An maopay nga sumat tikang kan Jehova, an “malipayon nga Dios,” nga karuyag magin malipayon an mga pamilya. (1 Timoteo 1:11, NW) Hiya an nagpatikang han kahikayan ha pag-asawa. Importante an legal nga pag-asawa tungod kay nabulig ito basi magin malipayon ngan magin marig-on an pundasyon han pamilya. Sadang sundon han mga Kristiano an balaud han gobyerno may kalabotan ha legal nga pag-asawa.​—Basaha an Lukas 2:1, 4, 5.

Ano an pagtagad han Dios ha pag-asawa? Gintatagad niya ito nga permanente nga pag-upod han usa nga lalaki ngan usa nga babaye. Karuyag ni Jehova nga an mag-asawa magin maunungon ha kada tagsa. (Hebreo 13:4) Nangangalas hiya ha “pagbulag,” o pagdiborsyo. (Malakias 2:16) Igintutugot la niya an pagdiborsyo ngan pag-asawa utro kon nag-adulteryo an padis han usa.​—Basaha an Mateo 19:3-6, 9.

Katuyoan ni Jehova nga magbinuligay an mag-asawa. (Genesis 2:18) Sugad nga ulo han pamilya, an bana kinahanglan manguna ha pagtagana han materyal nga panginahanglan han iya pamilya ngan ha pagtutdo ha ira mahitungod ha Dios. Kinahanglan andam hiya magsakripisyo para ha iya asawa. Sadang higugmaon ngan tahuron han mag-asawa an kada tagsa. Tungod kay diri hira hingpit, kinahanglan magpinasayloay hira basi magin malipayon an ira pag-asawa.​—Basaha an Efeso 4:31, 32; 5:22-25, 33; 1 Pedro 3:7.

Kon may problema an iyo pag-asawa, sadang kamo mangalimbasog nga sulbaron ito ha mahigugmaon nga paagi. (1 Korinto 13:4, 5) Diri iginrirekomenda han Pulong han Dios an pagbulag sugad nga solusyon han problema han mag-asawa.​—Basaha an 1 Korinto 7:10-13.

Karuyag ni Jehova nga magin malipayon kamo, ngan naghahatag hiya hin gimaopayi nga mga sagdon kon paonan-o magigin malipayon. Karuyag niya nga magpahimulos kamo tikang ha kinaadman ngan eksperyensya han iyo mga kag-anak. (Kolosas 3:20) Sugad nga Maglalarang, karuyag liwat niya nga magin malipayon kamo ha pagbuhat han iya kaburut-on ngan ha pagsunod ha iya Anak.​—Basaha an Eklesiastes 11:9–12:1; Mateo 19:13-15; 21:15, 16.

Kinahanglan mangalimbasog kamo ha pagtagana hin pagkaon, urukyan, ngan bado ha iyo mga anak. (1 Timoteo 5:8) Pero basi magin malipayon hira, kinahanglan liwat niyo hira tutdoan nga higugmaon an Dios ngan mahibaro mahitungod ha iya. (Efeso 6:4) An iyo susbaranan ha pagpakita hin gugma ha Dios makakaimpluwensya gud ha ira. Kon tikang ha Biblia an iyo igintututdo, mabubuligan niyo hira nga mamolde an ira hunahuna ha husto nga paagi.​—Basaha an Deuteronomio 6:4-7; Proberbios 22:6.

An iyo mga pagparig-on ngan kumendasyon makakabulig gud ha iyo mga anak. Kinahanglan liwat nira an sagdon ngan disiplina tungod kay magpapanalipod ito ha ira ha panggawi nga magwawara han ira kalipay. (Proberbios 22:15) Pero kinahanglan diri magin mapintas o madarahog ha pagdisiplina.​—Basaha an Kolosas 3:21.

An mga Saksi ni Jehova nagpupublikar hin mga libro nga basado ha Biblia nga mabulig labi na ha mga kag-anak ngan mga anak.​—Basaha an Salmo 19:7, 11.