Sumala kan Juan 8:12-59
8 12 Katapos hi Jesus nagyakan utro ha ira, nga nasiring: “Ako an kalamrag han kalibotan.+ An bisan hin-o nga nasunod ha akon diri gud maglalakat ha kasisidman, kondi magkakaada han kalamrag+ han kinabuhi.”
13 Salit an mga Pariseo nagsiring ha iya: “Nagpapamatuod ka mahitungod ha imo kalugaringon; diri tinuod an imo pamatuod.”
14 Binaton hi Jesus ha ira: “Bisan kon nagpapamatuod ako mahitungod ha akon kalugaringon, tinuod an akon pamatuod, kay maaram ako kon diin ako tikang ngan kon makain ako.+ Pero diri kamo maaram kon diin ako tikang ngan kon makain ako.
15 Naghuhukom kamo uyon ha unod;*+ diri gud ako naghuhukom ha bisan hin-o nga tawo.
16 Pero kon pananglitan man maghukom ako, an akon paghukom uyon ha kamatuoran, kay diri ako nag-uusahan, kondi kaupod ko an Amay nga nagsugo ha akon.+
17 Sugad man, ini an nakasurat ha iyo mismo Balaud: ‘An pamatuod han duha nga tawo tinuod.’+
18 Ako an usa han nagpapamatuod mahitungod ha akon kalugaringon, ngan an Amay nga nagsugo ha akon nagpapamatuod liwat mahitungod ha akon.”+
19 Katapos nagsiring hira ha iya: “Hain an imo Amay?” Binaton hi Jesus: “Diri niyo ako kilala o an akon Amay.+ Kon kilala niyo ako, kilala liwat unta niyo an akon Amay.”+
20 Ginyakan niya ini nga mga pulong didto ha tiripigan hin bahandi+ samtang nagtututdo hiya ha templo. Pero waray nagdakop ha iya, kay an iya oras waray pa umabot.+
21 Salit nagsiring hiya utro ha ira: “Mabaya ako, ngan bibilngon ako niyo, pero mamamatay kamo ha iyo sala.+ Diri kamo makakakadto ha akon kakadtoan.”+
22 Tungod hito nagsiring an mga Judio: “Mag-uunay ba hiya? Kay nasiring hiya, ‘Diri kamo makakakadto ha akon kakadtoan.’”
23 Nagpadayon hiya ha pagsiring ha ira: “Kamo tikang ha ubos; ako tikang ha igbaw.+ Kamo tikang hini nga kalibotan; ako diri tikang hini nga kalibotan.
24 Ito an hinungdan nga nagsiring ako ha iyo: Mamamatay kamo ha iyo mga sala. Kay kon diri kamo tumoo nga ako ito, mamamatay kamo ha iyo mga sala.”
25 Salit nagpakiana hira ha iya: “Hin-o ka?” Binaton hi Jesus ha ira: “Kay ano ba nga nakikiistorya pa ako ha iyo?
26 Damu nga butang an kinahanglan ko igyakan mahitungod ha iyo ngan an kinahanglan ko hukman. Ha pagkamatuod, Hiya nga nagsugo ha akon nagyayakan han kamatuoran, ngan an mga butang mismo nga nabatian ko ha iya iginyayakan ko ha kalibotan.”+
27 Waray hira makasabot nga mahitungod ha Amay an iya ginyayakan ha ira.
28 Katapos nagsiring hi Jesus: “Katapos niyo alsahon an Anak han tawo,+ mahibabaroan niyo nga ako amo hiya+ ngan waray ako ginbubuhat ha kalugaringon ko nga pagbuot;+ kondi kon ano an igintutdo ha akon han Amay, ini nga mga butang an akon ginyayakan.
29 Ngan Hiya nga nagsugo ha akon kaupod ko; waray niya ako pabay-i nga mag-usahan, kay ginbubuhat ko pirme an mga butang nga nakakapalipay ha iya.”+
30 Samtang ginyayakan niya ini nga mga butang, damu an tinoo ha iya.
31 Katapos, nagpadayon hi Jesus ha pagsiring ha mga Judio nga tinoo ha iya: “Kon magpabilin kamo ha akon pulong, mga disipulo ko gud kamo,
32 ngan mahibabaro kamo han kamatuoran,+ ngan an kamatuoran maghahatag ha iyo hin kagawasan.”+
33 Binaton hira ha iya: “Katulinan kami ni Abraham ngan waray gud kami magin mga uripon han bisan hin-o. Kay ano nga nasiring ka, ‘Magkakaada kamo kagawasan’?”
34 Binaton hi Jesus ha ira: “Ha pagkamatuod gud nasiring ako ha iyo, an kada tagsa nga nagbubuhat hin sala uripon han sala.+
35 Dugang pa, an uripon diri nagpapabilin ha panimalay ha kadayonan; an anak an nagpapabilin ha kadayonan.
36 Salit kon an Anak maghatag ha iyo hin kagawasan, magkakaada kamo tinuod nga kagawasan.
37 Maaram ako nga katulinan kamo ni Abraham. Pero gin-iikaparatay niyo ako, kay an akon pulong diri nag-uuswag dida ha iyo.
38 Ginyayakan ko an mga butang nga akon nakita samtang kaupod ako han akon Amay,+ kondi ginbubuhat niyo an mga butang nga nabatian niyo ha iyo amay.”
39 Binaton hira ha iya: “Hi Abraham an amon amay.” Nagsiring hi Jesus ha ira: “Kon mga anak kamo ni Abraham,+ ginbubuhat unta niyo an mga buhat ni Abraham.
40 Pero yana gin-iikaparatay niyo ako, usa nga tawo nga nagsumat ha iyo han kamatuoran nga akon nabatian ha Dios.+ Waray ini buhata ni Abraham.
41 Ginbubuhat niyo an mga buhat han iyo amay.” Nagsiring hira ha iya: “Waray kami ig-anak tungod ha imoralidad;* usa la an amon Amay, an Dios.”
42 Ginsidngan hira ni Jesus: “Kon an Dios an iyo Amay, hihigugmaon unta ako niyo,+ kay tikang ako ha Dios ngan aanhi ako. Kinanhi ako, diri ha kalugaringon ko nga pagbuot, kondi ginsugo Niya ako.+
43 Kay ano nga diri niyo nasasabtan an akon ginsisiring? Kay diri kamo namamati ha akon pulong.
44 Tikang kamo ha iyo amay nga Yawa, ngan karuyag niyo buhaton an mga hingyap han iyo amay.+ Ito hiya usa nga parapamatay han nagtikang hiya,*+ ngan waray hiya magpadayon ha kamatuoran, kay an kamatuoran waray ha iya. Kon nagbubuwa hiya, nagyayakan hiya sumala ha iya kalugaringon nga disposisyon, kay buwaon hiya ngan an amay han kabuwaan.+
45 Pero ako, tungod kay nagsusumat ako ha iyo han kamatuoran, diri kamo natoo ha akon.
46 Hin-o ha iyo an makakapamatuod nga salaan ako? Kon nagyayakan ako han kamatuoran, kay ano nga diri kamo natoo ha akon?
47 Hiya nga tikang ha Dios namamati ha mga pulong han Dios.+ Amo nga diri kamo namamati, kay diri kamo tikang ha Dios.”+
48 Nagsiring ha iya an mga Judio: “Diri ba husto kami ha pagsiring, ‘Samaritano+ ka ngan may demonyo’?”+
49 Binaton hi Jesus: “Waray ako demonyo, lugod ginpapasidunggan ko an akon Amay, ngan diri niyo ako ginpapasidunggan.
50 Kondi diri ako nangangalimbasog nga makakarawat hin kadungganan para ha akon kalugaringon;+ may Usa nga karuyag maghatag hito ngan hiya an naghuhukom.
51 Ha pagkamatuod gud nasiring ako ha iyo, kon an bisan hin-o nagtutuman han akon pulong, diri gud hiya makakakita han kamatayon.”+
52 Nagsiring ha iya an mga Judio: “Yana maaram na kami nga may demonyo ka. Namatay hi Abraham, sugad man an mga propeta, pero ikaw nasiring, ‘Kon an bisan hin-o nagtutuman han akon pulong, diri gud hiya makakaeksperyensya han kamatayon.’
53 Mas labaw ka ba kay ha amon amay nga hi Abraham, nga namatay? An mga propeta namatay liwat. Hin-o ka ba ha imo paghunahuna?”
54 Binaton hi Jesus: “Kon ginpapasidunggan ko an akon kalugaringon, waray pulos an akon kadungganan. An akon Amay an nagpapasidungog ha akon,+ hiya nga iyo ginsisiring nga iyo Dios.
55 Pero waray niyo hiya makilala,+ kondi kilala ko hiya.+ Ngan kon magsiring ako nga diri ko hiya kilala, magigin pariho ako ha iyo nga buwaon. Kondi kilala ko gud hiya ngan gintutuman ko an iya pulong.
56 Hi Abraham nga iyo amay nalipay gud ha paglaom nga makita an akon adlaw, ngan nakita niya ito ngan nalipay hiya.”+
57 Katapos nagsiring ha iya an mga Judio: “Waray ka pa ngani mag-50 anyos, katapos nakita mo na hi Abraham?”
58 Nagsiring ha ira hi Jesus: “Ha pagkamatuod gud nasiring ako ha iyo, antes matawo hi Abraham, buhi na ako.”+
59 Salit namurot hira hin mga bato basi ilabay ha iya, pero nagtago hi Jesus ngan ginawas ha templo.
