Mga Salmo 121:1-8

  • Ginbabantayan ni Jehova an iya katawohan

    • “Bulig ha akon tikang kan Jehova” (2)

    • Hi Jehova diri gud nakaturog (3, 4)

Kanta ha Pagsagka. 121  Iginsisiplat ko an akon mga mata ha kabukiran.+ Diin magtitikang an bulig para ha akon?  2  An bulig ha akon tikang kan Jehova,+Hiya nga naghimo han langit ngan tuna.  3  Diri gud niya papabay-an nga mahitalindas* an imo tiil.+ Hiya nga nagbabantay ha imo diri gud pipirawon.  4  Kitaa! Diri gud hiya pipirawon ngan diri liwat makaturog,Hiya nga nagbabantay han Israel.+  5  Hi Jehova nagbabantay ha imo. Hi Jehova amo an landong+ ha imo too nga kamot.+  6  Ha kaadlawon an adlaw diri magdadaot ha imo,+Diri liwat magdadaot ha imo an bulan ha kagab-ihon.+  7  Babantayan ka ni Jehova tikang ha ngatanan nga kadaot.+ Babantayan niya an imo kinabuhi.*+  8  Babantayan ka ni Jehova ha ngatanan nga imo ginbubuhat* Tikang yana tubtob ha kadayonan.

Mga footnote

^ O “mauy-og.”
^ O “kalag.”
^ Lit., “ha imo paggawas ngan ha imo pagsulod.”
BAG-O NGA KALIBOTAN NGA HUBAD HAN BARAAN NGA KASURATAN
Salmo 121
Waray-Waray
Basaha an Biblia Online
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt p. 40