Ha pagtikang han iyo kinabuhi sugad nga mag-asawa, makakaeksperyensya kamo hin iba-iba nga problema. Bangin resulta ito han iyo magkaiba nga panhunahuna, pagbati, ngan paagi ha pagbuhat han mga butang. O bangin magtikang ito ha iba nga tawo o ha diri ginlalaoman nga mga panhitabo.

May tendensya kita nga igbalewaray na la an problema, pero ginsasagdonan kita han Biblia nga atubangon ito. (Mateo 5:23, 24) Mabibilngan mo an pinakamaopay nga solusyon han iyo mga problema pinaagi ha pag-aplikar han mga prinsipyo ha Biblia.

KON ANO AN GINSISIRING HAN BIBLIA: “May panahon ha pagyakan.” (Eklesiastes 3:7) Siguroha nga naggagahin kamo hin panahon basi pag-istoryahan an problema. Tangkod nga isumat ha imo padis an imo inaabat ngan ginhuhunahuna mahitungod han problema. Pirme ‘pagyakan hin kamatuoran’ ha imo padis. (Efeso 4:25) Bisan kon nasisina ka na, pugngi an imo kalugaringon nga makiaway. An kalmado nga baton mabulig nga diri magin away an simple nga pag-istorya.​—Proberbios 15:4; 26:20.

Bisan kon diri ka nauyon, pagpabilin nga buotan. Ayaw kalimti an pagpakita hin gugma ngan pagtahod ha imo padis. (Colosas 4:6) Pangalimbasugi nga masulbad dayon an problema, ngan ayaw undang ha pakigkomunikar.​—Efeso 4:26.

KON ANO AN IMO MAHIHIMO:

• Pagpili hin angayan nga panahon basi pag-istoryahan an problema

• Kon nagyayakan an imo padis, ayaw pagsagbang. Hulata an imo turno ha pagyakan

KON ANO AN GINSISIRING HAN BIBLIA: “Palanggaon niyo an usa kag usa. Manguna kamo ha pagpasidungog ha usa kag usa.” (Roma 12:10) Importante gud kon paonan-o ka namamati. Pangalimbasugi nga masabtan an ginsisiring han imo padis ngan ipakita an “pagpaid . . . ngan pagpaubos.” (1 Pedro 3:8; Santiago 1:19) Pamati hin maopay. Kon posible, bayai an imo ginbubuhat ngan ihatag an imo bug-os nga atensyon ha iya, o hangyoa hiya nga pag-istoryahan niyo ito nuroniyan. Kon ginhuhunahuna mo an imo padis sugad nga imo sangkay imbes nga kaaway, diri ka dayon masisina.​—Eklesiastes 7:9.

KON ANO AN IMO MAHIHIMO:

• Padayon nga mamati nga may abrido nga hunahuna, bisan kon diri ka naayon ha iya ginsisiring

• Sabota kon ano gud an iya karuyag sidngon. Obserbari an iya panggios ngan tono han tingog

KON ANO AN GINSISIRING HAN BIBLIA: “Dida han panalinguha may-ada magagana, kundi an yakan-yakan la nadangat ha kakablasan.” (Darahunon [Proberbios] 14:23, Baraan nga Biblia) Diri igo nga nagkauyon la kamo ha maopay nga solusyon. Kinahanglan niyo buhaton kon ano an iyo nadesisyonan. Bangin magkinahanglan ini hin daku nga pangalimbasog, pero malilipay kamo han resulta hito. (Proberbios 10:4) Kon magbibinuligay kamo, magkakaada “maopay nga balos” an iyo mga pangalimbasog.​—Eklesiastes 4:9.

KON ANO AN IMO MAHIHIMO:

• Pagdesisyon kon ano an praktikal nga buhaton han tagsa ha iyo basi masulbad an problema

• Ha panapanahon, usisaha kon ano na an iyo nahimo