Iginsurat ha Biblia an maopay nga sumat nga an mga tawo mabubuhi ha waray kataposan dinhi ha tuna. (Salmo 37:29) An Biblia ginkukompwesto hin 66 gudtiay nga libro. Mga 40 nga magtinumanon nga kalalakin-an an gin-gamit han Dios ha pagsurat hito. An siyahan nga lima nga libro iginsurat ni Moises mga 3,500 ka tuig na an naglabay. An ultimo nga libro iginsurat ni apostol Juan sobra 1,900 ka tuig na an naglabay. Kan kanay panhunahuna an iginsurat ha Biblia? Nakigkomunikar an Dios ha mga parasurat han Biblia pinaagi han iya baraan nga espiritu. (2 Samuel 23:2) Ira iginsurat an panhunahuna han Dios, diri an ira panhunahuna. Salit hi Jehova an Awtor han Biblia.​—Basaha an 2 Timoteo 3:16; 2 Pedro 1:20, 21.

Kitaa an video nga Hin-o an Awtor han Biblia?

Maaram kita nga an Biblia tikang ha Dios tungod kay husto ngan detalyado nga igintatagna hito an mahitatabo ha tidaraon. Waray tawo nga makakahimo hito. (Josue 23:14) An Dios la nga Makagarahum ha ngatanan an husto nga makakagtagna han tidaraon han katawohan.​—Basaha an Isaias 42:9; 46:10.

Naiiba gud an libro nga tikang ha Dios. Binilyon na nga kopya han Biblia an naipanaltag ha ginatos nga yinaknan. Bisan kon maiha na ito nga iginsurat, nauyon ito ha syensya. Waray liwat magkasumpaki an 40 nga parasurat hito. * Dugang pa, nagsusumat ito mahitungod han gugma han Dios, ngan may-ada ito gahum nga makagbag-o han kinabuhi han mga tawo. Tungod hito, minilyon an kombinsido nga an Biblia Pulong han Dios.​—Basaha an 1 Tesalonika 2:13.

Kitaa an video nga Paonan-o Kita Makakasiguro nga Tinuod an Ginsisiring han Biblia?

An usa han nangunguna nga tema han Biblia amo an maopay nga sumat nga an Dios may mahigugmaon nga katuyoan ha katawohan. Iginsusumat han Biblia kon paonan-o nawara han siyahan nga mag-asawa an higayon nga mabuhi ha paraiso nga tuna ngan kon paonan-o ipapahiuli an paraiso.​—Basaha an Pahayag 21:4, 5.

May mababasa liwat ha Biblia nga mga balaud, prinsipyo, ngan mga sagdon. Dugang pa, mababasa dida hito kon paonan-o gintratar han Dios an mga tawo. Pinaagi hito, mahibabaroan naton an personalidad han Dios. Salit mabubuligan ka han Biblia nga makilala hiya. Iginsusumat hito kon paonan-o ka niya magigin sangkay.​—Basaha an Salmo 19:7, 11; Jakobo 2:23; 4:8.

Ini nga brosyur mabulig ha imo nga masabtan an Biblia pinaagi ha pagsubad han ginhimo ni Jesus. Nag-unabi hiya hin mga teksto ngan iginsaysay an kahulogan hito.​—Basaha an Lukas 24:​27, 45.

Makapainteres gud an maopay nga sumat nga tikang ha Dios. Kondi may mga tawo nga diri interesado hito, ngan an iba nadiri ngani mamati hito. Pero ayaw panluya. An imo paglaom nga mabuhi ha waray kataposan nadepende ha imo pagkuha hin kahibaro mahitungod ha Dios.​—Basaha an Juan 17:3.