarawat ngan hinbatian ngan hinkit-an may kalabotan ha akon, padayon nga buhata niyo ini,+ ngan an Dios han kamurayawan maupod ha iyo.
10 Sugad nga kahiusa han Ginoo, nagrarayhak gud ako nga nahibalik na an iyo pagtagad ha akon.+ Bisan kon nababaraka kamo mahitungod ha akon, waray kamo magkaada oportunidad nga ipakita ito.
11 Ginyayakan ko ini diri tungod kay nanginginahanglan ako, kay nahibaro ako pagtagana han akon panginahanglan* anoman an akon kahimtang.+
12 Maaram ako kon paonan-o magkinabuhi nga kulang ha panginahanglan+ ngan kon paonan-o magkinabuhi nga hura. Ha ngatanan nga butang ngan ha ngatanan nga kahimtang hinbaroan ko an sekreto kon paonan-o mabusog ngan kon paonan-o magutom, kon paonan-o magkaada hin kahuraan ngan kon mag-aano ha panahon han kawarayan.
13 Ha ngatanan nga butang may kusog ako pinaagi ha iya nga naghahatag ha akon hin gahum.+
14 Pero maopay an iyo ginbuhat nga ginbuligan niyo ako ha akon kasakitan.
15 Ha pagkamatuod, kamo nga mga taga-Filipos maaram liwat nga katapos niyo hibaroan an maopay nga sumat, pagbaya ko ha Macedonia, waray kongregasyon nga binulig ha akon o kinarawat han akon bulig, gawas la ha iyo;+
16 kay han nakadto ako ha Tesalonica, nagpadara kamo hin bulig para ha akon panginahanglan diri la makausa kondi makaduha.
17 Diri kay naghihingyap ako hin regalo, lugod karuyag ko an bunga nga naghahatag ha iyo hin dugang nga ganansya.
18 Kondi may-ada ako han ngatanan nga akon ginkikinahanglan ngan sobra pa ngani. Waray na kulang ha akon, yana nga nakarawat ko kan Epafrodito+ an iyo iginpadara, usa nga mahamot,+ kinakarawat nga halad, ngan nakakapalipay gud ha Dios.
19 Sugad nga balos, an akon Dios bug-os nga maghahatag han ngatanan niyo nga panginahanglan+ uyon ha iya mahimayaon nga karikohan pinaagi kan Kristo Jesus.
20 Yana paghimayaon unta an aton Dios ngan Amay ha kadayonan, oo ha kadayonan. Amen.
21 Ipaabot an akon pangumusta ha tagsa nga baraan nga kahiusa ni Kristo Jesus. An kabugtoan nga kaupod ko nangungumusta ha iyo.
22 An ngatanan nga baraan, labi na gud an mga sulod-balay han Cesar,+ nangungumusta ha iyo.
23 Hinaot makarawat niyo an diri matupngan nga pagkabuotan han Ginoo nga hi Jesu-Kristo samtang nagpapakita kamo hin maopay nga disposisyon.
Mga footnote
^ Lit., “tinuod nga igkasi-magparas-an han yugo.”
^ O “nga naniguro gud.”
^ O “hunahunaa; pamalandonga.”
^ O “limpyo.”
^ O “ha pagin kontento.”
